Ta'aruf (Japin Carita)

Naskah Teater Tradisi Japin Carita

TA’ARUF

Karya : Faisal Refki

05-10-2015

Tokoh Karakter :

Hadran

Uma Hadran

Abah Hadran

Madi

Utuh

Enor

Zubai

Guru

Mama Enor

Abah Enor

ABAH & MAMA HADRAN DALAM PANGGUNG

Abah Hadran            : umanya, aku handak bapandir satumat, panting !

Uma Hadran  : bapandi napa abahnya?

Abah Hadran            : jadi kaya ini umanya lah, aku batakun lawan ikam, ikam ada lah kapikiran handak manimang cucu?

Uma Hadran  : kapikiran banar abahnya ai, ulun supan abahnya ai saban kali dating ka kawinan anak kawan pasti ditakuni urang tarus “pabila jua Hadran kawin?”, ulun gin handak jua bapangantinan, kada aur basaruan haja tarus. Kawinakan ha lagi si Hadran tuh, umur tuha sudah masih haja kada karuan tampuh.

Abah Hadran            : makanya am umanya ai, ayuha amun kaya itu, kiyau akan Hadrannya, suruh kasini.

Uma Hadran  : (mangiyau Hadran) uuuhh Hadran, kasini pang satumat !!

HADRAN MASUK

Hadran           : puun, kanapa ma?

Uma Hadran  : tuh abahmu handak bapandir

Abah Hadran            : Hadran, tadi mama lawan abah sudah bapandiran masalah ikam nih.

Hadran           : ayy, masalah napa ulun bah?

Abah Hadran            : kami badua sudah sapakat handak mangawinakan ikam.

Hadran           : kawin kah bah? Balum siap lagi ulun bah ai, ulun masih kadada gawian, biniannya ja kadada lagi.

Abah Hadran            : mun masalah ikam bagawi atau kada tuh gampang haja, abah banyak haja baduit, jadi kada bataha kalaparan kaina ikam badua. Tapi amun masalah calon biniannya abah kada tahu, ikam handak abah cariakan atau mancari saurang?

Hadran           : amun kaya itu baik ulun mancari saurang haja bah ai.

Abah Hadran            : amun ikam mancari saurang, abah baisi syarat nang harus dipenuhi biniannya tuh.

Hadran           : napa syaratnya bah?

Abah Hadran            : syaratnya inya harus babinian, sholeh, bungas, baik hati wan kada sombong lawan mintuha. Sanggup haja kah?

Hadran           : uma bah, hakun haja kah binian nang kaya itu lawan ulun?

Abah Hadran            : pokonya abah kadam au tahu, abah bari waktu saminggu gasan ikam bacari, bila dapat langsung kawin, tuh undangan sudah abah ulahakan.

Hadran           : umaa bah, balum apaan sudah baulah undangan lah, biniannya haja kada tahu lagi siapa.

Abah Hadran            : tasarah abah ai, barang ai ngaran biniannya abah kosongi kah hulu. Dah gin, itu haja kahandak abah lawan mama, pokoknya ikam cari haja binianny yang sasuai jar abah tadih.

Hadran           : inggih bah ai, aija sudah ulun handak mancari nah. Assalamuallaikum.

Uma & Abah : Waallaikumussalam.

HADRAN KELUAR

Abah Hadran            : ayuha umanya ai, mun tapandir masalah kawin nih aku balaluan haja tabawa suasana, paham haja kalo ikam?

Uma Hadran  : inggih jar ulun, lakasih dah kita.

UMA & ABAH KELUAR

HADRAN MASUK

Hadran           : (gelisah, gundah gulana, manalipun) haloww,, buhan kam dimana? Kawa kah mandatangi aku di tampat biasa, aku handak bakisah, jui lah jangan lambat !!

MADI & UTUH MASUK

Madi & Utuh : Assalamuallaikum

Hadran           : Waallaikumussalam, capat jua lah buhan kam datang, ada habar napa tadih maka mandatangi aku?

Madi               : kada salah lah ikam ni Hadran? Ikam tadi manalipun kami handak bakisah jar, kisah napa garang?

Utuh               : hiih, pina nang mangalak ngalak nyuruh bacapat kanapa garang sanak?

Hadran           : jadi kaya ini nah kisahnya, aku nih bingung wan galau galaunya sanak ai.

Madi               : ayy,, bingung kanapa sanak, sini nah bakisah.

Hadran           : jadi kaya ini nah kisahnya, aku nih handak bakisah wan buhan ikam.

Utuh               : iih ayuha, lajui ha bakisah jangan pina maulah garigitan nah.

Hadran           : jadi kaya ini sanak ai, aku nih handak bakisah tantang kebingunganku ni nah, aku nih digasak kuitanku sudah nah.

