BARABUT KOPI

 

NASKAH JAPIN CARITA

Oleh : Angkui Kurniawan

BARABUT KOPI

TOKOH: (Kozero, Acil Muni, Jumiah, Pembakal, Haji Ibas, Mang Amat, Acil Nunu, Utuh Udin)

            Si utuh Kozero, membujang parak tiga dekade sudah, handak banar sudah kawin tapi belum jua menamui binian nang cocok di hati. Sampai akhirnya inya betamu wan acil Muni. Janda penjual warung kopi di kampungnya, liwar bungas langkar, sampai jadi rabutan urang kampung. Si kozero nih rupanya jatuh cinta wan si janda nih, imbah tu akhirnya rancak banar ke warung si Muni. Tapi sekalinya abahnya si Pembakal kampung jua handak lawan si Muni. Timbul am dua abah anak ni basaing gasan memperabut akan si Muni.

(Kozero dan Jumiah “Masuk” duduk)

Jumiah : Eh Kozero, lawas dah kita nih bekawan.. dari bahari sampai wayah ni kada suah ikam nih pina memaraki binian? Umur tuha dah, pabila jua ikam nih kawin?

Kozero : Aku tuh lainnya kada handak memaraki binian pang, cumin asa kadada nang cocok masih dihati Jumiah ai,

Jumiah : Ikam nih dari lawas itu haja asalasan, mun kyatu-kyatu ja tarus, sampai tuha Bangka gin kada pacangan bisi bini ikam nih.

Kozero : Ikam tanang ja, aku dapat dah binian nang cocok gasan di hatiku nih.

Jumiah : Eh iyakah? Siapa tadih Kozero?

Kozero : Tapi asa supan pang nah aku nih menyambat..

Jumiah ; Uma ai, kenapa pulang jadi kisah supan ikam nih, kawan lawas jua sudah kita ni.

Kozero : Jangan padahi siapa-siapalah!

Jumiah : Ayuha, tanang, kada ku sambat ke siapa-siapa.

Kozero : Lawan Acil Muni..

Jumiah : HAH! Bebujur ikam nih Kozero!!

Kozero : Bujuran aku nih!

Jumiah : Akayah, ikam nih.. sidin tuh umurnya jauh banar wan ikam, sama kaya anak wan mama beda umurnya.

Kozero : Tapi sidin tuh pas kam asaku.

Jumiah : Apanya nang pas?

Kozero ; Pas pang, muha awak… NAHHH!!!!

Jumiah : Yaya ai, kada handak mencari nang saumuran ja kah?

Kozero : Bah, aku nih sudah mencari nang saumuran ya kadada nang pasnya di hati.

Jumiah : Mun kayatu tasarah ikam ja ai, tapi ikam kalo pina jadi sambatan warga pina memaraki janda.

Kozero : bah, beapa mendangari pandiran urang. Abaikan ja urang tuh..

Jumiah ; Ayuha, ikam nih dasar ngalih banar di padahi.. (Jumiah bediri)

Kozero : Handak ke mana ikam?

Jumiah : Bulik, handak bemasak..

Kozero : Eh, ayuha.. eh ikam nih jua lakasi bacari laki, kena sawat jadi perawan tuha..

Jumiah : Uma ai, bore banar ikam nih, yu ja nah ku bulik..

(Jumiah Keluar)

Kozero : Haduh, beapa yo nih nyamannya.. han, baik ku ke wadah acil Muni, sekaliah handak pendekatan.

(Kozero Keluar, Acil Muni Masuk)

Acil Muni : Uma ai, hari nih pina sunyi kenapa yo, belum ada lalu nah pelanggan dari pagi tadi… amun kayani, kadada duit am gasan bebelanja kena.

(Mang Amat dan utuh Udin Masuk)

Mang Amat : Uma ai acil Muni, Makin hari pina makin bebungas ja nah pian cil ai.

