Imam (Japin Carita)

Naskah Teater Tradisi Japin Carita

IMAM

Karya : Faisal Refki

11/06/2016

Tokoh Karakter :

Imam

Diyah

Hadran

Mama

Abah

BABAK I

ABAH & MAMA MASUK

Abah   :           umanya, umur ikam barapa dah wayahini

Mama :           ay, kanapa maka pian manakuni umur ulun abahnya

Abah   :           kada papa ai, handak tahu banarai kalo ai masih kawa baulah anak

Mama :           bah jua abahnya nih, kasian jangan lagi abahnya ai, saikung haja gin cukup, umur ulun nih sudah kapala 5 abahnya ai

Abah   :           nah aku handak batakun wan ikam umanya lah

Mama :           batakun napa tadih abahnya?

Abah :            di umur ikam nang sudah kapala 5 nih, ikam adalah suah kapikiran handak jadi nini? Atau manimang cucu?

Mama :           handak banar abahnya ai, makany am anak kita tuh sadang sudah dikawinakan abahnya ai

Abah :            sama baarti kita, anak kita tuh sudah lulus kuliah, bungas, alim ha pulang, iya tu kada payu-payu jua lagi

Mama :           hadang abahnya lah, anak kita tuh payu haja sabujurannya, tapi sadarlah abahnya?

Abah   :           sadar kanapa umanya? Ada salah kah aku?

Mama :           pian sadarlah kada mambolehi anak kita tuh bapacaran, kaya apa handak payu inya

Abah :            nah ikam nih, aku kada mambolehi inya pacaran karena dalam islam kadada istilah pacaran tuh, nang ada taaruf haja langsung kawin

Mama :           bujur jar pian tuh abahnya ai, tai kaya ini nah abahnya, pinanya anak kita tuh ada baisian pacar pang sudah

Abah :            ay.. bujur-bujur ikam umanya, dimana ikam dapat habar?

Mama :           ulun rancak mandangar inya tuh bahapian dikamar pakai saying-sayang cinta-cinta, mami papi kaya itu nah abahnya ai

Abah :            ay bujuran kah? Napa maka kamimiyangan kaya itu, sadang dah dikawinakan, umanya, kiyau pang anak kita, suruh bahadap kasini

Mama :           hadang bah lah, (mangiyau anak) nak, kasini hulu satumat, abah handak bapandir

DIYAH MASUK

Diyah :            pun.. kanapa ma mangiyau ulun

Mama :           ni nah ada nang handak abah takunakan wan ikam

Diyah :            handak batakun nap apian bah?

Abah :                        nak, ikam miyang kah nak?

Diyah :            astaga, kanapa pian batakun kayaitu bah?

Abah :            kaya ini nah nak lah, ikam tahu lah dalam islam tuh kada boleh badusta wan kuitan?

Diyah :            inggih tahu ai ulun bah ai

Abah :            ikam tahu lah jua bahwa dalam islam tuh kada istilah pacaran?

Diyah :            inggih tahu bah ai

Abah :            nah jadi kaya ini nak lah, ikam jujur ja wan abah mama, ikam ada baisi pacar kah?

Diyah :            inggih ada bah ai

Abah :            astaghfirullah… maka ikam tahu nah bahwa dalam islam kada boleh pacaran, kanapa ikam pacaran?

Diyah :            tapi bah….

Abah :            sudah gin, abah lihat ikam nih cukup haja sudah umur, handaklah kawin nak?

Diyah :            lawan pacar ulun kah bah? Hakun banar bah ai

Abah :            pacar pacar !! abah handak malihat hulu kayapa garang barangnya, amun asa pantas haja abah kawinakan, amun inya wani suruh bahadap wan abah, suruh badatang.

Diyah :            Uma bah,, pian nih saini saitu, basasabar bah.

Abah :            pokoknya abah kada tahu, suruh badatang inya. Aija sudah, lakasi umanya kita guringan.

ABAH & MAMA KELUAR

Diyah :            (menelpon Imam) Assalamuallaikum, yang, pian hakun lah jadi laki ulun? Amun pian hakun, tadi abah manyuruh pian badatang, amun pian saying wan ulun pian pasti wani badatang wan kuitan ulun, amun pian kada dating ulun dikawinakan abah wan lakian lain kaina, hakun ai kalo yang, aija sudah yang ai lun handak guring hulu nah, assalamuallaikum.

