MAHAR SOKER

MAHAR SOKER

 

Karya : Angkui Kurniawan

 

TOKOH:

Reno

Mita

Arul

Bongek

Jeje

Acil Biah

Sasan

Bubu

Pembakal

Sahrul

 

 

 

 

 

            Suasana dengan lampu redup memperlihatkan seseorang yang wajahnya tetutup topeng sedang di kejar oleh dua orang polisi. Polisi tersebut kebingungan karena lari orang tersebut sangat cepat dan memutuskan untuk pergi meninggalkan panggung.

Black Out

            Lampu perlahan menyala, kemudian masuk dua orang pemuda sedang duduk di gardu Bernama Arul dan Bongek.

Arul : Heh kaciwa lalu aku malam tadi, bagus banar sudah brazil padahal main harau kalau kalinya malam tadi.

Bongek : Inya dasarnya kam, binian nih dasar ngalih gasan ditebak. Mengkanya jarku mun ikam handak dapat binian bungas tuh bagawi yang bagus,sugih,baiki muha nyata banyak binian yang datangan.

Arul : Ei, Sapa yang mandirakan binian. Jarku tadih masalah bola, Brazil tu nah kalah jar ku. Kalah!

Bongek : Iya bujur, binian tuh dasar ngalih gasan bekalah mengkanya bujur tarus.

Arul : Astagfirullah, bauntung, baiman, batuah bujur bisi kawan kaya ikam nih heh, Tuhuk memandiri ya kada mau nyambung tarus. Pabila talinga tuh dibaiki? Parak sapuluh tahun dan menyuruh ikam ke THT ya malah ke klinik binatang kalinya karena kada nyambung tadih dipandiri.

Bongek : Ai, kam becari kucing pulang kah?

Arul ; Heh, batuyuk dah kucing di wadahku gara-gara ikam. Kenapa garang bisi kawan pina kirip banar bisi talinga, maka kenapa garang jua hakun ja aku mengawani?

Bongek : Ei, kam menyambati aku tulikah? Kada boleh tahulah menyambati urnag kayatu!

Arul : Dasar nyawatu tuli. Astagfirullah, kanapa jua hakun ja aku mengawani inya nih yo.

Kemudian datang seorang perempuan bernama Jeje, seorang warga yang baru saja pindah beberapa hari yang lalu.

Jeje : Assalamualaikum…

Arul&Bongek : Walaukumsalam…

Arul : Ai, amun kada salah pian nih warga hanyar kampung sini kalo?

Jeje : Inggih ka ai, ulun hanyar banar pindah semalam. Jadi ulun bakuliling nih handak bekenalan wan orang-orang sini, supaya kawa berakatan kita.

Bongek : Bah, hakun banar ulun rakat lawan pian, rakat sampai pelaminan gin ulun hakun banar.

Arul : Abunyulnya, sigar talinga tadapat yang bening kalinya.

Jeje : Uma ai, bisa banar leh pian nih.

Bongek : Duduk dulu nah, bepandiran kita supaya rakat.

Bongek bergeser sampai membuat Arul terdorong dan hampir jatuh dari gardu. Jeje kemudian duduk di gardu.

Arul : Ngini kada ingat lagi dah wan kawan mun urusan binian.

Bongek : Ngaran pian siapa yo?

Jeje : Ngaran ulun Jeje.

Bongek : Ngaran ulun Bongek (Sambil membawai besalaman). Uma halusnya tangan pian kaya perasaan ulun.

Sementara Arul di yang juga duduk di gardu tersebut terlihat mengolok dari belakang.

Jeje :  Uma ai, pian nih harat banar leh menggombal kalinya. Tapi ulun handak betakun am. Buhan pian ada yang tahulah dimana rumah Pembakal?

Arul : Ta-

Bongek : Tahu banar ulun, handak kah ulun antar?

Jeje : Kada perlu, ulun kada handak merepotakan. Minta tunjukan ja jalannnya kawalah?

Bongek :Kadapapa lalu, mengawani pian kamana haja ulun nih gas ja.

Jeje : Uma ai, amun kayatu ayu ai nah, dari pada ulun tasasat. Minta rela banar ulun lah amunnya merepoti.

Bongek : Kadadapang kata repot gasan pian nih. Kita kah tulak.

Arul : Oi, maka kita handak bakumpulan lawan Reno? Ini Renonya OTW dah matan rumah.

Bongek : Haih, jarku gampang masalah kucing tuh kena ku carikan pulang.

Arul :  HEH! Lawan kawan sorang kada mandangar, imbah lawan binian bening nyarak telinga.

Jeje : Ulun permisi dulu lah, maaf minjam kawan pian stumat ulun.

Arul : Inggih kadapapa, kada usah dibulikkan gin kadapapa jua kawan Kayani.

Jeje&Bongek : Assalamualaikum…

Arul : Walaikumsalam..

Jeje dan Arul meninggalkan panggung.

