Galuh Kumala Sari

GALUH KUMALA SARI

Karya: Faisal Refki

(14 April 2021)

Adaptasi dari syair Galuh Karuang

TOKOH:

Galuh Kumala Sari

Bayan Bastari

Iyang

Aluh Sarintan

Kai Kasan

PROLOG

Bismilah awal kata bamula

Langkahkan kaki kanan wan kiwa

Allahu rabbi Tuhan nang esa

Kalaulah ada salah dikata

Tersebut kisah suatu masa

Adat karasmin aruh banua

Banyak hiburan tiada terkira

Gamalan wayang hujung acara

Adapun Bayan putra bastari

Gagah rupawan muda parlinti

Bamain agung basanang hati

Gamalan wayang barami rami

Bayan Bastari tapikat hati

Malihat Galuh Kumala Sari

Babaju habang giwang baiduri

Apik pasona galung maninggi

Kada pang lapas mata lalaki

Galuh baigal banyanyi nyanyi

Rasa marawan di sanubari

Banyak nang hayal maambil bini

Kada pang lawas singkat carita

tuntung karasmin punya acara

Galuh Kumala bulik lah ia

subarang sungai itu rumahnya

BABAK I

FADE IN

terikat sudah cinta si Bayan

Galuh Kumala dalam ingatan

bulan nang tarang jadi bandingan

elok majlis muda perawan

Rasanya hilang ruh sumangat

Tiada sanang tambah malarat

Tarasa lamah tulang wan urat

Galuh Kumala taingat ingat

Bayan:

Galuh... Galuh Kumala Sari, kahada talapas ingatan diaku kalawan ikam,

carunung mata hawas maitih ikam baigal banyanyi liwar apik. Galung maninggi, giwang

baiduri, umpama bulan nang tarang, elok majlis muda rupawan, dimapa jua diaku ini, rasa

hilang ruh sumangat lamun taingat ikam, tarasa lamah tulang wan urat, kahada sumangat

tambah malarat. Galuh Galuh.. dimapa jua diaku ini.

Berkata Bayan kalawan kawan

Adapun Iyang nang ampun ngaran

Aduhai Iyang dimapa badan

Taingat Galuh rasa dandaman

Bayan:

Iyang.. Iyang dimana jua ikam baandak badan, datangi diaku, tulungi jua

diriku ini.

(IYANG MASUK)

Iyang:

akay akay.. napa jua habar kawanku ngini, kuciak kuciak bakakiawan.

Bayan:

Kalaulah ikam marasa kawan ayu pang Iyang batutulungan marista diri

marista badan tulung pang jangan kapapurunan.

Bayan bapikir didalam hati

Handak badatang supan sendiri

Aduh saudara tulung wakili

Bawa lah duit sapuluh bigi

Bayan:

diaku ngini kaganangan banar kalawan Galuh Kumala Sari nang babaju

habang galung maninggi giwang baiduri, rahatan inya baigal wan banyanyi di karasmin

sumalam, diaku handak badatang batamu inya, tagal rasa supan, damintu jua maksud tujuan

diaku bakiawan ikam, tulung wakili diaku ini bahadap kalawan inya si Galuh Kumala Sari,

lamun ikam hakun, kaina ku bari duit sapuluh kindit gasan sasarah Galuh Kumala Sari.

Iyang:

akay akay, nyaman banar ikam mambuang harta, kadap hati kadap dimata,

lamun damintu kahandak lakiannya, ayuha, baisukan kaina diaku mandatangi Galuh Kumala

Sari gasan manyampaiakan apa maksud wan tujuan si Bayan Bastari.

Iyang balakas manyahut kata

Gampang sekali membuang harta

Barangkat Iyang kasubarang sana

Gasan badapat Galuh Kumala

(IYANG KELUAR)

FADE OUT

BABAK II

FADE IN

Tibalah Iyang bakatuk lawang

Galuh Kumala datang manyambang

Berkata Galuh apalah gerang

Kepada tuan berkata sumbang

Iyang:

assalamuallaikum Galuh Kumala Sari

Galuh:

waallaikumussalam, napa habar hampian kasini?