Madi               : digasak apa sanak?

Hadran           : K A W I N !!!

Madi & Utuh : Barakallah

Utuh               : jadi pang apa nang ikam bingung akan sanak, nyamannya dah disuruh urang kawin.

Madi               : hiih, mun aku disuruh kawin capat ai dah..

Hadran           : tapi nang jadi masalah nih tahulah? Aku nih disuruh kuitanku mancari calon bini nang baik hati, sholeh, bungas, pokoknya istri idaman tu pang dah. Tapi aku nih sadar diri haja mun handak bini nang kaya itu. Mana ada binian nang hakun wan aku nih, kada sasuai wan kahandak jar urang tuh.

Utuh               : kada jua ah sanak ai, amun ikam hakun marubah kalakuan ikam insyaallah dapat haja bini nang kaya itu.

Madi               : iih, jangan kada ingat badoa wan bausaha.

ENOR & ZUBAI MASUK

Zubai              : umpat lalu ka lah..

Hadran CS     : inggih ding..

Hadran           : nah nah nah,,, tu nah tu nah tuuu,,,, nang kaya itu biniaan nang kuhandaki, sudah bungas, bakarudung ha pulang, malihatnya haja asa damai hati.

Madi               : nang mana sanak?

Hadran           : tu nang kawannya, nang dibalakang tadih.

Madi               : uhh itu kah, itu ngarannya Enor, mun nang managur kita tadi ngarannya Zubai, Zubai tuh aku patuh haja.

Hadran           : Enor kah ngarannya,, anu pang Madi, kanalakan pang aku wan inya tuh.

Madi               : bujuran kah ikam nih Hadran, hakun garang inya bakawan wan ikam.

Hadran           : ayuha, kada salahnya jua ah mun bausaha, ya kalo Utuh?

Utuh               : iya banar sanak ai.

Madi               : aija sudah, kasi kita datangi. (mandatangi Enor wan Zubai) uuu Zubai..

Zubai              : pun, napa ka?

Madi               : ni nah kawanku handak kenalan jar wan kawan ikam tuh?

Zubai              : oh iya kah, ayuha nah, bapandir ja langsung.

Hadran           : ehmm.. anu, anu ding ai,, anuu,,

Utuh               : kanapa Hadran ikam nih pina kipuh banar, bapandir sana bujur bujur.

Hadran           : anu, ngaran pian siapa ding?

Enor               : ngaran ulun Enor ka ai.

Hadran           : ngaran kaka Hadran ding ai, anak siapa pian?, rumah dimana?, sakulah dimana? No hp pian barapa? Handak kamana?

Enor               : aduh banyaknya pian nih tatakunan, kaina haja gin ulun manjawab ka ai, kami handak bacapat nah, mudahan kita tatamu lagi kah lah. Assalamuallaikum.

Hadran CS     : Waallaikumussalam..

ENOR & ZUBAI KELUAR

Hadran           : bahhh iya am dah, kada sawat am batakun,, ai hiih, ikam bakawan kalo Madi wan Zubai, kaina takuni akan lah sarabanya parihal Enor, padahi ja aku handak wan inya.

Madi               : tanang, kaina kutakuni akan, tapi makani hulu kami ni nah, ya kalo Tuh?

Utuh               : iya banar Madi ai, tampulu ikam himung Hadran ai, hahaa

Hadran           : waluh jua buhan ikam nih, aija sudah kita makanan, buhan ikam nih sahabat aku pang.

HADRAN, MADI & UTUH KELUAR

ENOR & ZUBAI MASUK

Enor               : Zubai, anu,, lakian tadi tuh kawan ikam kah?

Zubai              : nang mana? Madi kah?

Enor               : lain, nang handak kenalan wan aku tadi

Zubai              : lain, kada tahu jua aku wan inya tuh, kawannya Madi palingan, dilihat lihat lumayan jua pang Nor ai, cocok haja pang wan ikam.

Enor               : bujuran, bujuran cocok kah wan aku Bai, jangan badusta ha ikam nih Bai ai,,

Zubai              : ai ai ai,, kanapa jar ikam nih pina kakijilan, ham handak kah wan inya?

Enor               : handak tuh kada pang, tapi katuju haja wan inya tuh

Zubai              : misalnya inya handak jua pang wan ikam, hakun lah ikam jadi pacarnya?

Enor               : kada handak aku, aku disariki kuitanku bapacaran, kalo pina kanapa napa jar sidin, ingati nah Bai lah, mun inya handak wan aku, suruh taarufan ja wan aku.

Zubai              : bujur jua pang jar mama ikam tuh, kalo pina timbul fitnah mun bapacaran tuh, ikam tahu saurang kalo dikampung kita nih manusiannya taat taat baibadah, kada tapi kawa pina sambarangan.