Arul : Uhhh, Bapala banar membuang ka kawan,. Kayani banar bisi kawan pina kada tapi Anu. Nih Reno sampai mana yo sudah, pina kadada mancungul ja masih.

Seorang pemuda bernama Reno memasuki panggung.

Reno : Assalamualaikum…

Arul ; Walaikumsalam, han panjang umur. Hanyar am di sambat tadi.

Reno : Mana si Bongek?

Arul : Biasa, kawan kita tuh lagi mamaraki binian yang hanyar pindahan ke kampung nih.

Reno : Oh, yang hanyar pindah semalam kah?

Arul : Hi ih, maka tahu ja lo kawan kita nih kada kawa tedapat binian, lalu ja nyarak telinga.

Reno : Hi ihlah.

Arul : Kanapa muha pina kusut banar, alahan pada banang kalayangan?

Reno : Kam tahu ja lo, hubunganku wan Mita nih sudah parak di ujung tanduk. Mama Mita nih handak banar sudah mengawinakan Mita lawan anak kawannya yang sugih. Maka syarat handak mengawini Mita nih maharnya minimal 1 M.

Arul : Homa, ngitu maharkah napa. Duit seitu nyata kawa maolah rumah wan beulah usaha sorang pada jadi mahar.

Reno : Ngalih ai ngaran status sosial nih wayahni mempengaruhi harga mahar binian.

Arul : Kada usah tapi dipikirakan, mun dasar jodohnya pasti ada ja jalannya. Mun lain jodoh, ikam ai yang harus kawa ikhlas.

Reno : Kada kawa lagi kam aku nih ikhlas, rasa hati nih kada kawa lagi dah berpaling ke lain.

Arul : Homa, kakaya sinetron ha lagi. Pokoknya, Insyaallah ada ja jalannya. Kam ja lagi badoa wan barusaha. Aku handak bulik dulu nah, pina murung hari, kalo pina kada jadi karing tapasan di rumah…. Assalamualaikum.

Reno : Walaikumsalam…

Arul meninggalkan panggung, menyisakan Reno seorang diri di gardu.

Reno : Heh, Kayani banarleh nasib. Bisi gawian bebayanya, pujaan hati handak dijodohkan, mahar 1 M, cicilan rumah gin masih minta bantui kuitan melunasi. Pabila yolah kawa jadi urang sugih. Duh, maka hujan ha pulang, kayapa nih handak bulik? bataduh ai dulu nah.

Seorang perempuan bernama Mita memasuki panggung sambil membawa nampan dan payung.

Mita : Assalamualaikum ka…

Reno : Walaikumsalam… Eh Mita, kanapa ikam menamui aku? Kalu pina disariki mama ikam kena.

Mita : Kadapapa, ulun diam-diam jua menamui pian, jadi mama kada tahu.

Reno : Uma, kalo pina kita dipergoki mama ikam, habis tuh makin kada direstui kayapa?

Mita : Pian nih kada mehargai lalu usaha ulun handak menamui pian, ulun nih sudah berusaha banar tahulah sekira kawa tetamu pian. Beistilah ha pulang memasakan pian makanan, kayatu banar pian nih, kacewa ulun.

Reno : Kada kayatu maksud aku, kasini gin baduduk dulu, kalo pina basah baju.

Mita : Basah sudah.

Reno : Iya mangkanya baduduk sambil bataduh,sekira kada makin basah.

Mita duduk di gardu bersama Reno.

Reno : Lain maksudku pang kada mehargai ikam, cuman tahu ja lo hubungan kita nih ujung tanduk nah, jadi paling kada aku nih handak kelihatan baik dulu dihadapan mama ikam. Amun, sidin tahu kita betamuan bediam-diam Kayani gawat banar kena.

Mita : Ulun nih Ka ai kada kawa kada tetamu pian sehari ja, hati ulun nih karindangan sudah.

Reno : Aku gin jua, tapi kayapa ngaran keadaan sudah Kayani.

Mita : Ayuja, kena ja kita membahas itu, makan gin dulu pian. Ulun memasakan banyak dah makanan gasan pian. Pian tuh pasti dah mun kada dimasakkan makan mi wara di rumah.

Reno : Hehe, maaflah. Ngarannya gin kada tapi beduit, banyak aku tabung duitnya gasan kita kawin kena.

Mita : Ayuja ka ai, kena ja hulu mamikirkan ngitu. Makan ha dulu pian.

Kemudian Reno dan Mita makan bersama di gardu tersebut, sampai akhirnya datang Acil Biah yaitu ibu dari Mita memergoki keduanya di gardu.

Acil Biah : Oi, Kayani kah kalinya kelakuan ikam badua. Waninya ikam membawai anakku betamuan diam-diam Reno!

Mita : Kada ma ai, ulun kawa menjelaskan..

Acil Biah : Hah, basi dah kisah kawa menjelaskan tuh. Rancak dah melihati di FTV… Reno, maka sudah kupadahi lo lawan ikam, mun ikam bujuran handak wan anakku, siapkan mahar 1 M hanyar aku bariakan ikam lawan anakku. Handak jadi apa anakku kena mun lawan ikam kawin.

