MANJUHUT RAMBUT DI GALAPUNG
Faisal Refki
7/2/2017
TOKOH:
PALUI : Laki-laki, sederhana, 30 tahunan, banyak akal
GARBUS :Laki-laki, kurus, 30 tahunan, hansip, berbicara gagap
TULAMAK :Laki-laki, gemuk, 30 tahunan, hansip, berbicara agak lambat
ORANG 1 : Laki-laki, 30 tahunan, Petugas dinas kesehatan
ORANG 2 :Laki-laki, 30 tahunan, petugas dinas kesehatan
STAF : wanita, 30 tahunan, pintar dan tegas
PASIEN 1 : Laki-laki, 40 tahunan, gila ingin jadi dokter
PASIEN 2 :wanita, umur 25 tahunan. Gila ingin jadi perawat
PRESENTER TV : wanita, umur 25 tahunan, sembarangan, berbicara agak genit
BABAK I
DI KAMPUNG, GARBUS & TULAMAK SEDANG SANTAI DI GARDU
(Palui masuk)
Palui : (Palui bukah-bukah kalihatan panik)
Garbus : Lui,, kanapa ikam pina habut banar Lui kaya disasahi hantu ha lagi
Tulakam : hiih ikam nih Lui ai, kanapa garang?
Palui : (terengah-engah) buhan ikam tahu kada, kampung kita nih kada aman lagi !!
Garbus : (terkejut) ayy, kada aman kaya apa maksud ikam Lui?
Tulamak : hiih ikam nih, cuba bawa batanang hulu Lui ai, nyaman tu bakisahan.
Palui : (Palui duduk lalu menjelaskan) jadi kaya ini nah buhannya, kampung kita nih sudah kada aman lagi, tu nah samalam kampung subalah tuh bakajadian sudah
Garbus : ayy, bakajadian napang Lui?
Palui : (meyakinkan) mayau !!!!
Tulamak & Garbus : mayau ???
Tulamak : babujur ikam nih Lui, ikam dapat habar matan mana ngintu Lui?
Palui : aku hanyar imbah matan kampung sabalah tadi, sampai di umum akan urang di langgar parihal mayau tadih, maka pulang lah mayau nya nih malalar ka satiap kampung, imbah kampung subalah, kampung kita pulang cagaran kana nih, dangar habar jua lah mayau nya nih badua jar, modus buhannya tuh pamulaan baik banar gasan mangalabui masyarakat, imbah masyarakat dikalabuinya hanyar dipanggalnya gulunya.
Tulamak & garbus : hiiii…. (takutan)
Palui : jadi saran aku haja pang lah, jangan talalu parcaya bila ada urang hanyar datang ka kampung kita nih, kalu pina mayau, lakasi di suruh bajauh haja matan kampung kita.
Garbus : nahh,,, (kepada Tulamak) bahaya banar ni mun kaya itu Tulamak ai, kita musti waspada mun kaya ini, kita sabagai aparat desa harus bujur-bujur manjagai masyarakat.
Tulamak : hiih Bus ai, manurutku kita kada usah abut gin hulu sakira warga kada takutan jua, biar haja kita nang manyandangnya badahulu, aku sanggup haja mun manyuruh mausir wara ha.
Garbus : bujur jar ikam Tulamak ai, inya kada kawa masuk ka kampung kita jua mun kada maliwati pos penjagaan kita nih.
Tulamak : (kepada Palui) Lui, kayapa? Ikam kawa haja kalo mambantui kami bajaga.
Palui : anu,, (mencari alasan) aku nih sabujurnya hakun haja mangganii bajagaan, tapi aku nih kada kawa kamana mana, soalnya anak ku dirumah bagaringan, kasian umanya surangan manjagai.
Garbus : nah iya kah Lui, ayuha Lui ai mudahan anak ikam wagas haja, wan jua Lui ai ikam jangan abut hulu lah cukup kita haja nang tahu.
Palui : iih tanang ha buhan ikam, ayuha lah aku bulik hulu nah, assalamuallaikum
Garbus & Tulamak : waallaikumsalam..
(Palui Keluar)
Garbus : Mak, siap haja kalo sudah?