Enor               : ya am Bai ai, anu… aku minta tolong boleh lah?

Zubai              : napa tuh Nor?

Enor               : kaya ini, ikam bakawan kalo wan Madi, Madi bakawan jua wan si Hadran tuh, jadi tolong ai kam cari tau parihal Hadran tuh kalawan Madi, kalo pang asa pas dihati, hehe

Zubai              : bahh tanang,, apa nang kada gasan ikam nih Nor ai.

Enor               : aija sudah, bila sudah dapat infonya habari aku lah.

Zubai              : sip, eh anu, isuk kam ka pangajian guru Zuhdi lah di mesjid Jami?

Enor               : iih kasana ai isuk, kam pang?

Zubai              : tulak aku, baimbaian kita lah, kaina ku ambili ikam

Enor               : aija, lakasi dah kita bulikan.

ENOR & ZUBAI KELUAR

MADI & UTUH MASUK

Madi               : halow.. Hadran dimana ikam, lajui datangi ka gardu, penting !!!

HADRAN MASUK

Hadran           : Assalamuallaikum

Madi & Utuh : Waallaikumussalam

Hadran           : napa Madi pina manggasak nyuruh aku bacapat mandatangi, ada habar napa tadih?

Madi               : jadi kaya ini Hadran ai, samalam ikam minta cari akan info si Enor wadah Zubai kalo?

Hadran           : imbah tu pang kayapa? Dapat lah?

Madi               : jadi ada dua habar nang ku bawa nih, handak habar baik kah atau habar buruk?

Hadran           : bah iya pang, habar baikanya haja gin hulu nah.

Madi               : sabalum aku mamadahi habar baiknya, aku handak manyampaiakan hulu tentang si Enor nih, jadi si Enor nih bangaran  Norjanah, mamanya Saidah, abahnya Hanafi, abahnya badagang di pasar bajual pacerekenan, mamanya ibu rumah tangga, Enor nih anak tunggal, inya lulusan pesantren Rakha. Wan jua aku mandangar inya nih kada suah pacaran jar.

Hadran           : sip sip sip,, lalu pang habar baiknya apa tadih?

Madi               : habar baiknya biar Utuh ja nang manyampaiakan sakira ada jua bapandir.

Utuh               : habar baiknya tuh Hadran ai inya katuju jua wan ikam, ikam tahu lah, inya minta tolong wan Zubai manakuni Madi parihal ikam, kaya ikam jua tuh mancari tahu wan inya.

Hadran           : ay iya kah, bahh.. pacang bajadian jua ai nah aku wan inya nih. Alhamdulillah

Madi               : tapi ikam jangan himung hulu Hadran ai, masih ada habar buruknya.

Hadran           : apa tadih habar buruknya sanak.

Madi               : padahakan Tuh.

Utuh               : habar buruknya sanak ai, inya kada handak pacaran wan ikam.

Hadran           : ayy.. maka jar inya katuju wan aku, tapi kada handak pacaran, kayapa kisahnya?

Madi               : maksudnya kaya ini sanak ai, inya tuh disariki kuitannya bapacaran kalo pina kanapa napa jar, jadi misalkan ikam sudah mantap wan inya silahkan taarufan wan inya.

Hadran           : bah iya pang. Kayapa pulang taarufan tuh, kada mangarti aku

Madi               : gampang, kaina kita malam ini ka mesjid Jami mandatangi pangajian guru Zuhdi, salajur ai batatakun masalah taaruf wan sidin. Dangar dangar buhan Zubai wan Enor rutin kasana tarus jar tiap minggu, siapa tahu ikam tatamu inya disana, kayapa?

Hadran           : akur, malam ini kita kasana. Aija sudah kita bulikan basiap siap.

HADRAN, MADI & UTUH KELUAR

ENOR, ZUBAI & GURU MASUK

Guru               : Assalamuallaikum Wr. Wb

All                   : Waallaikumussalam Wr. Wb

Guru               : nah nah nah, kanapa nih maka saini haja umatnya? Maka babinian baratan, kamanaan nang lain nih?

Zubai              : palingan buhannya malam mingguan guru ai.

Guru               : bah iya pang, kada katuju lagi pinanya kakanakan wayahini ka pangajian lah. Ayuha sudah amun kaya itu nang ada-ada ni ai nah nang dilajari.

HADRAN CS MASUK

Hadran CS     : Assalamuallaikum

All                   : Waallaikumussalam

Guru               : alhamdulillah batambah umatnya, buhan ikam kada handak minta sumbangan pamadam kalo?

Madi               : kada guru ai, kami handak umpat pangajian pian.

Guru               : Alhamdulillah, ayuha amun kaya itu, silahkan duduk. Kita mulai ai lah matan awal. Bismillahirahmannirrahim. aku handak batakun dahulu wan buhan ikam barataan, diantara buhan ikam nih ada kah sudah nang kawin?