Acil Muni : Han, mang amat nih, bisa banar merayu-rayu.. handak nukar kopi kah mang?

Mang Amat : Inggih Cil ai, secangkir pang nah kopi, tapi jangan nang pahitlah cil, dimanisi ja kaya muha pian..

Acil Muni : Han, pian nih bisa banar..

Utuh Udin : Uma ai lah tuha sudah bisa banar merayu-rayu janda, bini di rumah di ganang mang  ai, anak jua di ingati.

Mang Amat : ikam nih masih halus jangan tapi menggaduhi urusan urang tuha pang.

(Bini Mang Amat (Acil Nunu) masuk)

Utuh Udin : Ulun nih maingatkan ja Mang ai, pas bini pian muncul bakajutan kena kayapa?

Mang Amat : Bah, kadanya ah, bini ku lagi tulak kaluar kota. Kada mungkin pacangan ka sini..

Utuh Udin : Pas sidin tiba-tiba bulik kayapa?

Mang Amat : Bukah ai aku ka rumah?

Utuh Udin : Amun pian taciduk pang marayu Acil Muni kayapa?

Mang Amat : Di rayu ai, gampang ja merayu biniku tuh…

Mang Amat : Kenapa yo aku asa merasa ada hawa-hawa kada nyaman..

Utuh Udin : Hawa-hawa handak membunuh kayatukah mang?

Mang Amat : Hi ih, pina hawa-hawa mematikan kayatu..

Utuh Udin : Coba pian balik kanan grak mang..

Acil Nunu : Ohh, kayani leh kelakuan amunnya ulun kadada…

Mang Amat : Eh, umanya.. pabila pian bulik..

Acil Nunu : Kada usah tapi kisah kada tahu ja, mandangar sudah ulun dari tadi pemandiran pian abahnya ai..

Mang Amat : Anu umanya ai, kawa ulun jelas akan.

Acil Nunu : Kada usah bajelas-jelaskan, jelas banar sudah ulun malihat wan mandangar.. malam ni kada mau tahu, pokoknya pian guring di luar abahnya ai..

Mang Amat : Uma ai umanya, teganya pian, pas ulun kanyamukan kayapa?

Acil Nunu : Pakai obat nyamuk!

Mang Amat : Bolehlah basangu bantal..

Acil Nunu : Kada usah babantal-bantalan, pakai batu bata j asana gasan bantal, lakasi j apian bulik, kalo pina panic ni nah malapau muha pian.

Mang Amat : Ngerinya pian nih umanya ai..

Acil Nunu : Tiwas pina melelanji wan binian lain, tahu ja ulun nih ada jiwa psikopat, loko pian ulun mutilasi banar ai sawat katahuan ulun pulang marayu Acil Muni.. Pian jua Acil Muni ai jangan pina kagatalan ja wan laki urang, mantang-mantang janda lalu ai kasana-kasini bacari lalakian, membari supan ja.

Acil Muni : EH, jangan bahapal ja bapandir, laki pian tu nah yang pina lanji banar marayu ulun, ulun nih baya melayani pembeli ja, nyata ai harus ramah, maupang manyanyarik, mun basasarik kadada nang handaknya kena batukar kopi di sini.

Acil Nunu : Mauk ah, baik aku bulik.. lakasi abahnya pian jangan pina tapi bejalan lagi ha, kalo pina melelanji tarus gawian.. ( DI jewer)

Mang Amat : Aduh umanya, sakitnya pian menjewer..

Acil Nunu : Lakasi ja bulik, jangan tapi banyak bapandir.

(Mang Amat, Acil Nunu Keluar)

(Masuk Kozero)

Kozero : Assalamualaikum..

Acil Muni, Utuh Udin: Walaikumsalam..

Acil Muni : Nah ada kozero, handak mangopikah ikam Kozero?

Kozero : Inggih Cil ai, sekalian handak menjinguk pian, asa karindangan hati ulum sehari ja kada tetamu pian cil ai..

