Bauntung Batuah

Naskah Teater Tradisi Japin Carita

BAUNTUNG BATUAH

Karya : Faisal Refki

05-12-2017

Tokoh Karakter :

Hadran

Guru

Suhai

Kepsek

Madi

Kuitan

Norma

Anak

Baiti

MADI, SUHAI & HADRAN DIDALAM PANGGUNG

Suhai              : madi, ca itihi kanapa hadran tuh pina pusang te

Madi               : nyata dah ni inya tuh kahabisan doping, kada salah lagi dah tu, positif dah suhai ai

Suhai              : huss,, pina musti ikam nih madi ai, kadanya wani pang hadran mauntal di sakulahan

Madi               : cahh,, kaya kada tahu di hadran ja lagi ikam nih, kapala sakulah mamandiri haja kada dihiraninya

Suhai              : baik kita takuni nah hadrannya daripada kita batatngguhan disini. Kasi nah..

(mandatangi hadran)

Suhai              : eeee… hadran, ikam kanapa hadran pina mamusang

Madi               : kahabisan doping kah?

Hadran           : napa jar ikam tadi madi? Aku kahabisan doping? Handak ku sungsang jua saku kakanak nih, musia paguruan mandangan habis ai dikira sidin aku bujuran, baiingat ikam madi ai bapandir

Suhai              : imbah pang kanapa lagi ikam pina mamusang hadran?

Hadran           : buhan ikam tahulah? Aku nih sakit kapala imbah balajaran tadi

Madi               : nyata ai sakit kapala amun kahabisan doping, makanya until hulu

Hadran           : (handak mahantam madi) handak sakit saku kakanak nih. Buhan ikam tahulah palajaran tadi kada masuk akal sama sakali

Suhai              : kanapa tadih? Balajaran napa garang tadih?

Hadran           : tadi tuh kami balajaran matimatika kalo, imbah ngintuh gurunya manakuni kami jar sidin “manukar anak itik halabio pitung ikung, dibawa ka kalua. Wayah di jalan gugur kaluang saikung” barapa ikung nang tatinggal jar sidin, tahulah barapa?

Madi               : nyata ai anam, pitung kurangi saikung samadengan anam, ya kalo suhai

Suhai              : hiih anam, masa nang kaya itu ja ikam sakit kapala lah hadran

Hadran           : sama ai aku manjawab anam jua, tapi salah jar gurunya

Madi               : aii,, kanapa maka salah

Hadran           : jar sidin tatap haja pitung ikung

Suhai              : aii kanapa maka tatap haja?

Hadran           : jar sidin nang gugur tuh “kaluang” lain anak itik, jadi jawabannya tatap haja pitung. Han kada mask akal kalo palajaran matimatika kaya itu.

Madi               : asli camuh..

Hadran           : imbah itu kami balajaran fisika pulang, sama jua pada maulah paning

Suhai              : kanapa pulang, batakun pulang kah gurunya

Hadran           : hiih, jadi tatakunan sidin nang kaya ini “puhun lumbuk awan tihang listrik tinggian mana?” jar sidin

Madi               : kakanak isdi gin tahu jawabannya, napa suhai (manyuruh suhai manjawab)

Suhai              : tihang listrik

Hadran           : salah..

Madi               : hah? Kanapa maka salah?

Suhai              : kada mungkin puhun lumbuk tinggi pada tihang listrik, puhun lumbuk raksasa ai lagi ngintuh

Hadran           : handak tahulah jawabannya? Tinggian “awan”

Madi               : jahh,, maka tadi tatakunannya antara puhun lumbuk wan tihang listrik, kanapa maka awan

Hadran           : cuba dangari, tinggian mana puhun lumbuk A W A N tihang listrik, ada awan kalo jar ku tadih?

Suhai              : hiih lah,, bah mahalabio gurunya nah

Hadran           : iya am, aneh ja jua paguruan jaman now nih, kada sasuai lalu.

BAITI & NORMA MASUK

Baiti                : (bapandir di hape) hai hai haaiiii,,, tatamu pulang lawan ulun, hari ini ulun dikawani kawan ulun nang bangaran norma, handak bakisah satumat nah,, maaf lah amunnya muha kami pina kada bungas, gincu kami luntur pupur kami pina kubas, sualnya kami tadi hanyar imbah sumbahyangan di langgar sakulahan, iya kalo norma..

