Bacina Buta (Japin Carita)

Naskah Teater Tradisi Japin Carita

BACINA BUTA

Karya: Faisal Refki

(11 September 2023)

(Adaptasi dari Kisah Handap “Bacina Buta” karya Hatmiati Masy’ud)

TOKOH:

Rasidi

Marpuah

Abah Marpuah

Abdurrahman

Acil Mawar

Agus

Usup

Pambakal

BABAK I

MARPUAH MASUK

Marpuah : (gagarunum sambil basasapu)

RASIDI MASUK

Rasidi : kanapa pulang maka haharumbu? Laki hanyar bangun guring sudah diranguti, jaka pang ditawari banyu kah, napa kah. Ni kada, masam muha.

Marpuah : datang dimana pian malam tadi, maka parak subuh hanyar bulik?

Rasidi : aku datang bakawanan di gardu, kanapa?

Marpuah : cah, buhung. Pian ni kada sayang, ka ai!

Rasidi : Napanya? napang nang ikam kahandaki? Sambat haja.

Marpuah : Ulun lapah hudah wan pian ni, pian katuju bangat mawarung, bajalanan bakawalan kada manantu, ulun maka am kada tahirani, tabulik pulang kaya bahari.

Rasidi : Babujur bapandir, kaluku kaya nang masi.

Marpuah : Napang garang, pian handak mamunahakan ulun kah?

Rasidi : Ikam ngini, kada maras kah lawan hubungan kita? Kaluku bujuran, maingui tangis kaina.

Marpuah : Pian nang kada maras, sarik saikit maancam handak mamunahakan, kamahiran!

Rasidi : Ikam luku nang handak?!

Marpuah : Punahakan ulun wayahini jua!

Rasidi : Mun damintu kahandakmu, hiih, ikam kupunahakan!

RASIDI KELUAR

MARPUAH KELUAR

BABAK II

AGUS & USUP MASUK

Agus : sup, aku hiran kam lawan kita badua nih?

Usup : hiran kanapa Gus?

Agus : ca pikirakan, parasaan malam tadi kita bakawanan disini sampai urang maayat lawan Rasidi jua, ni baiuskan maka disini pulang kita bacungul, maapa?

Usup : barang ai maapa kah, daripada dirumah ungut ungut mahabisi baras, baik kasia, siapa tahu ada nang manawari gawian. Barang ham manabas kumpay kah.

Agus : nasib haja pang kita nih Sup lih, kanapa garang bahari kada sakulah babujur, mambulus katiya mambulus wayah sakulah, paampihannya jadi ratik wara.

Usup : kada kawa ai kawan ai, takdir sudah ngarannya.

Agus : takdir nang disalahakan. Jaka ada gawian pasti, nyaman kawa babini, lihati Rasidi, nyamannya inya baisi bini hudah, ada haja kawan guring.

Usup : parasa ikam banarai nyaman si Rasidi tuh, takuni ha inya, lapah jua ai maungkusi bini.

Agus : paling kada han ada haja kikipungan, kita ni am dimapa? Kamana mangadu?

ACIL MAWAR MASUK

Acil Mawar : nahh.. pas banar, Agus lawan si Usup. Ey buhan ikam badua, sungsungnya mahantayung digardu, maapa?

Agus : mahadangi dapat razaki cil ai.

Usup : datang dimana pian cil?

Acil Mawar : aku imbah maantar anak ku sakulah, ni handak kapasar. Ey ey ey.. buhan ikam baisukan tadi mandangar lah urang baabutan?

Agus : baabutan napang? Urang manyinsu kalu dihutan.

Usup : atau bisa jua urang manyatum aspal di darat situ.

Acil Mawar : lain. Rasidi lawan Marpuah!!

Agus & Usup : ay, kanapa pulang?

Acil Mawar : bah, nang kaya ajin ai, bakalahian pulang, napa kah tu nang dihualakan pina bahahampas piring. Panas talingaku mandangar dihiga rumah.

Agus : naahhh.. bisa gara gara malam tadi saku kita bulikan parak subuh.

Usup : bujur, ikam jua pang manahani si Rasidi sakira kada sungsung bulik, maka tahu haja bininya kada katuju amun si Rasidi kalawasan bakawan.

Agus : ay kanapa maka aku, aku tuh sudah handak bulik, tapi buhanmu nang kada mau mangalah main catur, tu gin amun kada urang maayat di langgar bisa kada babulikan.

Acil Mawar : uuuu.. buhan mu badua kah nang mambawai si Rasidi bakawanan sampai subuh, hayuu. Ayuha lah, aku handak balakas kapasar nah, kaina habisan iwak. Assalamuallaikum.