Iyang:

Duhai puan Galuh Kumala

Adapun alasan datang sengaja

Bayan Bastari maminta hamba

Datang menghadap membawa berita

Galuh:

Kanapa datang seorang tuan

Dimana Bayan nang ampun pasan

Dia itu lalaki atau bukan

Manyuruh urang basimpan badan

Iyang:

Mohon ampun Kumala ningrat, Bayan Bastari itu urangnya panyupan bangat,

bila batamu babinian bilang bapaluh karingat, pacangan ngalih kaina baucap ilat.

Galuh:

lamun damintu langsung haja ucap berita napa habar mambawa warta, Bayan

Bastari itu siapa? Kanapa hampian datang kamari manamui hamba?

Iyang:

adapun ia Bayan Bastari malihat pian wayah karasmin dikampung subarang

baigal banyanyi, matan wayah nintu runtuhlah iman didalam diri, siang wan malam taganang

ganang didalam hati. Lamunnya pian sudi, diaku datang kamari gasan mawakili, ku bawakan

duit sapuluh bigi gasan maminang Galuh ampunnya diri, sudikah pian manarima ini nyaman

pang kita baikat janji.

Galuh:

bujurkah Bayan bamain agung

wayah bawayang subarang kampung

maaf haja kada pang sumbung

kaina marista kada bahujung

padahi Bayan ku kada sudi

kada pang handak ku ambil laki

kada sabanding diriku ini

ibarat langit kalawan bumi

Galuh:

Bayan itu aku lihat bakalakuan kada paruna, tabiat bilang kada

sampuraka, parangai buruk bilang kadada akalnya, perawan mana nang hakun wan inya.

Padahi kalawan inya aku damini kada handak balaki, amun balaki syarat nang dicari, musti

sugih di harta baik di budi gagah rupawan sabanding lawan diriku ini.

Iyang:

umai purunnya Galuh Kumala

baucap damintu dihadap mata

jangankan Bayan aku pun marista

rasa dililit naga partala

Iyang: lamun damintu kanyataannya diaku undur diri mambawa seribu luka dihati, purunnya

pian Galuh Kumala Sari rupa bungas tagal ilat landap kaya belati.

(IYANG KELUAR)

FADE OUT

BABAK III

FADE IN

Malu dihati malu dibadan

Iyang badapat kalawan Bayan

Galuh Kumala berkata enggan

Kasihan Bayan disupanakan

Kecewa hati Bayan Bastari

Galuh Kumala nang dihandaki

Lain diharap lain dinanti

Baucap kata sakiti hati

Duhai si Bayan muda rupawan

Siang wan malam kada guringan

Didalam hati tabayang bayang

Galuh Kumala kapupurunan

Berkata Bayan kalawan Iyang

Dimapa jua badan saurang

Iyang baucap sangatlah berang

Malu dibalas jangan dibuang

Bayan:

lain diharap lain dinanti, Galuh Kumala nang ku samakan kalawan bulan liwar

kapapurunan, nyaman banar inya maambil simpul bahwa diaku kada paruna, bakalakuan

kada sampuraka, sampai disambat bilang kadada akalnya. Sakit, liwar sakitnya hatiku ini

mandangar inya baucap kaya itu, liwar purun ikam Galuh Kumala.

Iyang:

duhai Bayan Putra Bastari, ikam ini lalaki, jangan hakun ikam disasambati,

jangan hakun harga diri ikam dilincai, dijajak jajak babinian, biar kaya apa haja babinian itu bungasnya, langkarnya, tapi lamun sudah inya manggugur akan harga diri ikam, balas, jangan

kada. Diaku sabagai kawan ikam, maambilakan hati parihal perlakuan Galuh Kumala Sari,

diaku kada rila lamun kawanku disasambati. Amun diaku bulih mambari saran, isuk ikam

datangi kawadah Kai Kasan, minta bantuan kalawan sidin gasan manggawi Galuh Kumala

Sari, biar inya tahu kayapa rasannya kada kawa guring siang wan malam, sakira inya umpat

jua marasa akan napa nang ikam rasa.