Tulamak : siap banar nah Bus ai, ikam siap haja jua kalo?
Garbus : mun aku nih siap banar, lawas banar sudah kita kada kaya ini nah, paampihan samalam tuh pas kajadian kuyang ja kita nang bajaga banar kaya ini, ya kalo Mak?
Tulamak : hiih Bus ai, ingat banar aku samalam tuh, dikira kuyang sakalinya pasawat halus (drone) haja nang tarabang gasan mangudak matan langit, tu gara gara Palui ja jua mambawa habar.
Garbus : ya am, harau mangganti rugi wara kita samalam, hancur pasawat urang ditawaki hahaa..
DUA ORANG MASUK DENGAN DANDANAN YANG TIDAK MEYAKINKAN
Garbus : Mak Mak… (terlihat seperti mengintip dengan nada seperti berbisik) tu ada urang dua ikung, ingat lah ikam napa jar Palui tadi?
Tulamak : hiih, pinanya iya ni urangnya, maka mambawa karung ha jua, nyata dah isinya tuh kapala.
Garbus : mun kaya itu kita siap-siap ha Mak ai nah, siapakan alat perang Mak, pokoknya jangan sampai inya bapandir sepatah kata pun
Tulamak : siap Garbus.. (sok kuat)
(dua orang tadi mendatangi Garbus & Tulamak)
Orang 1 : selamat soree bapa-bapa… ini kami dari..
Garbus : (memotong) tadi sudah mahadangi buhan ikam, buhan ikam kada kami bariakan masuk ka kampung kami !!
Orang 2 : tapi kami badua handak…
Tulamak : (memotong) buhan ikam badua angkat batis matan tanah kamung kami, kami kada handak kampung kami terancam !!
Orang 1 : tapi perkenalkan hulu kami badua nih..
Garbus : (memotong) mayau !! buhan ikam nih mayau kalo nang meneror kampung subalah tadi, tu napa isinya didalam karung tuh?
Orang 2 : isi dalam karung nih sabujurnya..
Tulamak : (memotong) kapala manusia, Kami kada gair biar ikam mambawa kapala sakira kami takutan, kami siap haja malawan buhan ikam !!
Orang 1 : kaya ini haja nah, sakira nyaman..
Garbus : (memotong) buhan ikam baik bajauhan gin, mun kada bajauh kami kiyau akan urang sakampungan gasan mamukuli buhan ikam badua !!
Orang 2 : eeee… (takut) jangan paman ai, ayuha mun kaya itu kami bajauhan haja gin nah.
(Dua Orang Keluar)
Garbus : (lega) Alhamdulillah,, bapala jua kita ni lah kisah wani haha, jaka dilawaninya ha tadi kada bataha kada bukah tu pang..
Tulamak : ya am jua, tapi musia lah inya babulik pulang kasini babawaan kawan, habis am kita.
Garbus : hiih Mak lah, mun kaya itu baik kita bulikan gin daripada kita nang jadi korban, lajui dah…
(Garbus & Tulamak Keluar)
BABAK II
PALUI CS SANTAI DI GARDU
Palui : kayapa Bus, aman haja kalo habar kampung imbah habar mayau samalam?
Garbus : aman haja Lui ai mun sudah kami nang turun tangan nih
Tulamak : tapi Lui ai, imbah habar matan ikam samalam tuh asa kadada kadangaran lagi pang habar mayau tuh di kampung lain.
Palui : nyata ai, di tangkap urang kalu sudah buhannya, tu gin marga aku banarai nang malapor wadah polisi, untung polisi wadah kita nih bagus, gerak cepat ja buhannya tuh.
Garbus : sukur am mun kaya itu. (mengalihkan pembicaraan kepada Tulamak) ai Mak, napa maka batis ikam nih asa ganal Mak?
Palui : inya nih dasar lamak urangnya Bus ai, nyata ai batisnya ganal, kada kaya ikam pang batis sing halusan kaya galam.
Garbus : kada, ni bujuran tu Lui ai, asa baganal pada biasanya tu nah. Bangkak kah kanapa kah Mak?