DIYAH KELUAR

BABAK II

IMAM & HADRAN MASUK

Imam :            sanak, kulihat ikam nih gawian tiap hari bagana di mesjid tarus, ikam nih lain kaum kalo?

Hadran :         lain sanak ai, lain kaum, salahkah bilanya aku di mesjid tarus.

Imam :            kada pang, kulihat lah ikam nih urangnya gagah, alim ha pulang, tapi kadada baisi pacar, kayapa ikam nih sakit lalu barangnya

Hadran :         kadanya kaya itu pang sanak ai, aku dasar kada handak pacaran, dalam islam kadada istilah pacaran, adanya taaruf haja

Imam :            bah bahasa ikam kaya ustad ja lagi

Hadran :         amin ya Allah..

Imam :            oh hiih.. ada nang handak ku kisahakan wan ikam

Hadran :         kisah napa tadih?

Imam :            kaya ini nah, aku ni kam disuruh kuitan pacarku badatang, aku nih bingung nah harus kaya apa

Hadran :         ai untungnya, baarti tu lampu hijau gasan ikam, siap siap kawin ai lagi ikam sanak ai

Imam :            kadanya kaya itu pang, aku nih kada siap lagi, masih handak baramian, duit ja aku kadada, handak kumakani napa kaina anak biniku

Hadran :         baramian ha diarak, umur tuha sudah, amun masalah razaki tu ikam kada usah takutan, ada haja tuhan, dangari lah, jar Allah “dan nikahkanlah orang-orang yang masih membujang diantara kamu, dan juga orang-orang yang layak (menikah) dari hamba-hamba sahayamu yang laki-laki dan perempuan. Jika mereka miskin, Allah akan memberikan kemampuan kepada mereka dengan karunia-Nya. Dan Allah maha luas (pemberian-Nya) lagi maha mengetahui” (QS. An-Nur [24] : 32). Jadi ikam jangan takutan kawin sanak ai, ada haja razakinya.

Imam :            iyalah sanak, mun kaya itu doakan haja aku lah, isuk aku handak badatang wadah Diyah, mudahan lancer haja.

Hadran :         amin…

Imam :            aija sudah, sadang kita bulikan

IMAM & HADRAN KELUAR

BABAK III

MAMA, ABAH & DIYAH MASUK

Abah :            diyah, sudah ikam padahi lah wan pacar ikam apa jar abah samalam?

Diyah :            inggih sudah bah ai, hari ini inya handak badatang jar

Abah :            bagus am mun kaya itu, abah handak malihat urangnya hulu

IMAM MASUK

Imam :            (masuk tanpa salam) paman, acil (salim)

Mama :           duduk hula nak lah, acil handak maulahakan banyu

Imam :            kada usah cil ai

Abah :            hiih kada usah diulahakan banyu, ey,, ikam muslim kah kada?

Imam :            muslim paman ai

Abah :            ikam muslim kanapa masuk tadi kada baucap salam. Diyah, ini kah jar ikam pacar ikam tuh?

Diyah :            inggih bah ai

Abah :            hakunnya ikam wan inya nih. (mamandiri Imam) eyy,, siapa ngaran ikam maka wani mamacari anak ku?

Imam :            ngaran ulun Imam paman ai

Abah :            imam, ngaran ikam Imam kanapa maka babunil-bunil tuh, ikam nih lakian kah binian?

Imam :            ulun lakian paman ai

Abah :            manjawab tarus nginih, ngaran ikam Imam kalo? Ikam bias jadi Imam lah?

Imam :            maaf ulun kada bias

Abah :            astaga, bias mangaji lah?

Imam :            kada tapi bias paman ai

Abah :            sumbahnyang pang bias lah?

Imam :            bias ai paman ai sadikit sadikit

Abah :            gawian ikam napa nih maka wani badatang wan anakku?

Imam :            ulun kada baisian gawian lagi paman ai

Abah :            ikam nih kada baisi gawian, apa-apa kada bias, handak jadi minantu ku lah kaya itu, kada bataha ku hakun. (mamandiri Diyah) ey diyah, abah kada satuju mun ikam kawin wan inya nih, handak jadi napa kaina ikam mun hidup wan inya. Suruh inya bulik !!

Imam :            inggih, ulun bulik hulu paman lah, cil lah, Diyah lah.

(Imam handak bulik didatangi Diyah wan Mamanya)

Diyah :            yang, maaf yang lah, abah tu dasar karas urangnya, pian hakun ai kalo barubag gasan ulum yang, bila pian sudah jadi baik lajui badatang pulang yang lah

Mama :           nak, sabar nak lah, ayuha nak ai mudahan juduh haja buhan ikam nah ai.