Reno : Ini jua lagi ulun usahakan cil ai gasan mengumpuli duit, supaya kawa melamar anak pian.

Acil Biah : Kalawasan usaha ikam tuh, anakku nih usia menikah dah. Mun mehadangi ikam mengumpuli 1 M, Sawat jadi perawan tuha anakku.

Mita : Ma, pian katarlaluan banar sudah Ma ai. Pian membari mahar liwar kada masuk akal lalu, apa garang ma arti duit tuh, kada dibawa mati jua ma ai.

Acil Biah : Badiam ikam, jangan kisah mamadahi urang tuha.

Mita : Tapi ma ai…

Acil Biah : Sudah badiam ikam, lawan ikam jua, mun sampai talihatiku ikam masih bejalan lawan anakku. Ku sumbalih tu pang ikam. Mita kasi dah bulik kita.

Mita : Kada handak ulun,!

Acil Biah : Bulik jarku…

Acil Biah menyeret Mita pulang (Keluar panggung) sedangkan Reno tidak mampu berbuat apa-apa karena merasa ucapan Acil Biah sebagian besar adalah benar. Tidak mungkin mampu bagi Reno mengumpulkan uang sebanyak itu dalam waktu dekat. Mita meninggalkan payungnya di dekat gardu, kemudian Reno memungut payung tersebut sambil melihatnya begitu dalam (Ala Drama-drama korea). Kemudian muncullah seorang lelaki menggunakan jas hujan, sambil melihat kelakuan Reno.

Sahrul : Lagi simulasi drakor kah?

Reno pun terkejut, kemudian kembali bersikap normal.

Reno : Takajutnya aku, dari mana ikam mancungul?

Sahrul : Dari tadi ai, ikam yang pina tahanyut banar lawan kaadaan mangkanya kada sadar ada urang lewat.

Reno : Kada ai, aku meambil payung.

Sahrul kemudian melepaskan jas hujannya, terlihat dia mengenakan setelan kantoran, sehingga membuat Reno jadi penasaran.

Reno : Pina rapi nah pakaian, urang kantoran kah ikam.

Sahrul : Oh, perkenalkan saya Sahrul, seorang pengusaha.

Reno : (Kagum) , uhhh. Pengusaha apa?

Sahrul : Pengusaha tebak-tebakan!

Reno : Hah, kayapa maksudnya?

Sahrul : Nah jadi ulun nih membari tebak-tebakan ke urang. Habis tuh mun urang tuh bujur menebaknya dapat duit.

Reno : Uhhhhh, Kuis kah?

Sahrul : Hampir kaya itu tapi bukan seperti itu.

Reno : Imbah am nih yang bujur kayapa, bingung nah maksud pandiran ikam nih.

Sahrul : Nah ini lagi musim bola kalo?

Reno : Hi ih, pas banar tim ulun nih menang tarus pang nah.

Sahrul : Nahhhhh! Misalnya ikam kawa menebak di pertandingan yang akan datang sapa yang menang, maka ikam akan mendapat duit yang banyak.

Reno : Uhhhhh, bapala banar! Judi tuh ngarannya!

Sahrul : Heit… Jangan menghina gawian pengusaha ikam nih. Kayani-kayani sugih tahulah. Lawan ini lain judi, ini nih kuis jua anggapannya. Mun jawaban bujur, maka dapat duit…

Reno : (Mengangguk) .. Bisa dapat berapa garang amun bujur menebak?

Sahrul : Oh, tergantung uang yang diberikan kepada pihak kami, amun duit pian makin banyak, habis itu menang makin banyak jua duit yang kawa pian dapatkan. Bisa sampai ratusan juta sampai miliyaran rupiah.

Reno : Wihhm babujang ikam?

Sahrul : Bujang banar sampai katulang nah, maginnya lo nih tim ikam menang tarus. Nah kalo ai handak mencoba peruntungan di Even kali ini. Mumpung masih ada slot nah gasan member baru.

Reno : Kayapa garang syarat gasan jadi membernya?

Sahrul : Uhh, gampang banar. Ikam cuman perlu membayar biaya administrasi, makin banyak biaya administrasinya, makin banyak jua duit yang kawa pian menangkan. Habis tuh tinggal ikam pilih tim mana yang handak ikam jagokan kena, mun tim ikam menang, dapat am duitnya. Gampang lo?

Reno : Berapa garang biaya administrasinya?

Sahrul : Minimal 20 juta, maksimal terserah seberapa banyak duit ikam.

Reno : Uma, larangnya 20 juta.

Sahrul : Santai dulu, mun ikam menang bisa dapat sampai 200 juta amun tim kesayangan ikam menang, maka bisa labih lagi.

Reno : Aihh, babujur?

Sahrul : Bujuran, itu hanyar modal 20 juta. amun modal misal sampai seratus juta bisa dapat sampai 1 M. Han kurang apa lagi?

Reno terlihat sedang berpikir, kemudian terbesit ide.