All                   : kadada...

Guru               : nang baisian pacar pang ada lah jua?

All                   : kadada...

Utuh               : tapi nang digasak kuitannya kawin ada pang Guru ai..

Guru               : siapa nang handak kawin?

Madi               : tuh si Hadran Guru ai, tapi kadada cintanya lagi.

Guru               : bagus haja mun disuruh kawin daripada bapacaran nang kada karuan. Sabujurnya pacaran dalam islam tuh ada atau kadada?

Zubai              : satahu ulun kadada pang Guru ai.

Guru               : kanapa kira kira jadi kadada yu?

Zubai              : karena mun bapacaran tuh kalo pina timbul fitnah Guru ai.

Guru               : nah bujur banar, jadi pacaran tuh pintu jalan masuknya zina, awalnya balilihatan, mbah tuh ada hasrat handak jalan badua, lalu ai handak badua duaan di padang sunyi, bajapaian tangan, imbah tuh baciuman, imbahnya sebagai pembuktian cinta ulun ka pian jar lalu ai hakun bazina, naudzu billahi min dzalik..

Hadran           : imbah tu pang guru, ada lah pacaran yang secara islami? Misalnya pacaran tapi kada baduaan, kada bajapaian, kada bazina kytu Guru ai.

Guru               : istilah pacaran islami tuh kadada, ibarat kalimat “mandi boleh, asal kada basah”, itu sama jua artinya minum minuman secara islami, berjudi secara islami, ada lah nang kaya itu? Kadada kalo?

Madi               : imbah tu pang misalnya kita handak kawin, kita handak tahu wan calon bini kita tuh kayapa Guru?

Guru               : oleh karena itu, islam tuh sudah membari solusi gasan kita, yaitu pakai cara taaruf, taaruf dalam mencari pasangan hidup, atau sekedar mengenal bakal calon pasangan kita, tapi tanpa adanya ikatan apa apa.

Hadran           : caranya pang kayapa Guru?

Guru               : jadi proses taaruf tuh, pas kita handak taaruf kita tuh boleh batakun wan pasangan secara mendetail, nang kaya penyakit, kebiasaan buruk wan baik, sislsilah keluarganya, pendidikan wan sebagainya. Tapi kedua belah pihak harus jujur kada boleh badusta, mun badusta bisa baakibat fatal bila sudah jadi sepasang suami istri kaina. Habis tuh kada boleh dilakukan cuma badua haja mun batamu, harus ada nang mendampingi yaitu wali atau keluarganya, jadi taaruf tuh lain bermesraan berdua, tapi lebih ke arah pamandiran nang bersifat realistis gasan mempersiapkan sebuah perjalanan panjang berdua kaina.

Madi               : tapi mun misalnya kada jadi pang kayapa tuh Guru?

Guru               : kada papa, dalam taaruf tidak ada yang merasa tersakiti hatinya, oleh karena itu kita kada boleh menyatakan perasaan cinta wan pasangan sebelum menikah. Karna dalam taaruf adalah mencintai karena Allah.

Hadran           : misalkan sudah sama sama rasuk baarti tinggal baatur tanggal nikahnya ai lagi lah Guru?

Guru               : amun sudah marasa cocok, sebaiknya dilanjutkan ke arah pernikahan, asalkan dengan restu kedua orang tua, tapi jangan kada ingat jua istiqharah, minta petunjuk wan Allah, bila sudah mantap silahkan dilanjutkan.

All                   : ohh,, kaya itu kah sakalinya.

Guru               : ada lagi kah tatakunan? Mun kadada kita akhiri ai pertemuan malam ini.

All                   : kadada Guru,,

Guru               : aija mun kaya itu ku akhiri ai lah, salah khilaf mohon maaf Assalamuallaikum.

All                   : Waallaikumussalam..

GURU KELUAR

Utuh               : nah Hadran, paham haja kalo sudah wan taaruf?

Hadran           : iih paham haja sudah aku, baarti aku nih harus datang karumahnya dengan maksud handak kenal haja wan inya, ya kalo Madi.

Madi               : nah sip tu, tinggal ikam ja lagi nang bapadah wan kuitan ikam bahwa ikam handak batamu wan si Enor ka rumahnya. Tapi, ikam sudah bapadah lah wan Enornya.

Hadran           : balum pang lagi aku nih bapadah wan inya.

Madi               : ai dilajui dah, tampulu inya balum bulik.

Hadran           : kawani aku nah bapadahnya. (mandatangi Enor) ding Enor, kaka kawa lah baelang k rumah pian.

Enor               : handak meapa pian karumah ulun?

Hadran           : kaka handak bakanalan wan ikam ding ai, handak taaruf wan ikam.