Imam :            inggih ayuja, mun kaya itu ulun bulik hulu cil lah, assalamuallaikum

Mama & Diyah : waallaikumsalam

IMAM KELUAR

Diyah :            bah.. pian nih talalu banar baucap kaya itu, talalu !!

DIYAH KELUAR

Abah :            biarja situ, aku kada paduli, bilanya aku kada katuju ya kada tu pang dah.

Mama :           aija sudah, sdang dah abahnya ai istirahat

MAMA & ABAH KELUAR

BABAK IV

IMAM MASUK

Imam :            (pusang) (manalipun Hadran) Hadran, ikam dimana? Aur kah? Kawa lah mandatangi aku di tempat biasa, aku handak bakisah, eh lajui lah kaina aku sawat bunuh diri

HADRAN MASUK

Hadran :         Assalamuallaikum, kanapa sanak pina pusah nih sampai handak bunuh diri, bakisah pang jar

Imam :            ikam tahu lah, tadi aku hanyar imbah matan rumah Diyah badatang

Hadran :         wess,, imbah tu pang kayapa kisahnya, ditarima ai kalo leh

Imam :            muha ikam, mun aku ditarima kada bataha aku pusang kaya ini, ikam tahukah aku di usir ulih abahnya Diyah, jar sidin, sidn kada hakun baisi minantu nang kaya nang kada bias apa-apa nih

Hadran :         hadang, aku handak batakun wan ikam, manurut ikam Diyah tuh binian baik kah kada?

Imam :            jelas ai baik

Hadran :         mbah tu pang menurut ikam, ikam nih sudah baik lah, sudah pantas lah lawan Diyah nang baik tuh ?

Imam :            kada pang pinanya

Hadran :         nah dangari lah sanak lah, jar tuhan binian nang baik tuh gasan lakian nang baik jua, wan lakian nang baik gasan binian nang baik jua, mun ikam handak dapat juduh nang baik perbaiki hulu diri ikam tuh

Imam :            kayapa caranya sanak?

Hadran :         ya ubah ai penampilan ikam nang babunil-bunil nih, hidup sesuai ajaran islam

Imam :            tapi aku kada bias mangaji sagalaan

Hadran :         mun ikam handak balajar, aku hakun haja malajari

Imam :            ayuha mun kaya itu gasan mandapatakan Diyah aku hakun haja barubah

Hadran :         Alhamdulillah,, lakasi iringi aku

Imam :            kamana?

Hadran :         ayuha iringi ja hulu..

HADRAN & IMAM KELUAR

BABAK V

DIYAH MASUK

Diyah :            (menelpon Imam) Assalamuallaikum, Imam, pian dimana? Kita kawa batamu kah hari ini, ada nang handak ulun sampaikan, datangi ulun di tempat biasa lah, ulun hadangi, Assalamuallaikum

IMAM MASUK

Imam :            Assalamuallaikum

Diyah :            waallaikumsalam, Imam kah nih? Subhanallah

Imam :            inggih ni aku yang ai, kayapa menurut ikam?

Diyah :            Alhamdulillah pian sudah barubah..

Imam :            iy am nah, gasan ikam pang nah, mudahan ai abah ikam hakun manarima aku

Diyah :            (tersenyum) kanapa pian kada matan dahulu haja barubah kaya ini gasan ulun, jaka matan dahulu sudah am kita kawin

Imam :            hehee,, tanang ja yang ai, aku pasti nikahi ikam, aku pasti badatang wan kuitan ikam yang ai

Diyah :            kada usah, pian sudah talambat ka ai

Imam :            maksud ikam talambat apanya?

Diyah :            (mengeluarkan undangan) minggu kaina ulun handak nikah ka ai, mudahan pian kawa datang. Maaf, abah mangawinakan ulun wan pilihan sidin, ulun kada kawa apa-apa, mahadang pian lambat banar, kamana haja pian, ulun uyuh mahadangi (nangis)

Imam :            tapi.. aku nih barubah gara-gara ikam, aku handak bujur-bujur wan ikam, teganya ikam wan aku

Diyah :            sudah gin ka ai, mudahan pian kawa manarima haja, mudahan pian dapat juduh nang jauh lebih baik daripada ulun, Assalamuallaikum

Imam :            Waallaikumsalam

DIYAH KELUAR

Imam :            (taduduk) ya Allah, salah napa pulang ulun, kanapa pian kada adil wan ulun, jar pian lakian nang baik gasan binian nang baik jua, tapi kanapa jadi kaya ini, ni kada adil tuhan ai..