Agus & Usup : waallaikumussalam

ACIL MAWAR KALUAR

Agus : kayapa nih Sup, bajauhan haja kah kita matan sini, musiyah Rasidi kasia, aku asa kulir batamu wan urang imbah bakalahi nih, kaluku tapalit gatahnya kita.

Usup : hiih, sama ai jua. Pantas ai pas aku turun pada rumah handak kasini tadi, aku tasulisih lawan Marpuah, pina mambawa tas ganal ha, ku kira handak tulak ka banjar saku.

Agus : bah, nyata dah bulik karumah kuitannya, bapunahan pulang saku.

Usup : umai leh, amun sawat bapunahan, talu kali dah, kada kawa diapa apai lagi tu.

Agus : iya am dah. Lakasi ha dah kita bajauhan nah.

AGUS & USUP KALUAR

BABAK III

MARPUAH MASUK

Marpuah : (sambil manangis basisigan) purun banar pian ka ai mamunahakan ulun, talu kali hudah, kada pacang kawa lagi kita babulikan, kada tahu lagi dah ulun kayapa kainanya.

ABAH MASUK

Abah : umai umai Marpuah, asa marista aku malihat ikam ingui ingui manangis, gasan napa lagi ditangisi si Rasidi tuh, babubuang banyu mata. Jaka aruah mamamu masih hidup, tahu ikam manangis kaya ini, bisa sakit hati banar saku sidin. Dah ampih lagi manangis.

Marpuah : (sambil manyapui banyu mata) inggih bah.

Abah : awas haja bila si Rasidi tuh wani kasini, kada ku baraiakan tu pang manjajak rumahku, apalagi sampai manamui ikam Marpuah ai. Dasar binahung karing!

RASIDI MASUK

Rasidi : (matan luar rumah bahiyau) assalamuallaikum

Abah : (lakas mangaluari) Bamandak, ikam kada kubariakan manjajak rumahku. Binimu ngini kada kawa dimantuki lagi. Hudah talu kali ikam mamunahakan.

Rasidi : Ulun bah ai, handak batamu lawan anak pian.

Abah : Kada kawa, ikam mandangarah? Bulik ikam. Aku kada rigi rumahku dijajak minantu nang kada tahu dibasa ngini, babaya bakakalahi bapunahan. Sutil bangat ikam mamunahakan binimu. 

Rasidi : tapi bah…

Abah : bajauh, bulik jar ku! Lakasi!!

RASIDI KELUAR

Abah : ikam Marpuah ai, masuk kakamar, ampih lagi manangis, bari supan kadangaran urang.

Marpuah : inggih.

MARPUAH KELUAR

Abah : dasar jua kakanakan wayahini, macam-macam kalakuan, bilang sadang.

ABAH KELUAR

BABAK IV

MARPUAH MASUK

RASIDI MASUK

(Rasidi manyambang Marpuah nang imbah batatapas ka jamban)

Rasidi : Ding, hadangi hulu, kaka handak bapandir. Ding, kita babulikan haja, hakun lah? Maras kaka ding ai.

Marpuah : Kada kawa, jar abah pamali.

Rasidi : Munnya kaka mandatangi abah pang kaya apa, bapadah? Kita bubujur sakali ni, dingai, kada sarana bakalahian lagi. Kaka jua pang nang tasalah. Kaya apa am ding?

Marpuah : Tasarah haja ka ai.

Rasidi : Kaina malam ding lah, kaka karumah. Mudahan abah ampih dah sarik.

Marpuah : (baunggut) bajauh dah pian, kaluku ada nang malihat, kada nyaman. Ulun handak bulik jua nah.

RASIDI KALUAR

MARPUAH KALUAR

 

BABAK V

ABAH MASUK

Abah : (maitihi gambar umanya Marpuah) ding, kayapa jua nasib anak kita saikung nih, maras aku malihat, saban malam ingui ingui manangisi bakas lakinya si Rasidi tuh. Tasalah kah yu aku mahakuni Marpuah kawin lawan Rasidi samalam tuh? Jakanya tahu cagar anak kita sakit hati kaya ini, kadanya hakun aku mangawin akan Marpuah lawan Rasidi. Jakanya ikam masih ada, kawa haja ikam mangawani inya disini. Ya Allah ai, mudahan kami disini kuat haja, mudahan ikam disana tanang haja jua. 

RASIDI MASUK

Rasidi : Assalamuallaikum.