Enor               : oh iya kah ka, boleh haja ka ai, asal pian datang wan kuitan pian.

Hadran           : Tapi rumah pian dimana ding?

Enor               : rumah ulun di gang Juragan Kusin, rumahnya kada bapagar tapi pakai kandang warna magenta.

Hadran           : ohh tahu haja insyallah, insyaallah isuk kaka kasana imbah sumbahyang jumahat.

Enor               : inggih ka ai, ulun bulik hulu lah, Assalamuallaikum

Hadran           : Waallaikumussalam.

ENOR & ZUBAI KELUAR

Utuh               : kayapa jar Hadran, hakun lah?

Hadran           : hakun ai, isuk aku karumahnya, doakan sanak lah.

Madi               : tanang pasti kami doakan, mudahan baik haja.

Hadran           : amin, makasih sanak. Aija dah kita bulikan ha jua nah.

HADRAN CS KELUAR

KELUARGA ENOR MASUK

Mama Enor   : mana inya nih Nor lawasnya kada datang, mama handak auran nah.

Abah Enor     : asa kada prcaya pang aku nah inya wani datang karumah nih.

Enor               : hadang ma ai, bah ai, palingan inya lagi dijalan nih.

KELUARGA HADRAN MASUK

Hadran           : Assalamuallaikum.

Enor               : waallaikumussalam, ma bah, ni si Hadrannya datang sudah.

Mama Enor   : kaluari abahnya.

Abah Enor     : (mangaluari) eh,, pian kah Pambakal, jadi anak pian kah si Hadran nih?

Abah Hadran            : iih Hanafi ai, Hadran nih anakku, ku kira anak siapa kah jua si Enor nih, sakalinya anak ikam kah, bah mun papadaan nih nyaman ai dah kisahnya.

Abah Enor     : hahaa,, kita dudukan dahulu nah, kada nyaman bapandiran mun badiri kayaini.

Abah Hadran            : ayu ai mun kaya itu, langsung haja gin lah, maksud kadatangan kami karumah ikam nih kada lain wan kada bukan handak manamu anak kami ni pang nah wan anak ikam, biar bakatahuan kah jar urang tuh. Iya lah Hadran?

Hadran           : inggih bah ai, jadi ulun nih handak batatakun wan handak tahu wan anak pian si Enor nih, tapi kami kadada pacaran lagi, amun kami batamuan baduaan haja kaina timbul fitnah paman ai, ulun samalam ada mandangar caramah guru Zuhd, jar sidin pacaran di islam tuh kadada, mun handak taaruf haja jar sidin. Makanya ulun handak bataarufan wan si Enor nih.

Abah Enor     : uhh kaya itu kah, bujuran kah napa jar Hadran nih nor?

Enor               : inggih bah ai, jar pian ulun nih kada boleh pacaran, langsung kawin haja jar pian, si  Hadran nih pinanya handak mamaraki ulun, tapi ulun kada handak, jadi jar ulun mun handak wan ulun silahkan taaruf ja wan ulun.

Abah Enor     : aija sudah, sabujurnya aku nih Hadran ai bakawan banar wan abah ikam nih, aku tahu kaluarga ikam nih urang baik baik. Mun niat ikam dasar handak taaruf wan si Enor aku mandukung haja, iya kalo umanaya?

Mama Enor   : hiih, maklum haja pang si Enor nih anak kami saikungannya, makanya kada kami bariakan pacaran, ku lihat si Enor nih sadang pang sudah dikawin akan. Mun handak kita takuni wan anak anak kita ni ai Pambakal ai, hakun lah buhannya.

Abah Hadran            : kayapa Hadran? Asa sasuai haja kah sudah wan kahandak?

Hadran           : inggih insyaallah sasuai haja sudah bah ai.

Abah Enor     : ikam pang kayapa Nor, sasuai haja kah jua?

Enor               : inggih bah ai, malam tadi ulun sudah sambahyang istiqharah, Alhamdulillah sudah dapat jawabannya, tambah lagi pian sudah tahu wan asal usul kaluarga si Hadran nih.

Uma Hadran  : Alhamdulillah, mun kaya itu tinggal kita lanjutkan ja lagi ka tahapan selanjutnya.  Kayapa Hadran siap haja kah?

Hadran           : inggih, insyallah sudah siap lahir bathin ma ai.

Mama Enor   : aija dah tu, mun sudah siap barataan kita tinggal baatur tanggalnya ja lagi.

Abah Hadran            : jadi dilihat dari kedua belah pihak sudah satuju. Artinya sudah yakin haja badudua handak melanjutkan ketahap selanjutnya yakni menikah. Restu kuitan sudah didapat. Maka sabagai kuitan kita mempersiapkan sagalanya. 