Norma            : iih, boleh haja nakal asal sumbahynag jangan tatinggal, wan jua gincu wan pupur kada boleh tatinggal jua hahahaaaaa… imbah bungas hati hanyar mambungasi diri hahaaa

Baiti                : jadi kisahnya nih iambah akmi sumbahyangan nih kami handak ka warung acil basnah handak makan mi bakuhup, tapiiii…

Norma            : tapi kada sawat lagi, soalnya kami sumbahyang tadi lawas banar badoa bawirit bazikir bayasinan bayahlilan batasmiah baakikahan banikahan baumuludan haannn… makanya kada sawat lagi, ni ja bagincu bilang satangah jam, soalnya napa baiti…

Baiti                : imbah ngini kami masukan guru bungas langkar, jadi kami harus bengkeng tu pang sakira sidin mangilar kawadah kami tarus ya kalo norma…

Norma                                            : iya banar… muacchhhh…

(hadran cs menggoda baiti & norma)

Hadran           : uuuu galuh nang bungas langkar,, bakawanan siii..

Baiti                : ehh sudah gin lah, ada bubuhan takajut gaul, dadaahh..

Suhai              : may,, bungasnya, handak kamanaan jar

Madi               : handak ka dusta mol kah pina bengkeng banar, umpat pang jar..

Norma                  : napa jar buhan ikam nih, bajauh nah, kami handak masukan

Baiti                : hiih bajauhan nah, kami kadada waktu gasan buhan ikam.

Hadran           : ma ayy,, kami handak bapandir satumat nah

Norma                                                     : bapandir napa?

Hadran           : bolehlah diatara kami batiga nih jadi pacar buhan ikam badua, barang ai siapa kah

N & B             : (tatawa) bhahahaa

Baiti                : kada salah lah buhan ikam nih?

Norma            : hiih kada salah danger lah kami nih, buhan ikam bias apa garang maka wani mahandaki kami?

Baiti                : hiih, buhan ikam bias apa?

Suhai              : ikam tahulah aku samalam aku makan nasi sop di warung acil basnah

Baiti                : imbah tu pang?

Suhai              : kada pakai sindok, bakacau..

CS                   : weeeeyyyy

Norma                                     : ikam pang bias apa (kawadah madi)

Madi               : samalam aku taranjah acil acil bakandaraan

Norma                                                     : imbah tu pang?

Madi               : sidin nang minta maaf lawan aku

CS                   ; weeeyyyyy

Baiti                : ikam pang jua bias napa? (kawadah hadran)

Hadran           : samalam aku minum obat tiga bigi

Baiti                : imbah tu pang?

Hadran           : bamamah kada babanyuan

CS                   : weeyyyyy

Baiti                : bah saitu haja kah kabisaan bhan ikam, sakit barangnya

Hadran           : tapi kami ada kabisaan lain

B & N             : napa tuh?

CS                   : samalam kami putusi pacar kami

B & N             : imbah tu pang?

CS                   : gasan manunggui buhan pian

B & N             : huuuuuu….

Baiti                : dah gin nah kami handak mmasukan, mamauki buhan ikam nih, bajauh nah.. (bajauh maninggalakan)

Hadran           : (mahadang) eetttt handak kamanaan, kaina hulu, kada usah masuk gin, disini ja kita bapandiran

Suhai              : hiih, kalupina gila balajar tarus matan subuh sampai kamarian

Norma            : ayu nah jangan manggangu kami, kami padahi wan ibu buhan ikam ni kaina

(hadran Cs mengganggu norma dan baiti)

IBU GURU MASUK

Guru               : hadran, suhai, madi, buhan ikam apai norma wan baiti?

Baiti                : (mamaraki ibu) tu nah buhan hadran bu ai manggau kami, kami handak masuk kalas maka kada dibolehi buhannya, kami takutan bu ai wan buhannya tuh

Norma            : inggih bu ai, buhannya pina handak macam-macam tuh lawan kami bu ai

Guru               : bujuran kah napa jar buhannya nih? Bapala banar buhan ikam nil ah kada tahu di sakulahan, urang handak balajar maka diganggui, buhan ikam ni napa maka kada balajaran kah jua?