Bayan:

bujur jar ikam Iyang ai, aku ini lalaki, harga diriku ini labih baharga dari rasa

cintaku kalawan Galuh Kumala Sari. Malam ini jua aku tulak kawadah Kai Kasan gasan

manggawi Galuh Kumala Sari, supaya inya tahu, inya sadar bahwa napa nang inya sambat

sudah mahancurakan hati kalawan harga diriku ini.

Bayan nang sudah kasasarikan

Kadap hati kadap pikiran

Laksana wayang bapaparangan

Mambalas dendam jadi untingan

Pergilah Bayan ke rumah kai

Adapun Kasan ngaran diberi

Sidin tarnama sangatlah sakti

Ilmu ma’rifat pemikat hati

FADE OUT

BABAK IV

FADE IN

Bayan:

Aduhai kai tulungi cucu pian, ulun disambat macam macam, supan banar diri

ulun, harga diri ulun dilincai lincai, babinian nang ulun handaki manyambat ulun kada paruna, kada sampuraka bilang kadada akalnya, inya bangaran Galuh Kumala Sari, kayapa

caranya supaya inya karindangan lawan ulun.

Kai Kasan:

Kasihan banar ikam Bayan Bastari, sauting nang harus ikam tahu bahwa juduh

nintu andaknya didalam diri, jadi biar kayapa haja kita manggawi inya, lamun ujar Allah taala

kada, ya kada. Kanapa hal nintu diaku sampaikan kalawan ikam, supaya ikam jangan talalu

baharap lawan apa nang ikam kahandaki. Parihal ikam handak manggawi si Galuh Kumala

Sari diaku kawa haja mambantu tagal kita baparjanjian dahulu sakira nyaman kainanya, diaku

kada batanggung jawab lamunnya tajadi hal-hal nang kada ikam kahandaki, kayapa?

Bayan:

inggih, ulun bajanji kai, ulun kada bataha mambawa-bawa ngaran pian

lamunnya tajadi hal-hal nang kada ulun kahandaki.

Kai Kasan:

lamun damintu ikam ku bari amalan, amalan nang kawa gasan manggawi si

Galuh Kumala Sari, manggawinya malam sanayan, ingati, iringin napa nang ku sambat.

FADE OUT

BABAK V

FADE IN

Tibalah itu malam sanayan

Bayan masuk dalam peraduan

Kilat pun mancar sambung sambungan

Hujan ribut parlahan lahan

Malikit lilin tinggi sajari

Lilin dijaga janganlah mati

Lalu bapasan ka humbayang diri

Datangi Galuh Kumala Sari

Guruh jauh sahut sahutan

Turunlah angin kadalam badan

Ruh Kumala diambilakan

Basatu lawan humbayang Bayan

FADE OUT

BABAK VI

FADE IN

Galuh Kumala diperaduan

Adapun ia guring surangan

Humbayang Bayan masuk kabadan

Rasa dipagut ragap ragapan

Gusar pang rasa Galuh Kumala

Rupa si Bayan dihadap mata

Berlaku adat dalam bercinta

Dipaluk cium rasanya nyata

Satiap malam baganti malam

Galuh Kumala rabah ditilam

Taambung ambung rasa dibungkam

Bayan manindih manikam nikam

Tersebut pula Galuh Sarintan

Galuh Kumala ia berkawan

Bantu mancari ini soalan

Kanapa Kumala rista ristaan

Sarintan:

umay umay.. sadih banar aku malihat ikam Galuh Kumala, siang wan malam

kada baguringan, taungut nang kaya urang garing, kanapa jua ikam Galuh Kumala?

Galuh:

kada tahu jua diaku aluh Sarintan ai, matan malam sanayan tadi aku marasa

badapat lawan Bayan Bastari.

Sarintan:

Bayan Bastari? Siapa inya tuh?

Galuh:

urang subarang kampung, inya tuh handak lawan diaku.

Sarintan:

nahh… ada salah napa ikam kalawan inya maka sampai tamimpi tarus?