Acil Muni : Han bisa banar, tuha dah aku nih kozero ai, jangan tapi di gombali pang.

Kozero ; Berapa garang umur pian cil?

Acil Muni : Kepala empat dah aku nih..

Kozero : Bah dusta banar, sebuting ha te kepala pian.

Acil Muni ; Maksudnya umurku nih sudah empat puluhan kozero ai.

Kozero : Bah, kada papa cil ai, muha pian kaya abg ja masih biar umur empat puluhan.

Acil Muni : Han kalo, bisa banar ikam nih merayu-rayu.

Udin : Jaka ikam bacari bini kozero ai, dari pada merayu janda tarus.

Kozero ; Ini pang aku lagi bacari bini.

Udin : Ikam handak mengawani acil Muni kah?

Kozero ; Hi ih.

Acil Muni : Uma ai, jangan tapi balalabih bagayaan tuh kozero ai. Nah kopi ikam.

Udin : Abah ikam mana Kozero?

Kozero ; Ada ai di rumah, kenapa garang?

Udin : Aku handak ma antar durian pesanan abah ikam banar ai kozero ai, semalam batampah sidin wan aku.

Kozero : UH, iyakah sakalian ai nah, aku gin imbah ni handak bulik jua sudah.

Udin : Baik wayah ini ja nah, nyaman lakas jua pasanan abah ikam nih ku julung.

Kozero : Hadang pang, aku handak bapandiran dulu wan acil Muni.

Udin : Ayu nah, esok-esok kawa haja pulang, ikam nih kadada kah selera nang ta anum sedikit, pada wan acil Muni baik wan Jumiah, nyata pas saumuran.

Kozero : Bah aku wan Jumiah nih bebaya kawan ja, kada handak labih.

Udin : Loko ikam nyesal kena nyambat kayatu, pas am ikam handak wan inya tapi dikawini urang sudah kayapa lagi?

Kozero : Bah ai, baik kita ke wadah ku dah, asa bore banar ikam nih dari tadi.

Udin : Nah, mengkanya lakasi kita menamui abah ikam.

Kozero : Acil Muni, ulun handak bulik dahulu lah, kena kasini pulang ulun.

Acil Muni : Eh, ayuha… kasian abah ikam kena kalawasan mahadangi pasanannya.

Udin ; Badahulu nah cil, Assalamualaikum.

Acil Muni : Walaikum salam.

(Udin, Kozero Keluar)

(Pembakal Masuk)

Pembakal : Assalamualaikum.

Acil Muni ; Walaikum Salam.. han tasalisih am wan anak pian pambakal ai, Udin Tadi minta kawani Kozero ke wadah pian gasan ma antar durian pasanan pian jar.

Pembakal : Hah, iyakah.. ayu ai to kadapapa jua.

Acil Muni : Handak ngopikah pambakal?

Pembakal : Hi ih nah, nang kaya biasalah.

Acil Muni : Inggih pembakal ai.

Pembakal : Asa panas banar harinya kanapa yo?

Acil Muni : Wajar ai, kita masuk musi kamarau dah, maka am pina rancak kebakaran jar di kamoung subalah.

Pembakal : Hi ih, sawat ai mendangar aku… banyak tanaman karing jadi nyaman banar tebakar.

Acil Muni : Nah, kopinya pembakal.

Pembakal : Makasihlah…. Ramilah jualan pian acil Muni?

Acil Muni : Alhamdulillah rami ai pembakal ai, satiap hari ada ja yang dating batukar kopi, banyak pang jua nang katuju bahutang.

Pembakal : Kadapap cil ai, asal kena bayar ha..

Acil Muni : Inggih pang pambakal ai… tapi biasanya nih nang dating katuju modus.

Pembakal : Modus kayapa cil?