Reno : Amun misalnya esok kawalah bayarnya, soalnya di tangan nih belum meingkut nah duitnya.

Sahrul : Gampang, esok handak di mana kita janjian?

Reno : Di sini ai, kamana lagi.

Sahrul : Ayu ai.

Kemudian Sahrul memakai jas hujannya kembali.

Sahrul : Assalamualaikum…( Sahrul meningggalkan panggung)

Reno : Walaikumsalam… Baistilah kah yo inya tuh manyinggahi aku. Hah, sudah gin bulik jua aku. Tunggui aku lah Mita, tumat lagi aku kawa memenuhi mahar ikam.

Reno meninggalkan panggung sambil menggunakan payung milik Mita.

Black Out

Kemudian, terdengar suara musik. Lampu menyorot kepada dua orang polisi yang sedang melakukan selebrasi di depan gardu.

Sasan : Sasan.

Bubu : Bubu.

Sasan&Bubu : Kami polisi Sanbu…wkwkwkwkwk…

Sasan : Mantap jua selebrasi kita tadih, pasti komandan kita bangga.

Bubu : Hi ihlah, asa keren jua kita nih. Nah, jadi kita ke sini tadi beapa yo?

Sasan : Huma, maka kita bejanjian lawan pembakal handak betamuan di sini. Kita handak minta parsatujuan lo gasan manyalidiki kasus penipuan judi bola tuh.

Bubu : Uhh, hi ih.. hanyar ingat aku.

Sasan : Kayapa ikam nih, kada peingatan tarus. Semalam ja komandan minta olahkan kopi yang di bawakan mie sakalinya. Kayapa kisah?

Bubu : Ngarannya gin kada ingat kayapa..

Sasan : Mana yo pembakal nih, lawas lalu mancungulnya.

Kemudian munculah pembakal.

Pembakal : Assalamualaikum.

Sasan&Bubu : Walaikumsalam..

Pembakal : Uhh, buhan ikam nih polisi yang handak melakukan panyalidikan di sini kah?

Sasan : Inggih pembakal ai, kami ke sini atas permintaan komandan kami.

Pembakal : Uhh, ada ai semalam komandan buhan kam meanuiku. Hadang, sapa ja ngaran buhan kam bedua.

Sasan : Sasan (Sambil mejabat tangan)

Bubu : Bubu (Juga berjabat tangan)

Sasan&Bubu : Kami adalah polisi Sanbu..Wkwkwkwk…

Pembakal : Polisi Sanbu?

Sasan :  Inggih pembakal ai, karena kami nih rancak ditugaskan badua mengkanya jadi dijuluki polisi Sanbu.

Pembakal : Pina familiar banar ai wan ngarannya.

Bubu : Perasaan pian ja kalo pembakal ai.

Pembakal : Eh, ayuja dah. Jadi kapan buhan kam bedua mulai bertugas?

Sasan : Nah, karena ditakutkannya tersangka curiga ada polisi di daerah ini, jadi kamu memutuskan menyamar ja kisah jadi warga biasa, untuk menghindari pelaku kabur dari kampung ini pembakal ai.

Bubu : Hah, kita menyamarkah?

Sasan : Maka semalam kayatu kita kesepakatan lawan komandan, jangan padah kam kada ingat pulang.

Bubu : Ingat ai aku.

Pembakal : Aih, sudah-sudah napa pina bakalahian bedua nih. Ayuja, sebelum melaksanakan tugas, komandan buhan ikam minta aku membawa buhan kam bedua kuliling kampung nih dulu supaya hapal rute-rutenya.

Sasan : Inggih, pembakal ai.. gas ja kita.

Sasan, Bubu, dan Pembakal meninggalkan panggung.

Black Out

Menceritakan ke esokan harinya setelah Reno berbicara dengan orang misterius tersebut. Lampu fate in, memperlihatkan Reno yang sendirian menunggu di Gardu.

Reno : Manaleh urang semalam, jarnya janjian jam 10. Nih parak jam 11 dah, kabiasaan banar human Indo nih ngaret tarus mun handak betamuan.

Kemudian muncullah Sahrul dengan setelan jas yang sama.

Sahrul : Jadi kayapa? Sudah ada kah duitnya?

Reno : Kadada baisi baju lainkah jadi baju ngitu tarus yang dipakai?

Sahrul : Ini pakaian dinas, nyata ai jadinya pakaian ngini tarus yang dipakai.

Reno : Uhh, kayatukah?

Sahrul : Jadi kada nih? atau handak memandirkan baju war akita nih?

Reno : Jadi ai, jadi inih ulu nada duitnya 50 juta, kira-kira kawalah nih jadi 1 M yo?

Sahrul : Homa, modal 50 juta wara handak beharap dapat 1 M lah?

Reno : Kadada lagi nah duit aku, ini gin ngalih banar membujuk kuitan di Jawa gasan bajual tanah.

Sahrul : Hemm, Ayuja dah. Ku usahakan sekira kawa jadi 1 M. Nah jadi tim mana yang handak ikam pilih?