Galuh:

aku hanyar ingat, rahat kawannya datang manamui aku parihal Bayan Bastari

handak maminang diaku, aku bapadah kada handak, aku manyambati inya, malincai harga

diri inya, bisa gagara nintu aku jadi kaya ini, marga maulah lalakian sarik wan sakit hati

kalawan aku, manyasal banar aku didalam badan.

Sarintan:

iya banar lamun damintu kisahnya, mau kada mau ikam patut maminta maaf

kalawan Bayan Bastari.

Galuh:

tagal kayapa caranya, aku supan lamunnya harus bahadap kalawan inya.

Sarintan:

lamun kata kada kawa taucap, badan kada kawa batamu, maka cukup tulisan

nang mawakilakan, bakirim surat haja ikam gasan inya, bapadah haja ikam manyasal bangat

sudah manyambati inya.

FADE OUT

BABAK VII

FADE IN

Siburung dara tarbang ka jambu

Tibalah iya di ambin padu

Diambil Bayan suratnya itu

Mamohon ampun isinya pilu

Galuh:

Duhai ikam Bayan

Bastari Tarima maaf diriku ini

Bodohnya diri ilat belati

Basumbung diri sakiti hati

Siang wan malam rasa marista

Bapuat rabah taguring kada

Bawa pang bulik humbayang raga

Duhai diriku kada badaya

Untunglah Bayan baik hatinya

Dibalas surat Galuh Kumala

Sadikit kata banyak maknanya

Si burung dara nang mambawanya

Bayan:

Kepada Galuh Kumala Sari

Jangan lah engkau bersedih hati

Maafkan jua diriku ini

Dandam dihati kadada lagi

Salah dahulu jangan diungkit

Umpana tali lepas berkait

Sadikit kata sadikit bait

Mudahan ikam kahada sakit

Dibaca surat itu perlahan

Banyu pang mata gugur guguran

Umpama umbak daur dauran

Tangis pang pacah raung raungan

Umpama batu digugur banyu

Hati Kumala semacam itu

Sumbung dahulu kada berlaku

Galuh Kumala handak batamu

Galuh:

kada kusangka, kada kusangka ikam kaya ini Bayan Bastari, napa nang ku

parbuat kalawan ikam umpama tulisan nang ada dipasir pantai, tasapu umbak, hilang barasih

kada babakas, salah diaku manila ikam kada paruna, kada sampuraka, bilang kadada akalnya,

salah banar diaku baucap kaya damintu, diaku sadar sabagai saurang babinian kada patut

baucap kaya daminta kalawan lalakian, kada patut manyupanakan, kada patut malincai harga

diri lalakian, kada patut sama sakali babinian basumbung dihadapan lalaki. Duhai Bayan

Bastari, matan damini aku basarah hati kalawan badan gasan ikam, diaku siap jadi ampun

ikam, sabarataan nang ada diawak ini gasan ikam, aku rila, aku rila…. Diaku cinta kalawan

ikam duhai Bayan Bastari.

Hati Kumala kasasahangan

Singsing tapih lipai kakamban

Lawang lulungkang ditutupakan

Tarabang Galuh karumah Bayan

FADE OUT

BABAK VIII

FADE IN

Satiba Galuh muhara lawang

Kada paduli napa jar urang

Handayang banih dibadan miyang

Itulah rasa Galuh sekarang

Bayan Bastari diam berdiri

Mambuka lawang perlahan hati

Disuruh naik Kumala Sari

Duduk bersanding dekat sekali

Nafsu birahi si laki bini

Sudah tak dapat tertahan lagi

Bayan pang sudah paling mengerti

Mancium Galuh punya jariji

Galuh:

Bayan Bastari bilang terlalu

Susuri tapih tarabang baju

Aduhai Bayan jangan begitu

Bahaya lamun ada nang tahu

Bayan:

Batanang ikam Kumala Sari

Naini rumah kupunya diri

Kada bataha ada nang wani

Lamun lah wani masuk kasini

Galuh Kumala pujaan hati

Tarima haja sudukan ini

Bila pang sayang ikam nikmati

Batanggung jawab janjinya diri

Bayan Kumala berlaku laku

Supan wan malu hilang berlalu

Adat bercinta beradu adu

Berbuat dosa jangan ditiru

SELESAI