All                   : Alhamdulillah !!!

SELESAI

Hai Pujangga

hai pujangga, bolehkan aku menjadimu
atau mencoba menjadimu
atau hanya penikmatmu
andai kita hidup di masa yang sama
tentu kita menjadi yang sama
hai si burung merak
kau sudah terbang tinggi
jauh jauh jauh sekali
melampaui pikiranku akan pujangga
hai si ceking dan sedikit cadel
terlalu kamu jauh
tak tau arah mencarimu
mencoba menjadi pujangga seperti pujangga
pujangga yang yang hanya diam
diam berkicau tak terbang
andai kita hidup di masa yang sama
terbanglah kita bersama
jauh jauh jauh sekali
bukan hanya jadi diam berkicau
berkicau tak terbang

Sepertiga Malam

malam ini, atau bahkan subuh ini
deretan meja panjang menjadi pangkuan
sumber angin menggeleng geleng menggodaku
ada dua matahari atau bulan diatasku
layar putih menyilaukan pikiranku
di arah jarum jam sebelas mengoceh tak karuan

apa yang kulakukan disini

duduk diam atau hanya jalan jalan di otak

sepertiga malam dibulan suci

mencari inspirasi yang tak kemana

deretan hurup terhampar didepan ujung jemari

dengan kaku dan perlahan merangkai

sayup-sayup terdengar desahan udara berwujud angin
yang mengoceh terus mengoceh
dua matahari dan bulan terus mengintai
layar putih mulai terisi
berkat hamparan huruf di ujung jemari
inilah wujud dari sepertiga malam

Ku Mu

Ku Mu

Seketika lengahku menjadi anehku
Tatkala harimaumu melumat harimauku
Buaya kita bertemu buaya
Ku mengayu dan Mu bersiput
Kujamah bebanmu kau jamah bebanku
Kujamah putihmu kau jamah coklatku
Rebah diatas rambut ungu seribu
Memutar arah utara ke selatan
Barat ke timur halang melintang
Harimaumu melahap coklatku
Harimauku mencicip siput berlendir
Lama lama lama lama...
Merah hangat nan sejuk
Buayamu menggigit daun
Buayaku bergerilya menuju putihmu
Ku dan Mu sudah saling menanti
Berharap akan terjadi
Sutraku dan sutramu terbang tak tau arah
Ku mencari Mu, Mu mencari Ku
Maling ini membantu Ku bertemu Mu
Ku diapit oleh goa lembab tak bergerigi
Bergerigi namun seperti siput
Utara ke selatan, barat ke timur
Lama lama lama lama..
Ku pun luncurkan luncurnya
Mu pun luncurkan luncurnya
Bertemulah Ku dan Mu di seberang surga

Iya Kandang Iya Babi (Japin Carita)

Naskah Teater Tradisi Japin Carita

IYA KANDANG, IYA BABI

Karya : Faisal Refki

04-02-2015

Tokoh Karakter :