Acil Muni : Modus pang, kena ada ja nang manggoda-goda ulun, mentang-mentang ulun nih janda, padahal babini sudah, ya kagatalan ja katuju manggodai janda.

Pembakal : Mun aku nih pang kayapa?

Acil Muni : Mun pian tuh sama ja pang asa ulun, tapi mending ;pian kadada bini, jaka ada bini pian bisa di gusur sudah warung ulun nih.

Pembakal : Bah ai balabih banar, mana ada jua aku katuju modus.

Acil Muni : Pian adalah kapikiran handak babini pulang pembakal?

Pembakal : Ada ai nah semenjak melihati ikam, timbul asa handak mangawini ikam.

Acil Muni : Han kalo, sama ja jua katuju manggodai ulun, bingung ulun nih, padahal bungas jua kada tapi ulun nih.

Pembakal : Kada bungas napanya, bungas bangat ikam tuh cil ai, kaya babuhan blackpink kayatu muha pian, korea-korea kayatu.

Acil Muni : Han balabih lo pian nih pembakal. Timbul gulu baju ulun baganal nah di puji tarus.

Pambakal : Ayuha nah, handak bulik dulu aku, pina abut kena kozero mancarii.

Acil Muni : Ayu ja pembakal ai, hati-hati ja di jalanlah.

(Pembakal, Keluar)

Acil Muni : Pinanya sadang pang nah tutup, habis jua sudah jualan. Bulik, baolah makan, mandi, guring ai sudha.

(Acil Muni keluar… Kozero dan Udin Masuk)

Kozero : Bah, OOO abah…

Udin : Mana abah ikam Kozero?

Kozero ; Kada tahu nah, ajin kaluar sidin.

Udin : Bah iyakah, ayu ai nah, ku andak ai durian nih di wadah ikam.

Kozero : Hi ih gin.

Udin ; EH Kozero, bujuran kah ikam handak wan acil Muni?

Kozero : Hi ih, kada begegayaan pang aku nih.

Udin : Oi, umur sidin tuh kapala empat dah, ikam kapala dua, kajauhan umur asaku, baik jadi mama ikam pada jadi bini ikam.

Kozero : Bah, kada kawa, pokoknya harus jadi biniku tuh pang acil Muni.

Udin : Nah Kozero, nih panglihat ku ja panglah. Abah ikam tuh pina rancak kam ka warung acil Muni.

Kozero : Imbah tu pang kenapa?

Udin : Kada paham ja ikam nih. Ajin abah ikam handak jua lawan acil Muni.

Kozero : Kada mungkin ah.

Udin : Apanya nang kada mungkin, abah ikam jua sudah kada babini lagi, jadi kawa ai abah ikam jua mangawini acil Muni.

Kozero : Ayu nah jangan tapi mangutani.

Udin : Kada mangutani pang, mamadahi ja aku nih Kozero ai… Ayu ai nah, pina sanja dah hari, bulik dulu aku nah, assalamualaikum..

Kozero : Walaikumsalam.

(Udin keluar)

Kozero : Bujurankah yo abahku nih, ah kadamungkin pang kayaknya. Tapi bisa jua pang bujur, han bingung aku timbul, kayapa nih mun bujuran abahku nih handak jua  wan acil Muni, perang abah anak am timbul. Ku takuni gin kena mun abahku sudah bulik.

(Pembakal masuk)

Pembakal : Assalamualaikum.

Kozero ; Walaikumsalam.

Pembakal : Mana Udin? Jar handak maantar durian pesananku?

Kozero : Bulik dan Udinnya, tuh ada ai duriannya.

Pembakal : Han, mantap banar nah malam nih kita makan durian kozero ai.

Kozero ; Bah, ada nang handak ulun takun akan kalawan pian bah ai.

Pembakal : Nah, pas banar jua aku jua handak ada nang dipandir akan nak ai.

Kozero : Napa nang handak pian pander akan?

Pembakal : Tapi jangan sariklah ikam?