Hadran           : dutainya bu ai, kami kadada manggangu buhannya tuh, buhannya jab u ai nang kakijilan

Guru               ; jangan badusta ikam hadran ai   

Hadran           : nah badusta jar, urang jujur maka disariki

Guru               : manyahut tarus ikam ni lah (memukul hadran)

Hadran           : aduh bu sakit, kuitan ulun ja kada suah mamukul ulun bu ai, pian nang lain kuitan ulun wani banar mamukul ulun lah, awas pian bu ai ulun laporakan wan abah ulun

Guru               : maraha situ, biar kuitan ikam tahu anaknya bilang kaya hantu

Hadran           : hadang ja pian bu ai, lihati ja isuk..

HADRAN, MADI & SUHAI KELUAR

Guru               : dah gin, buhan ikam lajui dah masukan, kaina dicarii gurunya

Norma                                           : inggih bu ai, makasih bu lah

Guru               : lakasi nah baimbai wan ibu.

GURU, NORMA & BAITI KELUAR

HADRAN, KUITAN & KEPSEK MASUK

Kepsek           : kayapa garang kisahnya pa maka sampai anak pian nih dipukul bu Erma?

Kuitan            : jar anakku nih pa ai, inya nih rahatan bakawanan imbah tuh dating ibu tadi bamamai hamuk langsung mamukul ka anak ulun nih pa ai

Kepsek           : kada mungkin pa ai sidin mamukul mun kadada sababnya, pasti ada sababnya sidin jadi kaya itu

Kuitan            : kaya ini nah pa lah, nang ngaran kakanak ni pa ai kita maklumi ai, ditagur bujur bujur mangarti ai inya, jangan langsung mamukul nang kaya itu, kada kawa lagi kita kaya jaman bahari nang bakarasan mandidik tuh pa ai. Pokoknya ulun kada tarima anak ulun dikaya ituakan pa ai. Ulun handak manuntuk ibu tuh sakira diampihi disakulahan nginih pa ai, kayapa haja caranya harus ampih tu pang pa ai. Mun kada ulun laporakan ka polisi

Kepsek           : sabar pa ai, kita selesaikan pakai cara kakaluargaan haja pa ai, badamai haja pa ai

Kuitan            : pokoknya kada tuh kada tu pang dah, ayuha dah pa ai ulun parmisi pa ai nah, assalamuallaikum

Kepsek           : waallaikumussalam

HADRAN& KUITAN KELUAR

Kepsek           : astaghfirullah, bapala banar kakanakan wayahini, babaya masalah kaya itu haja sampai kaya ini, kada sadar kah paguruan tuh liwar baiknya mambari ilmu, kadada kah handak batarimakasih lawan paguruan, ya Allah mudahan jadi anak nang bauntung baiman haja barataan.

KEPSEK KELUAR

MADI, SUHAI & HADRAN MASUK

Suhai              : kayapa hadran habarnya kasus kam samalam?

Madi               : hiih, danger-dangar kuitan ikam mandatangi kapala sakulah jar gasan manuntut ibu Erma, buju kah?

Hadran           : ya ai kalo

Suhai              : diampihi kah jar sidin?

Madi               : hiih pina kada talihat barapa hari nih

Hadran           : bagus ai tu mun sidin ampih, nyaman tahu rasa, kamahiran pang

Suhai              : jangan jua kaya itu hadran ai, sidin tuh guru kita sanak ai

Hadran           : bagaduh,, kada paduli jua ai, guru nangapa ngintuh sakahandaknya mahantam urang, aku gin kada marasa jua sidin mambari ilmu gasan aku

Madi               : nahh,, sidin tuh wali kelas kita kalo, masa ikam kadad dapat ilmu lah matan sidin

Hadran           : nang sidin bari tuh aku sudah baisi, kuitanku badahulu nang malajari aku

Madi               : tasarah ikam ha lagi hadran ai..

KEPSEK MASUK

Kepsek           : hadran, sini hulu nak bapa handak bapandir

Hadran           : bapandir napa pa?

Kepsek           ; ikam tahulah sudah habar bu erma?

Hadran           : habar napa pa?