Maidi

Sanah

Baiti

Pambakal

Bini Pambakal

Hanapi

Madi

Juki

MAIDI, SANAH & BAITI DALAM PANGGUNG
Maidi               : kayapa Baiti, siap haja kalo ikam kami tinggalakan tulak bagawi satahun nih?
Sanah              : kami nih handak mambawa ikam nih Baiti ai katiya sayangnya sakulah ikam, maka ikam nih handak lulus SMA sudah.
Baiti                : inggih bah ai ma ai, Insyaallah ulun siap haja surangan di kampung nih, banyak haja kakawanan ulun, amunnya ulun umpat kalo pina mangalihi buhan pian pulang kaina.
Maidi               : ikam jangan takutan nak ai, abah sudah bapadah wan Pambakal parihal abah wan mama nih handak manitip akan ikam wan Pambakal Haimi, sidin hakun haja manjagai akan ikam saapaan abah wan mama tulak bagawi, ikam nya pang kayapa nak?
Baiti                : amun bujur nang kaya itu ulun hakun haja bah ai, wan jua disini nih kita kadada baisi kaluarga, mudahan ai Pambakal baik haja wan ulun bah ai.
Sanah              : insyaallah sidin tuh baik haja nak ai, asal ikam nya ja nang bisa-bisa mambawa diri kawadah urang.
Maidi               : aija sudah mun ikam hakun tuh, satumat lagi sidin handak maambili ikam karumah salajur maantar abah wan mama tulak.
PAMBAKAL MASUK
Pambakal        : Assalamuallaikum
Semua             : Waallaikumsalam.
Maidi               : nah Alhamdulillah datang jua Pambakal, langsung haja nah Pambakal ai, ulun minta tolong umpat manitip akan anak ulun nang saikungnnya nih lawan pian, soalnya inya nih surangan di kampung nih kadada kaluarga, wan jua inya nih parak lulus sudah sakulah jadi ngalih maurusi, wan jua kami nih kada kawa lagi bayar kontrakan rumah nih makanya kami tulak bagawi, lamunnya pian hakun manarima, tolong jaga akan inya nih saapaan kami tulak bagawi nih.
Pambakal        : aku tarima Maidi ai, urang rumah sudah kupadahi jua tadih bahwa anak ikam nih pacangan dititip akan wan aku, anak wan biniku hakun haja manjagai akan Maidi ai, tanang haja ikam.
Maidi               : Alhamdulillah, ayuha mun kaya itu Pambakal ai, Baiti ulun titip akan wan pian, alun wan bini ulun handak tulak, kasian urang lawas dah mahadangi.
Pambakal        : ayuha, anak ikam aku bawa ai lah, sini nah ku antarakan kamuka.
Sanah              : nak, baik baik ikam saapaan kami tinggalakan lah, jangan bakalakauan nang manyupani kuwitan, mama wan abah kaina bulik ai pulang, abah wan mama satumat haja nak ai maninggalakan.
Baiti                : inggih ma ai, mudahan pian barazaki haja disana, mun kawa mahabari, habari ulun ma lah.
Maidi               : aija sudah, lajui dah kita tulakan.
SEMUA KELUAR
PAMBAKAL, BINI AMBAKAL & BAITI DIDALAM PANGGUNG
Pambakal        : baiti, anggap haja rumah nih kaya rumah ikam saurang lah, jangan aasaan, mun handak napa haja ambil haja kada usah bapadahan gin anggap rumah saurang tu pang dah.
Bini pambakal : hiih Baiti ai, anggap ja kami nih kuwitan ikam saurang, bila apa-apa bapadah haja, jangan basupanan.
Baiti                : inggih Pambakal ai, tarimakasih banar pian hakun manggaduh ulun.
HANAPI MASUK
Hanapi            : Assalamuallaikum
Semua             : Waallaikumsalam
Hanapi             : ayy,, siapa ini ma bah? Bungas banar, hhee.
Pambakal        : ini anak Maidi nak ai, tatangga kita, sidin tuh tulak bagawi kaluar kota wan mamanya nih, makanya sidin manitip akan anak sidin wan abah nak ai.
Hanapi            : oh kaya itu kah bah, siapa ngarannya bah?
Baiti                : Baiti ka ai ngaran ulun, hehe (supan)
Hanapi             : ohh Baiti kah, kada sasuai wan muhanya, bungas muhanya daripada ngarannya, hehee, bagaya ja Baiti ai. Aija dah ulun handak kakamar dahulu bah lah ma lah, dahh Baiti,, (mangijipi mata)
HANAPI KELUAR
Bini pambakal : aija sudah nak ai, sanja dah harinya nah, mandi ja hulu ikam habis tuh istirahat, isuk sakulah kalo?
Baiti                : inggih bini Pambalak ai.
SEMUA KELUAR
MADI & JUKI DIDALAM PANGGUNG
Madi                : Juk, dimana jua kah sanak kita nang saikung nih lah? Bajanji habis bada, ni parak maghrib dah kada sing cungulan ja lagi
Juki                 : ikam nih Madi ai kaya kada tahu wan Hanapi ja lagi, inya tuh maingkut teguh budaya banjar yaitu janji jam 2 datangnya jam 4, hahaaa..
HANAPI MASUK
Hanapi            ; woyy sanak sanak ku, lawas kah mahadang?
Madi                ; lihati Juk muhanya nang kaya kada basalah tuh.
Juki                 : ya am Madi ai, urang banjar kalo..
Madi                : kamana haja ikam nih hanapi lawasnya kami mahadangi, napa garang nang digawi?
Hanapi            : maaf sanak lah, kam handak tahu lah aku tadi imbah maapa? Aku tadih imbah maintip binian mandi dirumahku