Kozero : Napa garang dulu kisahnya?

Pembakal : abah pinanya handak kawin pulang Kozero ai.

Kozero : Hah, babujur bah?

Pembakal : Hi ih bujuran.

Kozero : Kanapa tadih handak kawin pulang?

Pembakal : Samanjak aku wan mama ikam bacerai, kadada lagi nang mamanja-manjakan aku, asa rindu aku kam belaian bini nih.

Kozero : Rindu, kakaya dilan ja ha lagi.

Pembakal : Abah serius nah kozero ai.

Kozero : Inggih Bah ai, ayuja kadapapa pian mun handak kawin pulang.

Pembakal : Han, berarti ikam satujulah mun abah kawin pulang?

Kozero : Satuju ai bah ai, kasian jua pang abah kadada nang maurusi, ulun gin jua ngalih kadada nang maurusi.

Pembakal ; Mangkanya lakas-lakas bacari bini Kozero ai.

Kozero : Hadang dulu bah, sapa garang dulu biniannya, dapat kah sudah pian calonnya?

Pembakal : Dapat sudah..

Kozero : Siapa?

Pembakal : Acil Muni..

Kozero ; OOOOO…. Acil Muni.. sakan ulun sapa…

……………….

Kozero : Hah, acil Muni?

Pembakal : Hi ih.

Kozero : Babujur bah.

Pembakal : Bujuran.

KOzero : MamPreng kalo abah nih.

Pembakal : Napa pulang nitu preng?

Kozero : Bagayaan kah pian nih bah?

Pembakal : Bujuran Nak ai, kanapa garang.

Kozero : Kayani nah bah, jadi lo ulun nih barancana handak melamar urang bah ai.

Pembakal : Han, bagus lagi, imbah pang kenapa?

Kozero ; Jadi urang nang ulun handaki tuh si acil Muni Jua bah ai.

Pembakal : Babujur ikam nih Zero.

Kozero : Bujuran bah ai.

Pembaka ; Begayaan kalo nih..

Kozero : Kada begayaan bah ai.

Pembakal : Mampreng jua kalo nih ajin.

Kozero : Maka jar pian kada paham napa tuh preng.

Pembakal ; Ikam nih tahu lo acil Muni tuh Tuha pada ikam.

Kozero : Inggih, kenapa garang?

Pembakal : Katuhaan nak ai gasan ikam.

Kozero : Amun sudah cinta bah ai, kada kawa lagi ulun nih mamandang umur atau napa-napa kah.

Pembakal : Kada kawa nak ai, abah kada satuju tuh pang ikam kawin wan acil Muni.

Kozero : Ulun gin  kada satuju pian kawin wan acil Muni Bah ai.

Pembakal : Mau pang aku nih abah ikam.

Kozero : Ulun Nih anak pian bah ai.

Pembakal : Abah nag kasian sudah lawas manduda.

Kozero : Ulun kasian lagi manjomblo dari lahir.

Pembakal : Abah lawas kada nang meurusi.

Kozero : Kena ulun nang maurusi akan.

Pembakal : Abah handak ada yang memasak akan.

Kozero : Ulun kena nang memasak akan.

Pembakal : Abah lawas kadada nang membelai.

Kozero : Kena ulun belai akan.

Pembakal : Kada waras ikam nih kozero ai.

Kozero : Cinta nih ngalih bah ai, rancak meulah urang kada waras.

Pembakal : Ikam harusnya mengalah nak ai wan abah, ikam tuh masih anum, baik bacari bini nang saumuran wan ikam ja.

Kozero : Nah, maaf bah ai, amun masalah cinta nih kada kawa bakalah ulun.

Pembakal : Abah gin jua kada handak bakalah wan ikam.

Kozero : Han kayani ja nah bah, kita meolah taruhan ja kayapa?

Pembakal : Bah napa ttaruhan-taruhan, kada satuju aku amun kita taruhan, kada baik.