Kepsek           : jadi samalam abah ikam mauntut sakira sidin diampihi kalo, nah sidin wayahni sudah kada bagawi disini lagi nak ai

Hadran           : bagus ai tu pa aim un sidin ampih

Kepsek           : nak, ikam tahulah kayapa sayangnya bu erma tuh lawan ikam, asal ikam tahu ja nak lah, ikam tuh parak diampihi dah sakulah samalam tuh, tahulah siapa nang memperjuang akan ikam tuh mati matian? Bu erma nak ai, jaka kada sidin nang hakun mananggung barataan, sidin tuh parcaya banar wan ikam nak ai, tahulah jua kanapa sidin samalam tuh mamukul ikam, sidin tuh liwar kecewa banar dah wan ikam nak ai, sidin kira ikam kada lagi bakalakuan sakalinya tatap haja, untung ikam ni nak ai masih diperhatiakan sidin, arinya sidin tuh sayang wan ikam. Amun bapa boleh mambari saran gasan ikam, baik ikam minta maaf gin lawan sidin, sidin tuh guru, guru tuh sama lawan kuitan kita nak ai, bapa tahu ja ikam pasti ada baisian rasa kasian wan sidin, tapi ikam supan kalo nak? Kada usah supan nak ai, tampulu balum talambat nak ai. Ayuha sudah, itu haja gin harapan bapa, mudahan ikam kawa menyadarinya. Bapa parmisu hulu nah, assalamuallaikum

CS                   : waallaikumussalam

KEPSEK KELUAR

Hadran           : bujur jua pang napa jar kepala sakulah tadi, sidin tuh saying wan aku makanya sidin kaya itu wan aku, akunya ja lagi nang kada sadar, asa manyasal kam aku maulah sidin ampih

Suhai              : ayuha sudah sanak ai, tampulu balaum talambat minta maaf ai kaina ikam wan sidin

Hadran           : bujur jar ikam sanak ai, aku harus minta maaf wan sidin, aija sudah kaina aku karumah sidn wan abahku.

MADI, SUHAI & HADRAN KELUAR

GURU & ANAK MASUK

Anak               : maa, kanapa pian kada bagawi tarus ma? Liburan kah ma urang sakulah

Guru               : kada nak ai, mama lagi kada maajar banarai nak ai, kaina mama bagawi ai pulang, mama handak dirumah haja lawan ikam nak ai

Anak               ; oh kaya itu kah ma, maa, kita makan napa hari ini ma?

Guru               : makan hintalu ai pulang nak ai kaya samalam

Anak               : ma ai hintalu tarus, lawas kada makan ayam ma ai nah.

Guru               : ayuha nak ai, kaina kita nukar ayam, tapi habisakan hulu hintalunya hee

Anak               : inggih dah ma ai..

HADRAN, KUITAN & KEPSEK MASUK

Kepsek           : assalamuallaikum

Guru               : waallaikumussalam,, eh bapa, masuk pa.. kanapa tadih?

Kepsek           : anu, ni mambawa hadran wan kuitannya handak bailing jar, salajur ada nang dipandirakan

Guru               : pun, handak bapandir napa tadi pa?

Kuitan            : jadi kaya ini bu lah, ulun sabagai kuitannya hadran handak minta maaf atas kejadian samalam, maaf jua pian jadi sampai ampih bagawi disakulahan, jadi kaya ini, ulun sudah bapandir lawan kepala sakulah, dan ulun sudah tahu kayapa kajadian nang sabujurnya dan kayapa perlakuan pian lawan anak ulun di sakulahan, ulun batarimakasih banar lawan pian, karna pian anak ulun kada jadi diampihi disakulahan, jadi ulun meminta kepala sakulah mudahan pian kawa bagawi lagi jadi guru disakulahan

Kepsek           : inggih bu ai, amun pian bersedia pian bias bagawi isuk bu ai kaya asal, kami matan sakulahan maharapakan pian hakun babulik bu ai ka sakulah

Guru               : Alhamdulillah, tarimakasih banar ulun masih dibari kasampatan bagawi lagi, amun masalah hadran ngintu sudah ulun maafkan pa ai. Mudahan hadran jadi anak nang pinta pa ai

Hadran           : bu, maafakan kalakuan ulun bu lah, ulun janji kada lagi maulangi bu ai, tarimakasih jua pian sudah mandidik ulun, sakali lagi ulun mohon ampun maaf bu ai lawan pian

Guru               : aija kada papa nak ai, mudahan ikam jadi anak nang bauntng batuah nak ai.

All                   : aamiin…

SELESAI