Reno : Nah aku handak memilih tim ini ja nah.

Sahrul : Uhh, mantap jua pilihan ikam nih. Ayujalah, malam nih tanding tim ikam, badoa ai mudahan menang tim ikam.

Reno : Aaminn, kena batahajud kah aku sekira menang tim ku.

Sahrul : Ayuha, tasarah ikam ja dah. Aku pamit dulu mendaftar akan ikam. Assalamualaikum…

Reno : Walaikumsalam…

Sahrul meninggalkan panggung.

Reno : Mudahan menang nah tim ku, nyaman kawa dapat modal gasan mangawini si Mita.

Bongek dan Arul memasuki panggung.

Arul : Wihh, tumben sungsung nah kawan kita nih nongkrong di sini.

Bongek : Wih, tumben te kawan kita sungsung datang.

Arul : Maka jarku tadih kayatu, kanapa kam ulangi pulang.

Bongek : Kam lapar kah?

Arul : Sarah nyawa ja dah, atur hidup situ. Eh, pina cerah banar nah muha kawan. Ada apa gerangan?

Reno : Aku bisi cara dah sekira kawa dapat duit banyak supaya kawa mengawini Mita.

Arul : Nahh, bujur lo jarku mun jodoh tuh pasti ada ja jalannya.

Bongek : Wihh, bisi gawian bagus kah sudah No? Kawa berarti meneraktir kami makan.

Arul : Ngini mun masalah duit atau binian pasti dah nyarak talinga. No, padahi pang kayapa caranya ikam bisa dapat duit banyak gasan mengawini Mita?

Reno : Jadi Kayani kisahnya, samalam aku dapat proyek ganal.

Arul : Aih, proyek napa jar tadih?

Reno : Proyek, tebak-tebakan.

Arul : Hah? Kuiskah maksudnya?

Reno : Lain.

Arul : Imbah am apa?

Reno : Tebak-tebakan tim sepok bola mana yang menang mala mini, amun bujur jar tebakannku duitnya tuh bisa belipat ganda sampai 10x lipat labih jar.

Arul : Astagfirullah, kam sadar lo itu tuh tamasuk judi ngarannya.

Reno : Tapi jar urangnya ini nih main tebak-tebakan lain judi.

Arul : Sama ja bauntung ai, Astagfirullah.. berapa ikam meandak taruhannya.

Reno : 50..

Arul : Ribu?

Reno : Juta.

Arul&Bongek : Allahuakbar!

Arul : Ngitu berarti tabungan ikamlah yang ikam pakai?

Reno : Tabungan lawan tanah kuitanku pang di sandaakan supaya kawa dapat 50 juta.

Arul : Nah, dangari akulah. Ikam nih balum tentu menang main judi nih. Balum lagi, bisa ja inya tuh, urang yang membawai ikam bajudi tuh sekalinya penipu. banyak dah kasus di kampung nih kena tipu jar pas judi bola. Maka puluhan juta kena tipunya.

Reno : Jangan pang mendoakan yang kada-kada ikam nih.

Arul : Lainnya mendoakan pang, aku nih memadahi kenyataannya. Baca coba barita di Tiktok banyak dah kasusnya.

Reno : Tiktok tuh banyak hoaks..

Arul : Tapi sudah ada bujuran kejadian, kam kira hoaks wara kah.

Bongek : Apa garang nih yang dikisah akan?

Arul : Badiam ha ikam, uyuh mangisahkan ka ikam nih, kada mau jua nyambung di pandiri.

Tiba-tiba Mita muncul dengan keadaan tergesa-gesa dan wajah yang cukup kusut.

Mita : Ka, tolong ka. (Sambil memegangi tangan Reno)

Reno : Kenapa nih?

Kemudian Acil Biah muncul sambil membawa pemangkung.

Acil Biah : Mita, bulik kada ikam. Kalo pina ku pangkung kena.

Mita : Kada handak, ulun kada handak dijodohakan.. jakakah bungas, ngini kaya lidi yang handak di jodohkan ka ulun.

Acil Biah : Baapik muntung ikam, Lakasi bulik. Minggir ikam Reno, kalo pina ikam ku suruh warga kampung mahancur rumah ikam, wani membawa anakku.

Mita : Mun mama Kayani tarus, baik ulun kawin lari ja wan Ka Reno.

Arul dan Bongek hanya bersembunyi di belakang Reno dan Mita karena tidak mau terlibat percekcokan.

Arul : Uma, ai hakunnya Reno bisi mertua kayani. Baik bacari bini kelain pang aku.

Bongek : PMS kah sidih Rul?

Arul : Kada tahu dah aku, mau ikam nih lagi keadaan genting sawat ja kirip telinga.

Acil Biah : HEH, kam badua jangan wani-wani lah memandirakan aku dari belakang, pina ku pangkung.

Arul : Aih, nyarak banar kalinya pendengaran sidin.