Kozero : Aja kita olah perjanjian ja nah..

Pembakal : Nah itu aku hanyar satuju. Kayapa perjanjiannya?

Kozero : Kita adakah saimbara ja nah, antara pian wan ulun, nah nang kalah harus merestui nang menang. Misalkan abah nang kalah pian harus merestui ulun kawin wan acil Muni. Nah amunnya ulun nang kalah pian harus merestui ulun kawin wan acil Muni.

Pembakal : Hadang dulu lah, perasaanku kadada untungnya aku umpat saimbara nih, kenapa aku mun kalah atau menang tetrap ikam yang kawin wan acil Muni.

Kozero : Karena nang tuha harus bakalah wan anag anum bah ai.

Pembakal : Bah, Kada kawa, pokoknya intinya sapa nang menang itu nang kawa mangawini acil Muni.

Kozero : Ayuha. Deal.

(Mang AmAT, Utuh Udin, Acil Nunu Masuk)

Udin : Nah panonton hari ni kita pacangan melihati pertarungan nang sangat sengit antara Pembakal lawan anaknya nag bangaran Kozero gasan memparabutkan cinta sejatinya jar, sapa juakah nang menang, jangan kamana-mana tetap saksikan Alam Subalah.

Udin : Nang, pamirsa pertandingan pertama kita hari ni adalah panco, siapa nang kira-kira kawa menang, kita lihatiu ja pamirsa.

Mang Amat : Pembakal sudah siap?

Pembakal : Siap.

Mang Amat : Kozero sudah siap?

Kozero : Siap..

Mang Amat : Go!

Seluruh orang menyoraki pertarungan antara Kozero dan Pembakal…

Pembakal menang.

Udin : NaH, nang berhasil menang adalah Pembakal.. 1-0, saying sekali Kozero kalah satu angka, tapi masih ada kesempatan gasan kozero menyul pembakal di lomba selanjutnya. Lomba selanjutnya adalah tarik tambang.

Mang Amat : Pembakal siap?

Pembakal : Siap!

Mang Amat : Kozero siap?

Kozero : Siap!

Mang Amat : Go!

Seluruh orang menyoraki pertarungan antara Kozero dan Pembakal…

Kozero Menang.

Udin : Nah pamirsa rupanya si Kozero di babak ke dua ini berhasil mengalahkan Pembakal, jadi sekornya sama pamirsa 1-1. Han tapi masil ada satu lagi pertandingan pamirsa ai, nah ini panentuan sapa nang kawa menang di babak nih berarti inya pemenangnya. Nah lomba terakhir nih pamirsa ai adalah lomba catur.

Mang Amat : Siap kah sudah pambakal?

Pembakal : Siap!

Mang Amat : Kozero jua sudah kah siap?

Kozero : Siap!

Mang Amat : Go!

.

.

.

Kozero : SKAK!!!

Udin : Han pemirsa ai, sakalinya kozero menang pulang di babak katiga nih, jadi sudah dapat diputuskan amun pemennang si Kozero.

Kozero : Han bah, baik pian dari pertamaan mengalah wan ulun, ulun jua te nang menang.

Pembakal : Bah, tapi tetap ai abah kada terima nak ai, ikam nih ketulahan kena mun melawan abah ikam.

Kozero : Maupang, maka kita sudah maulah perjanjian.

(Acil Muni Masuk)

Acil Muni : Assalamualaikum..

Semua : Walaikumsalam..

Acil Muni : Napa nih pina rami banar, ada lomba tujuh belasan kah?

Udin : Kada cil ai, ini nah Pembakal wan Kozero lagi saimbara jar cil ai.

Acil Muni : Hah? Saimbara napaan?

Kozero : Saimbara memperebutakan pian cil ai.

Acil Muni : Ai, jangan tapi begayaan pang!

Pembakal : Bujuran Muni Ai, kami nih lagi memperebutakan ikam.