Tulamak : hiih kam, (sambil memegang kakinya) babarapa hari nih batis ku nih sasain baganal, asa panaaassss banar asa luyuh kaitu nah Bus ai, samalam aku hanyar imbah garing awak panas, sakali bangun kulihati batis ku sudah nang kaya ini.
Palui : (memotong) aii hadang hulu lah, (kepada Tulamak) jar ikam tadi Mak awak panaaassss rasa luyuh, imbah itu demam, nah aku handak batakun wan ikam, nang panas tuh bagian mananya?
Tulamak : di bagian katiak Lui ai, habang kaya itu nah katiak ku Lui ai,,
palui : nah kada salah lagi dah, (kepada Garbus) Bus, ikam tadi ada kalu bakisah pas handak kasini tadi katiak ikam asa ngalih dikapit jar ikam, sakit jar ikam, iya kada?
garbus : hiih, dasar bujur pang uyuh aku maarit Lui ai
Palui : nah iya am dah mun kaya itu, nyata dah ikam ni Bus ai kana panyakit nang sama wan Tulamak, gejalanya sama, nyata dah Bus ai.
Garbus : jadi pang kami nih harus kaya apa Lui?
Palui : hadang lah, biasanya jam saini rami di TV tuh acara membahas kesehatan, coba pang buka TV kalo pina ada nang mambahas penyakit nang buhan ikam ingu nih.
Garbus : nah bujur tu, hadang lah (Garbus mambuka tv)
(presenter TV menjelaskan tentang gejala kaki gajah : system imvropisasi)
Garbus : jadi kami nih harus kaya apa Lui?
Palui : ya buhan ikam harus karumah sakit.
Tulamak : tapi kami nih kadada baisi duit Lui ai gasan baubat, tahu haja kalo ikam karumah sakit tuh kada murah.
Garbus : hiih Lui ai, tahu haja kalu ikam gawian kami nih maapa, gasan makan gin sukur.
Palui : buhan ikam tanang haja, aku tahu rumah sakit nang parak wan murah ha pulang.
Tulamak : bujuran kah Lui (senang), ayudah lakasi kita kasana, kaina sampat babangat batis ku nih.
Palui : tapi buhan ikam harus tahan bila baubat kasana..
Garbus : ai,, kanapa maka kaya itu Lui?
Palui : nang ngaran gratis nih nyata dah pelayanannya kada nang kaya urang babayar, saadanya tu pang, tapi sama haja jua maampihi panyakit nang ada nih.
Garbus : kada papa Lui ai, amun pacangan ampih panyakit kami nih aku siap haja manahani.
Tulamak : aku siap jua nah…
Palui : ayuha sudah mun kaya itu iringi aku…
(Palui cs bajalan ka rumah sakit)
BABAK III
DIRUMAH SAKIT
Palui : nah, sampai dah kita dirumah sakit, lakasi dah kita datangi.
Tulamak : kanapa maka sunyi Lui?
Palui : inya dasarnya kaya itu Mak ai, urang banyak nang kada tahu lagi baubat disini nih gratis, jaka banyak nang tahu nyata dah hibak.
Garbus : ayuha Lui ai, lajui dah kita masukan..
(Palui cs masuk rumah sakit)
Palui : Assalamuallaikum
Perawat : Waallaikumsalam, silakan duduk pa, ada yang bisa kami bantu?
Palui : jadi kaya ini bu lah, ni kawan ulun nang badua nih garing, tapi kada tahu lagi garing napa, jadi handak bapariksa ujar..
Perawat : ohh,, tunggu pa ya, saya panggilkan dokternya dulu, (keluar memanggil dokter)
(dokter masuk)
Dokter : siapa yang sakit pak? (kepada Palui Cs)
Palui : ini nah dok ai buhannya badua nih.. (menunjuk Garbus & Tulamak)
Dokter : kalau begitu biar saya periksa dulu ya pak, silakan bapak berdua duduk dulu disini (menyuruh Garbus & Tulamak ke tempat pemeriksaan)
Garbus : ni langsung badua kah dok? (bingung)
Tulamak : inggih, biasanya saikung-saikung dok ai
Dokter : ini layanan khsusus kami untuk bapak berdua, jadi bisa lebih cepat begitu pak
Garbus : ayuha dok ai mun kaya itu.