Juki                 : Astaghfirullah,, durhaka ikam nih hanapi ai, kalo pina batimbil mata maintip kuwitan mandi, ckkckc..
Hanapi            : laiiinnn,,, lain mamaku nang ku intip
Madi                : imbah pang siapa lagi mun kada mama ikam, mama ikam ja kalo biniannya nang ada dirumah kam tuh?
Hanapi            : lain sanak ai, ngarannya Baiti, liwar langkar sanak ai barangnya, beehhh..
Juki                 : mboahh,, siapa pulang ngintu sanak?
Hanapi            : tahu jua abahku dapat dimana kah, ada tetangga jar nang manitip akan anak sidin tuh wan abahku, jadi inya bagana dirumahku wayahini, buuungggaaaassss banarrr sanak ai heh, handak ku pacari ha kaina inya tuh nah, nyata kawa nang ehmm ehmm (memperagakan),, hahaa..
Madi                : astaga Hanapi bin Haimi, baingat sanak ai, tu anak urang nang dititip akan wan abah ikam, jangan ikam apa apai, julung wan aku ja, hahaaa..
Juki                 : hiih Hanapi ai, mun ikam pina dulak julung ja wan aku, hahaha..
BAITI MASUK
Hanapi            : tuh tuh tuh,, tuh urangnya, hanyar disambat datang dah urangnya, kayapa sanak bungas kalo?
Madi & juki     : (tanganga kada sing kidipan malihan baiti)
Baiti                : ka Hanapi, pian dicarii abah pian disuruh bulik wayahini.
Hanapi            : (Hanapi manggawil Madi & Juki tapi kada dihirani)
Hanapi            : inggih ding, hadang ni handak bulik, baimbai lah.
(Madi & Juki masih tanganga sampai saling menatap lalu sadar)
HANAPI & BAITI KELUAR
Juki                 : Madi, bidadari turun matan kayangan
Madi                : hiih Juki ai, asa kada badaya aku malihat.
Juki                 : kita bulikan kah Madi, aku handak ka jamban nah.
Madi                : hiih, aku gin handak ka jamban jua.
MADI & JUKI KELUAR
BAITI DIDALAM PANGGUNG
Baiti                : ma, bah, ulun kaganangan banar lawan pian, kanapa pian kada mambari kabar lawan ulun, satangah tahun sudah pian tulak maninggalakan ulun, banyak banar nang handak ulun kisahakan lawan pian ma ai, bah ai. Mudahan pian baik-baik haja disana, ulun kaganang pian ma ai, bah ai.
HANAPI MASUK
Hanapi             : ding, kanapa ikam manangis, bakisah pang lawan kaka
Baiti                : kada papa ka ai, ulun kaganangan lawan kuitan ulun haja.
Hanapi             : kada mungkin ding ai ikam manangis banar kaya ini mun kaganangan lawan kuitan, lakasi nah bakisah lawan kaka.
Baiti                : ulun… ulun… ulun batianan ka ai
PAMBAKAL & BINI PAMBAKAL MASUK
Bini Pambakal : nahh… kanapa ikam nak maka manangis. Hanapi, kanapa nih Baiti manangis?
Baiti                : (masih manangis kada kawa bapandir)
Bini Pambakal : bakisah haja nak ai lawan mama, kanapa garang? Kaganangan lawan kuitan ikam kah?
Baiti                : ulun… ulun… ulun batianan…
Bini Pambakal : Astaghfirullah.. kanapa maka sampai kaya ini nak.
MAIDI & SANAH MASUK
M & S              : Assalamuallaikum
Semua             : Waallaikumussalam
Baiti                : (bukah maragap mamanya)
Sanah              : umay nak, kaganang banar kah lawan mama maka sampai manangis banar kaya ini?
Maidi               : Baiti, kanapa maka pina nangis banar? Ikam kada kanapa napa kalo nak? Abah tahu anak abah kada suah nang kaya ini. Kanapa ikam nak? (kepada bini Pambakal) Bini Pambakal, kanapa nih maka pina lain barataan muha, kanapa garang?
Bini Pambakal : anu Maidi ai, Baiti nih nangis lain marga buhan pian datang atawa kaganangan banar, tapi…
Sanah              : tapi kanapa bini Pambakal?
Bini Pambakal : aku minta maaf banar lawan ikam nah, minta rela dunia akhirat Maidi ai.
Maidi               : iya kanapa garang nih?
Bini Pambakal : anak ikam batianan maidi ai
Maidi               : Astaghfirullah, kanapa maka sampai bakajadian nang kaya ini Pambakal? Siapa urangnya? (Kepada Baiti) nak, bapadah haja lawan abah nak ai, siapa nang wani maudak ikam?
Baiti                : (malihati pambakal lawan Hanapi) Hanapi bah ai..
Maidi               : Hanapi, wani waninya ikam maudak anakku, aku nih tuhuk mangganalakan inya, ikam maka nyaman banar marusak anakku, dasar kakanak kada tahu dibasa (manampar hanapi)
Pambakal        : sabar Maidi, sabar.. aku sabagai kuitannya Hanapi maminta maaf banar lawan ikam atas kalakuan anakku. Aku janji Maidi ai, kami pasti batanggung jawab.
Maidi               : nyaman ai pian bapandir kaya itu Pambakal ai, ulun sudah parcaya lawan kaluarga pian, ulun sudah maamanahi anak ulun dititip lawan kaluarga pian, tapi sakalinya buhan pian kada bisa manjaga amanah ngintu, pian dibari amanah, pian jua nang mahantupnya, ngini ngarannya IYA KANDANG IYA BABI.

SELESAI