Kozero : Nah Cil Ai, ulun nang sudah menang berarti ulun nang kawa mengawini pian.

Pembakal : Kada kawa nak ai, ikam tuh ke anuman gasan acil Muni, harusnya abah nang mengawini acil Muni.

Kozero : Kada kawa bah ai, ulun sudah menang saimbara, maka kita sudah bisi perjanjian.

Acil Muni : Sebelumnya maaf banarlah gasan, Kozero, lawan pembakal, lawan jua seberataan warga, gara-gara ulun kampung nih smapai resah, abah anak ja timbul bamusuhan ghara-gara ulun te. Gasan Pembakal maaf banar nah, ulun kada kawa menerima cinta pian pembakal ai, karena ulun nih meanggap pian tu kaya kakak ulun sudah.

Pembakal : Maka biasanya ikam baik lawan aku Muni, sakan ku ikam handak jua wan aku.

Acil Muni : Nah berarti pian am nang jua terlalu baper wan ulun. Nah gasan Kozero, aku tuh maginnya kada kawa menerima cinta ikam, ikam tuh sadar ja lo kita nih beda usia dua puluh tahun, ikam tuh pas nya jadi kemanakan ku Kozero ai.

Kozero : Nah, imbah pang nih kayapa? Percuma ai lah berarti saimbara nih?

Udin : Nah cil, kayapa garang lakian nang pian handaki nih cil?

Acil Muni : Nah, kayani. Aku nih sudah bajanji wan almarhum lakiku, lamunnya aku nih kada pacangan kawin lagi kena. Jadi kada kawa ulun menerima cinta sapa-sapa lagi, tatutup sudah hati ulun gasan lakian mana aja, jadi tolong banar hargai komitmen ulun nah Kozero wan pembakal jua, lawan warga nag lainnya jua.

Kozero : Nah, kayani pada jaid bujang lapuk am ulun.

Acil Muni : Ikam nih Kozero Ai, melihati nang kajauh-jauh, padahal ada ja binian nang handak di parak ikam. Peka pang sedikit ikam nih.

Kozero : Siapa cil?

Acil Muni : Uma, kada peka ja kah lagi. Si Jumiah tu nah, inya rancak bacurhat wan aku, ikam tuh kada peka jar nya.

Kozero : Hah, babujur cil?

Acil Muni : Bujuran..

Udin : Handak kamana ikam kozero.

Kozero : Handak manamui si Jumiah.

Udin : Bah lambat ikam, si Haji Ibas semalam sudah melamar si Jumiah, nah Undangan kawinannya.

Kozero : Ai, kenapa aku kada tahu..

Udin : Ikam jua handak menyasah Acil Muni Ja gawian, kayapa handak tahu.

(Jumiah dan haji Ibas masuk)

Kozero : Jumiah, bujurankah ikam wan haji Ibas handak kawin?

Jumiah : Hi ih Kozero ai.

Kozero : Hah, maka ikam jar handak wan aku, kenapa ikam meneroima lamaran haji Ibas?

Jumiah : Ikam pang kada suah peka, jadi baik aku terima ai lamaran sidin pada jadi bujang lapus kena.

Haji Ibas : Tiwas lambat, kedahuluan aku am.

Acil Muni : Han Kozero, kadada nang kawa ikam salah akan lagi, ikam jua tiwas kada mau peka wan perasaan binian nang diparak ikam. Ikam jua kada baik tahulah menjadikan urang taruhan, kisah meadakan saimbara kayatu, piker jua perasaan nang urnag ikam jadikan taruhan tuh kayapa. Wan jua nah, ikam tuh kada boleh takalahi wan abah ikam, tahu ja lo kada baik, badosa ikam melawan nasehat orang tuha, kalo pina durhaka kada merasa ikam.

Udin : Han kajadian barabut Acil Muni, timbul am mambujang tarus.