(dokter memeriksa Garbus & Tulamak dengan cara tidak wajar, Palui hanya tertawa)
(tidak lama masuklah staf rumah sakit bersama dua orang)
(suara di mic)
Staf : “jadi kaya ini pang pa ai keadaan rumah sakit kami”
Orang 1 : tapi pasien disini kadada nang kana penyakit itu kalu bu?
Staf : sejauh ini kadada pang lagi pa ai, tapi kada salahnya amun kita cegah badahulu ya kalo pa?
Orang 1 : bujur banar bu ai, karna mencegah lebih baik daripada mengobati
Staf : ayuha pa ai, habis nih kita masuk keruangan pasien
(staf dan dua orang masuk)
Staf : Assalamuallaikum, selamat sore… (terkejut) ai, kanapa nih? Baapaan buhan ikam? (kepada pasien)
Dokter gila : kami main dokter-dokteran bu ai hehee
Staf : astaga,,, (kepada Pasien) bajauhan buhan ikam, lakasi ka kamar masing-masing, mun kada kaina ku suntik, lajui !!
(pasien RSJ keluar)
Staf : (kepada Palui Cs) ni pang bapa-bapa nih baapa jua pian disini?
Garbus : kami lagi bapariksa bu ai
Staf : nahh,, tasalah mandatangi rumah sakit buhan pian nih pa ai..
Tulamak : Tapi jar kawan ulun disini nih gratis bu ai bila baubat
Staf : gratis ai mun pian hakun makan ubat urang gila
Garbus : Lui, kayapa ikam ni Lui, maka ikam bawa karumah sakit jiwa nih.
Palui : (kepada Staf) nah jadi kaya ini bu ai, ulun tuh handak manggawi buhannya nih banarai, sualnya dikampung kami tuh jauh lawan rumah sakit, puskesmas ja kadada lagi bu ai.
Staf : (kepada Garbus & Tulamak) nahh,, garing kanapa garang buhan pian nih?
Garbus : tulamak nih bu ai batisnya bangkak, sebelumnya inya nih garing panas, sama kaya ulun bu ai.
Staf : hadang hulu, buhan pian nih matan kampung mana?
Palui : Kampung Burinik Banyu bu ai.
Orang 1 : (terkejut dan bingung) Kampung Burinik Banyu? Uuhhh,, buhan pian badua nih iya lah nang mausir kami samalam?
Tulamak : ai Bus, nih mayau nang samalam tuh kalu?
Garbus : hiih, (meninggikan suaranya) maapa ikam kasini? Handak manabas kapala kami kah?
Orang 2 : hadang hulu, sabar,, (berusaha menjelaskan) pian kanapa jua mausir kami samalam tuh, kami nih lain mayau, kami nih datang ka kampung pian tuh handak sosialisai babagi ubat kaki gajah, barataan kampung sudah kami bagi, sisa kampung pian ja lagi, makanya am buhan pian kana kaki gajah nih. ni kami ka rumah sakit jiwa nih jua gasan babagi ubat jua gasan pasien nang ada disini.
Garbus : tapi kanapa buhan pian samalam mambawa karung? Kapala manusia kalu isinya tuh?
Orang 1 : nahh, nang dalam karung tuh isinya nyiur barian urang kampong subalah.
Garbus : ohh dintu kah pa?
Tulamak : nahh iya am.. Lui, kayapa nih kami, ni gara-gara ikam Lui ai mambawa habar mayau tuh, habis am kami kada kabagian ubat kaki gajah, ikam harus tanggung jawab Lui ai.
Palui : sabar buhannya,, (menjelaskan dengan cara merasa tidak enak) sabujurnya aku ada alasan kanapa aku bahabar kaya itu, samalam pas nang aku abut tuh bukah-bukah, aku tuh sabujurnya handak didatangi buhan karidit kandaraan, karna kandaraannya balum tabayari, jadi aku baulah habar tuh sakira aku aman bapatak dikampung, tapi aku kada tahu nang pacangan datang nih buhan Dinas Kesehatan babagi ubat.
Tulamak : Palui Paluii,,, ini ni ngarannya KAYA MANJUHUT RAMBUT DI GALAPUNG !!
SELESAI