HADRAN MASUK

Hadran :         astaghfirullah, istrigfar sanak, kanapa ikam maka kaya ini sanak

Imam :            tuhan kada adil, aku nih sudah bujuran barubah gasan Diyah, tapi Diyahnya handak kawin minggu ini, asa sia-sia aku kaya ini

Hadran :         cuba dangari aku, bahinu niat kita handak barubah tuh nang salah, amun niat ikam baniat tuh karna Allah taala, tuhan pasti memberikan ikam nang lebih baik sanak ai, sudah gin tarima haja, mungkin lain juduh ikam, binian masih banyak sanak ai,, selalu barprasangka nang baik lawan Allah.

SELESAI

Halin

HALIN

FAISAL REFKI - 08/06/2016

(Terlihat Hadran sedang memainkan musik panting, tidak lama seorang wanita lewat dihadapannya)

Hadran           : anak siapa jua kah nang lalu tadi? Bacalak mata, batulis kaning, sanang banar aku malihatnya.

(hadran bapantun)

“buah hambawang masaknya kuning

Gugur dilumpur dipinggir parit

Bibirnya habang rambut kariting

Lihum bapair mata manyirit”

Hadran           : Bungas banar salagi bingking, siapa juakah baisi ngaran, malihat haja asa rusak jantung hati kaka ding ai gara-gara pian.

(lagu guna-guna nikitak)

Anaklah sapat 2x guliang padi

Anaklah kuda dirapun paring 3x

Anak siapa 2x nang lalu tadi

Bacalak mata batulis kaning 3x

            Buah hambawang 2x masaknya kuning

            Gugur dilumpur dipinggir parit 3x

            Bibirnya habang 2x rambut kariting

            Lihum bapair mata manyirit 3x

Batanglah kapas 2x batang kamuning

Bigi tiwadak buah kuini 3x

Sudahlah bungas 2x salagi bingking

Turun marusak kajantung hati 3x

            Kunanglah kunang 2x disangka bintang

            Amun sasawi nang lauk makan 3x

            Amun nang kana 2x guna nikitak

            Salawi hari nang kada makan 3x

(ditengah lagu para figuran membantu Hadran bertemu dengan di wanita kemudian pergi dan menyisakan mereka berdua)

Hadran           : ding, siapa jua pian baisian ngaran?

Sarah              : Maisyarah ka ai ngaran ulun, kiyau haja ulun Sarah ka ai, ngaran pian pang siapa?

Hadran           : ngaran kaka Hadran ding ai, handak kamana pian ding?

Sarah              : ulun hanyar imbah datang tumatan pasar ka ai, ulun lihat pian bagus banar tadi main pantingnya.

Hadran           : hehe.. kada jua ah ding ai, ni pian handak kamana pulang imbah matan pasar nih?

Sarah              : ulun handak bulik ai lagi kaka ai, aija dulu ka lah ulun badahulu nah

(Sarah meninggalkan Hadran)

Hadran           : ding..

Sarah              : pun ka?

Hadran           : lamunnya pian kada hauran isuk, mudahan kita kawa batamu pulang disini ding ai.

Sarah              : (tersenyum mengiyakan)

(sarah keluar, Hadran keluar, lampu redup manandakan suasana pergantian waktu)

(Hadran dan Sarah ada dipanggung menggambarkan suasana proses keduanya saling jatuh cinta, dan para figuran menari menggambarkan suasa tersebut)

Hadran           : ding, hari ini kaka handak bajanji lawan pian ding ai, kaka handak baikatan lawan pian ding ai, lamunnya pian hakun jua bajanji lawan kaka, mohon banar janji kita jangan dikambar lawan nang lain, lamunnya janji nginih dibatalakan saumur hidup ding ai kada ku rila.