Reno : Cil, tenang dulu cil. Kayani nah, bari ulun waktu dua hari gasan mencarikan mahar gasan Mita, ulun janji dua hari dapat dah Mahar gasan Mita.

Acil Biah : Pina musti ikam nih, dapat duit datang mana ikam, yakinlah bakalan dapat ikam duitnya?

Reno : Yakin bu ai, amun ulun kada menepati, ulun kada bakalan lagi memaraki Mita.

Mita : Ka, babujur pian Ka, dari mana pian duitnya?

Reno : Ayuja, percaya ja wan aku.

Acil Biah : Bujuranlah, kuhadangi ku pang sampai dua hari, mun kadada jua habarnya, jauhi anakku.

Reno : Inggih cil, Insyaallah. Mita ikam bulik gin dulu, jangan sampai ikam durhaka jua wan mama ikam.

Mita : Inggih ka, Assalamualaikum

Reno, Bongek, Arul : Walaikumsalam.

Mita dan Acil Biah meninggalkan panggung.

Arul : Umaleh, ngerinya calon mintuha ikam. Kam yakinlah kada di pukuli sidin mun sudah jadi menantu.

Reno : Kadanya ah kalo, ya sudah gin aku handak bulik dulu. Ada gawian di toko Paman Isra.

Arul : Ayuja, mudahan ai lah kam kada kena tipu.

Reno : Tanang ha, badahululah Assalamualaikum.

Arul : Walaikumsalam.

Reno meninggalkan panggung.

Arul : Uma heh, bisi kawan kadada yang beresnya. Hakun ja membari 50 juta ke orang asing. Ya lo Ngek?

Bongek : Bujur tuh..

Arul : Bujur napa nih, curiga aku pasti kada nyambung pulang dipandiri. Ai, Betewe ada apa nih pina rapi banar baju?

Bongek : Hah? Pina rami?

Arul : Baju, kanapa pina rapi?

Bongek : Hah, rompi? Kada bisi aku..

Arul : Ya, Salam… Tobat jua aku nih heh bisi kawan kayani.. ( Arul memperhatikan dengan detail pakaian Bongek, memakai kemeja dan celana formal.)

Arul : Kam diterima bagawi kantoran kah?

Bongek : Hah?

Arul : Kada jadi gin, uyuh aku memandiri.

Bongek : Ohhh, nih gasan tetamu ayang Jeje aku, kami janjian handak ketamuan hari ini.

Arul : Hakunnya leh binian bungas kayatu lawan ikam yang bisi telinga redup.

Bongek : Lampu sapa redup?

Arul : Ah, mauk. Aku bulik gin dah.. Assalamualaikum…

Bongek : Assalamualaikum…

Arul : (Menarik napas, berusaha sabar) Walaikumsalam…

Arul meninggalkan Panggung, kemudian masuklah dua polisi yaitu Sasan dan Bubu yang sedang berpatroli dan mencari pelaku penipuan. Sementara Bongek fokus main hp di gardu.

Sasan : Manurut informasi, ujarnya penipu tuh sering banar lewat daerah ini mencari mangsa.

Bubu : Bujuran lah?

Sasan : Maka tadi hanyar di sambat pembakal. Kada pulanglah ikam.

Bubu : Ingat ai, tapi maksudku nih tempat nih pina sunyi banar, kadada urang yang lewat nah dari tadi.

Sasan : Mungkin ini masih balum jamnya lagi, tapi jua manurut informasi dari para korban. Penipunya nih memakai baju kaya urag kantoran kitu, inya pakai kemeja, lawan salawar yang pina formal kayatu.

Bubu kemudian melihat kebelakang, memperhatikan Bongek yang penampilannya mencurigakan. Kemudian Bubu berbisik pada Sasan.

Bubu : Heh, coba ikam itihi urang dibelakang kita, ciri-cirinya sama persis wan yang ikam sambat tadi.

Sasan : Ai, hi ihlah. Tapi bujurlah itu yo urangnya, ai ikam asalnya tuh pas kejar-kejaran wan pelaku sawat lo melihati muhanya, bujurlah kayatu muhanya.

Bubu : Nahh, itu masalahnya… Aku kada ingat…

Sasan : Heh ai, ngalihnya bisi kawan ingatan jangka pendeknih…

Bubu : Tapi, mun aku ingat-ingat pulang lo, mirip pang muhanya.

Sasan : Ai, babujur kalo pina salah tangkap kita kena.

Bubu : Bujuran, kali ini aku yakin.

Sasan : Nah, gas ai mun kayatu, nyata kita bisa naik pangkat, loko pina kawa jadi kapten kita.

Bubu : Tapi lo, kayaknya harus kita pastikan pang dulu. Coba kita takuni inya.

Sasan dan Bubu menghampiri Bongek.

Sasan : Permisi, pian nih tahukah dimana tempat judi bola.

Bongek : Oh, tahu banar.. ada ai parak sini.. (Karena Bongek yang pendengarannya redup, maka Bongek sebenarnya tidak tahu apa yang dipertanyakan kedua polisi tersebut.)