(lagu Bajanji Hati)

Hari pang ini adingai mambantang tali 2x

Tali dibantang adingai jadi dadaian 2x

Hari pang ini adingai kita bajanji 2x

Sambil bajanji adingai bapigang tangan 2x

Lamun pang tali adingai tali balati 2x

Tali dadaian adingan sampiran kain 2x

Bila pang kita adingai sudah bajanji 2x

Jangan dikambar adingan lawan nang lain 2x

Lamun pang tali adingai jadi dadaian 2x

Ulur salimut adingai dipakai jua 2x

Lamun pang janji adingan dibatalakan 2x

Saumur hidup adingan kada ku rila 2x

Sarah              : inggih ka ai, ulun hakun haja baikat janji lawan pian, tapi lamunnya pian bujuran handak lawan ulun, pian harus minta ijin dahulu kalawan kuitan ulun, ulun kada wani mun kuitan ulun kada marastui ulun.

Hadran           : pasti ding ai, kaka pasti badatang kaina lawan kuitan pian, tapi pian basabar haja, kaka masih kada baisian napa-napa, supan kaka mun kadada baisian nih handak badatang kawadah kuitan pian, mun pian hakun mahadangi kaka, kaka handak tulak madam isuk, doakan haja mudahan kaka sukses di parantauan, bila kaka sudah bulik kaka bajaji mangawini pian ding ai sambil baarak wan kuda gipang ding ai.

Sarah              : amun kaya itu tasarah pian haja ka ai, ulun pasti mahadangi pian, doakan jua ulun disini mudahan setia mahadangi pian ka ai.

(Hadran berpamitan kepada Sarah)

(Sarah duduk termenung memikirkan Hadran)

Sarah              : kaka Hadran kayapa jua habar pian disana, siang malam marista badan ka ai mangganang pian di pamadaman, satiap hari ulun rindu dandaman ka ai handak batamu pian, jakanya kawa ulun pasanakan lawan burung tarabang ka ai, mudah mudahan niat pian tulak marantau mancari makan di ridhoi tuha ka ai.

(lagu Taingat Kasih)

Siang wan malam badan marista badan

Halin diriku nang saurangan

Taingat kasih… dipamadaman 2x

Tulak marantau ya sayang mancari makan

            Kada lupa lah badan hati dibadan

            Satiap hari rindu dandaman

            Burung tarabang… ku pasanakan 2x

            Angin batiup ya sayang ku bayangakan

Duduk maungut sayang dimuha lawang

Ingat batamu dibulan tarang

Bajanji kawin… mun inya datang 2x

Kawin baarak ya sayang wan kuda gipang

(ditengah lagu para figuran menggambarkan kebahagiaan sepasang kekasih)

(Hadran kembali dari perantauan)

Hadran           : alhamdulillah, akhirnya sampai jua kakampung halaman, sasuai janji kaka ding ai lamunnya kaka bulik matan parantauan, kaka handak badatang ka wadah kuitan pian ding ai.

(para figuran satu persatu masuk kepanggung dengan pakaian ke perkawinan)

Hadran           : cil, handak kamanaan, siapa nang kawin?

Figuran 1       : Siti Maisyarah ding ai

(figuran lain masuk lagi)

Hadran           : paman, ada nang bakawinan kah disana, siapa nang kawin?

Figuran 2       : Sarah, anak haji Tamrin ding ai.

(hadran kecewa mendengar kabar perkawinan Sarah)

Hadran           : purun banar pian ding ai maninggalakan kaka, maka kita sudah bajanji ding ai lamunnya kaka bulik madam kaka handak badatang, talalu banar pian ding ai mangkambar janji kita, saumur hidup ding ai kada ku rila. Kaka kira hari ini kita batamu ding ai, sakalinya pian sudah balaki lawan nang lain, umay padihnya kada badaya badanku ding ai mandngar habar pian, kada suah taniat dalam hati kaka handak ka lain ding ai, amun dasar juduh pian lain kaka ding ai tinggal basarah lawan nang kuasa..

(lagu Halin)

Banaik piang si bungas langkar

Banaik pinang…

Batis bakait jangan dibasuh

Dibanyu karuh di banyu karuh

Lamun taganang si bungas langkar

Lamun taganang….

Wayah baulit banyunya mata

Kahada taduh kahada taduh

Basaksi marangkai janji

Badapat batamu sudah batali

Umai padihnya kada badaya badanku

Basaksi marangkai janji

Badapat batamu sudah batali

Tinggal basarah lawan nang kuasa

Illahi robby……

Daun mingkudu si bungas langkar

Daun mingkudu….

Kambanglah rampai jangan diikat

Di buncu kain di buncu kain

Halinlah judu si bungas langkar

Halinlan judu…

Baluman sampai taniat hati

Kada kalain kada kalian

SELESAI

08/06/2016 FAISAL REFKI