Bubu : (Bertanya semakin curiga) Uh, pian berarti pianlah salah satu orang yang mengadakan judi bola tuh.

Bongek : Bujur banar tuh…

Sasan : Berarti ikam kah pelaku penipuan yang sering terjadi dikampung nih?

Bongek : Nah, bujur banar tuh!

Sasan dan Bubu langsung menangkap Bongek.

Bongek : Ai, kenapa nih!

Sasan : Kam kami tangkap, karena telah mengaku sudah jadi pelaku.

Bubu : Bujur tuh.

Bongek : Ai, aku lagi mehadangi ayang ei handak dibawa kamana ai…

Sasan dan Bubu membawa Bongek untuk di Introgasi, panggung kemudian kosong.

Black Out

Hari berganti, lampu fate in, memperlihatkan Reno yang wajahnya senang karena tim yang dia pilih untuk judi bola telah memenangkan pertandingan.

Reno : Alhamdulillah, menang kalinya tim yang aku pilih semalam. berapa yo dapatnya? Sampailah yo 1 M? Tumat lafi berarti kawa aku mengawini Mita. Tapi mana you rang yang sumalam, jarnya janjian di sini jam 10 mun aku menang, kanapa pina kadada mancungul ja masih. Parak dah jam 12 heh.

Kemudian Arul muncul dengan wajah terlihat panik sambil membawa koran.

Arul : No, ikam tahulah… (Masih dalam keadaan kelelahan.)

Reno : Tahu kenapa?

Arul : Pinanya ikam di tipu!

Reno : Maksud ikam?

Arul : Coba kam baca sorang!

Reno : Aih, maka ini urang yang membari ku proyek semalam.

Arul : Hi ih, tadi aku melihati koran, beritanya jarnya terungkap satu muha penipu yang judi bola tuh, mengkanya aku menamui ikam, memastikan bujur kada muhanya. kalinya Bujur lo?

Reno :  Kayapa nih, sabarataan duit tabunganku hilanglah berarti… Kayapa ini Rul!

Arul : Tenang dulu tenang, aku mendangar habar polisi jua sudah mulai menyelidiki kasus nih jar.

Reno : Kayapa mun missal pelakunya kada dapat, habis lalu duitku Rul ai.

Arul : Kam jua sudah kupadahi dari semalam, jarku jangan percaya wan judi bola! Kam kira kawa gampang kah kita gasan dapat duit banyak dalam sekilas ja.

Reno : Aku nih terpaksa Rul ai, aku kada kawa lagi mencari solusi gasan maharnya Mita. Harau kayani te jadinya.

Arul : Aku paham No ai, tapi ada pepatah Baapik-apik kalo pina tabarusuk. Bahati-hati, nah te buktinya kam terlalu percaya wan urang timbul am tabarusuk. Kam boleh lagi dalam keadaan urjen tapi jangan sampai jua ikam kahilangan akal ikam jadi main judi. Judi tuh kada bakal menyelesaikan masalah ikam.

Reno terlihat meratapi kebodohannya, baru sadar jika yang dikatakan temannya benar. Namun, tiba-tiba Mita datang dengan wajah panik.

Mita : Ka tolong ka!

Arul : Ai, tolong kenapa nih?

Mita : Mama ulun ka.. mama ulun…

Reno : Kenapa mama ikam?

Kemudian masuklah Sasan, Bubu, dan Bongek…

Bongek : Arul! Reno tolongi aku!

Arul : Napa pulang ngini, sabuting kena tipu, sabuting mamanya jua kanapa, ngini pulang kanapa jadi pina kaya tahanan… timbul aku asa bingung nah…

Sasan : Inya mengaku jarnya inya pelaku penipuan judi bola, ini handak kami bawa ke kantor polisi terdekat. Dari malam tadi kami introgasi kadada mengaku, malah bepandir kasana kasini.

Reno : Ikam jua pelaku penipuan judi bola kah Ngek?

Bongek : Buhannya tolongi, aku kada tahu kanapa aku di tangkap, jar buhannya semalam betakun masalah rumah, ku jawab ai, kalinya malah di tangkap.

Arul : Ai, pinanya nih ada kesalah pahaman pang pak polisi ai.

Bubu : Maksudnya kayapa?

Arul : Jadi kawan  ulun nih ada masalah pendangaran, pendangarannya nih pina redup, jadi bisa jadi inya nih jua asal sahut ja padahal lain yang ditaku akan.

Sasan : Ai, berarti salah tangkap kah kita nih?

Bubu : Bisa jadi.

Sasan : Ai, ringannya muntung nyambat bisa jadi, nyawa semalam pina bakaras inya jar ikam pelakunya.

Bubu : Ai mana ada.

Arul : Hadang dulu, ini Mita nih balum manuntungkan pandirannya. Jadi kenapa mama ikam Mit?

Mita : Mama ulun di tangkap!

Reno&Arul : Hah ? Ditangkap?

Bongek : Hah?

Kemudian muncullah Pembakal, bersama Jeje, serta Sahrul dan Acil Biah yang seperti dalam posisi ditangkap.

Reno : Ai, ikam lo pelaku penipuan judi bola sumalam. Bulikkan duitku! (Reno berteriak pada Sahrul)

Arul : Hadang, kenapa nih jadi kisahnya Bu Biah di tangkap kada paham nah ulun?

Pembakal : Jadi seberataan tolong tenang dulu nah, jadi Bu Jeje nih adalah salah satu polisi penyelidik kasus penipuan judi bola yang meresahkan kampung nih. Sidin sengaja menyamar jadi warga pindahan sekira kada ketahuan pelaku lamunnya sidin nih polisi.

Jeje : Jadi berdasarkan bukti-bukti yang terkumpul, ulun mendapat bukti yang kuat kalonya dalang dari semua penipuan nih adalah Bu Biah, dan orang yang di sampingnya nih adalah anak buahnya sidin.

Sasan&Bubu : Uhh, jadi itukah pelakunya…

Jeje : Sasan, Bubu. Buhan kam badua nih lah. Kada suah mau bujur bagawian, maka bisa-bisanya jua sampai salah tangkap. Buhan kam bulik dari sini lansung dapat hukuman push up 1000 kali tu pang.

Sasan : Uma pacul am tangan ulun komandan ai, kada sanggup ulun.

Bubu : Inggih komandan ai, ngini kada sawat 1000 gin pingsan dah ulun.

Jeje : Tiwas bagawian tuh kada mau bahati-hati, sukur kada sawat tebawa ke penjara anak urang.

Bongek : Uma, ayang ku kalinya polisi. Sar mantap pian nih yang ai.

Jeje bergidik dipanggil Bongek Ayang.

 Mita : Ma, bujuran kah pian tuh bandar judi bola, penipulah pulang ma pian tuh?

Acil Biah : Maaflah Mita, mama kayani karena mama kadada pilihan lain. Kada kuat hati mama melihati ikam hidup sakit. Bagawi gawian paling rigat gin mama nih rela nak ai, asal kam kada hidup ngalih. Sejak abah ikam meninggalkan kita, hidup kita jadi ngalih karena talilit hutang dari abah ikam. Mama kadada pilihan lain nak ai.

Mita : Ma, ulun adalah minta gasan hidup jadi urang sugih. Ulun nih asal kira hidup berkecukupan gin basukur dah. Ulun sudah bepadah lo, ulun nih kada perlu duit yang penting kita nih kawa saling melindungi. Bacari duit tuh kawa kita cari begimitan.

Acil  Biah : Maafkan mama ikam nih Mita, mama gin akhirnya menyesal sudah begawi kayani. Mama jadi rancak menjodohkan ikam lawan urang sugih, karena mama khawatir kalo pina ikam hidup sakit mun kada kawin lawan urang sugih, mama takutan apa yang mama alami jua terjadi lawan ikam. Gasan Reno, maafkan acillah. Kada bermaksud acil gasan mengalihi ikam mengawini anak acil, tapi acil handak kehidupan masa depan anak acil terjamin wan jangan sampai sakit kaya acil bahari.

Reno : Inggih cil, ulun paham ai, mudahan pian kawa meambil hikmah dari kejadian ini.

Jeje : Nah, pinanya sudah paham ja pang lo inti permasalahannya nih. Pokoknya bahati-bati banar buhan pian, penipuan wayah nih banyak dah bentuknya. Lawan hindari banar judi, kada bakalan ada untungnya. Ayuja pembakal ai, terima kasih banyak sudah mau bekerja sama lawan kami, akhirnya kami kawa menangkap pelaku yang sudah lawas banar kami carii nih. kami permisi. Sanbu, lakasi ke kantor kita. Ingati hukuman tadi.

Sasan&Bubu : Inggih dan.

Jeje, Sasan, dan Bubu pergi sambil membawa kedua tahanannya Acil Biah dan Sahrul. Sebelum meninggalkan panggung Acil Biah bertitip pesan pada Reno.

Acil Biah : Reno, tolong jagakan anak acillah.

Reno : Inggih cil.

Mita : Mama!

Mita menangisi mamanya yang ditangkap, Reno mencoba menenangkan.

Reno : Sudah Mit sudah. Aku bejanji pacangan menjaga ikam.

Arul : Uma ai lah…

Pembakal : Mudahan dari kejadian nih buhan kam berataan kawa meambil hikmanya lah. Terutama ikam Reno ai, segala apapun kesulitan ikam jadi sampai mancari duit pakai cara kada halal. Sukur te tetangkap pelakunya, coba jaka kada, habis am lenyap lalu duit ikam.

Reno : Inggih pembakal ai, kada bakal lagi ulun bajudi.

Arul : Mengkanya jangan pengarasan mun dipadahi tuh.

Reno : Hi ih, maaflah Rul.

Bongek : Jadi apa garang tadih kisahnya jadi batangisan nih?

Semua : Hah ai, BONGEK!!!

 

-TAMAT-