Abah : Waallaikumussalam, nangapang habar rasidi?

Rasidi : Ulun ngini bah ai, bailang ka sia handak batamuan lawan anak pian, asa kaganangan ulun. Wan jua, bah ai, ulun ni handak bamantukan pulang wan Marpuah.

Abah : Ikam ngini Rasidi ai, hudah talu kali ngini nah mamunahakan Marpuah, purun haja lagi lih handak mambuliki. Pamali managuk liur saurang nang hudah taludahakan.

Rasidi : Dimapaam bah?

Abah : Kada kawa, rasidi ai. Hudah talu kali ngitu kada kawa bamnantukan lagi nang kaya masi. Ikhlasakan haja hudah. Mun ikam bajudu pulang wan Marpuah, kaina ai mahadangi Marpuah balaki kalian hulu, basarakan, hanyar kawa pulang kawin wan ikam. Mun wahini kada kawa Rasidi ai.

Rasidi : Umai bah, asa kada kawa manyandang ulun. Napang ulun maka kadamia. Sakit pada kayap, bah ai, mun tapisah wan Marpuah.

Abah : Ikam ni Rasidi ai katuju gagarusuh. Matinyaam pandir sarak ngitu kada kawa digagayaakan. Ngini napa napa sarak, saikit-saikit mamunahakan wan bini. Amun maguni handak, kada sarana asa hambus pandir sarak. Tagal, dimapang jua mun hudah kaya ngini. Kada kawa dibuliki baasa kaya sarajin. Amun bubur kawa haja dimakan-makan, ngini hangit dah, Rasidi ai. Manangis banyu mata darah ikam tatapai kada kawa babulik wan Marpuah.

Rasidi : Bah, ulun handak bangat babulikan wan Marpuah.

Abah : Dimapang handak mamaksa, pamali, haram. Batakun ikam ka tuan guru. Magun kah urang nang hudah talak talu kali ngitu bamantukan pulang? Amunnya jar tuan guru bulih haja, ayu aku nikahakan baasa buhanmu malam ngini jua.

Rasidi : Inggih bah ai, suwahai jua ulun batakun. Pamali jar.

Abah : Han, napang tia? Mun hudah tuan guru ngitu nang mamadahi, napang ikam maka handak mamaksa?

Rasidi : Bah, kawinakan Marpuah, bah ai, wan siapakah. Imbah ngitu suruh inya sarak.

Abah : Urang kawin ngitu kada kaya manukar baju, imbah kada sadang kawa dibulikakan.

Rasidi : Bah, tulungi ulun. Ada ai kawan ulun nang kawa disuruh mangawini Marpuah. Abdurrahman ngarannya.

Abah : Umai, kababangatan pintar ikam ngini Rasidi ai.

Rasidi : Imbah pang, maras, bah ai ulun.

Abah : Amun ikam ngini maras kada damintu bakalakuan. (bapikir) ayuha dah, tangah malam dah ari, bulik hudah ikam Rasidi ai. Kaina aku mamandiri Marpuah.

Rasidi : inggih, ni bujuran bah lah. kaina ulun mamandiri Abdurrahman jua bah ai, mudahan inya hakun. Ayuha, ulum bulik hulu. Assalamuallaikum.

Abah : waallaikumussalam.

RASIDI KALUAR

Abah : bah iyaam dah, ayuha, kadapapa jua, mudahan ada haja juduhnya.

ABAH KELUAR

BABAK VI

ABDURRAHMAN MASUK

Aman : bujur jua kah napa jar Agus wan Usup nih, Rasidi handak mambawi aku bapandiran di gardu basanjaan, panting bangat jar, napa kah hajat. Satutumat barang lagi nah kuhadangi,bilanya kada cungul, aku bulik.

RASIDI MASUK

Rasidi : assalamuallaikum

Aman : waallaikumussalam, Alhamdulillah dating jua akhirnya, napa tadih jadi handak mambawi bapandiran?

Rasidi : langsung haja nah Man lah, aku nih handak minta tulung lawan ikam. Mudahan ikam hakun mambantui.

Aman : insyaallah amunnya kawa, pasti kubantui.

Rasidi : aku tahu ikam wyahini balu ditingal mati bini, hakun lah ikam kawin lagi?

Aman : aku nih Rasidi ai hakun haja, tagal, ada lah babinian nang hakun wan aku nang balu nih?

Rasidi : ada!

Aman : siapa urangnya?

Rasidi : Marpuah, bakas biniku.

Aman : ai, hadang hulu, kada salah danger lah aku nih?

Rasidi : kada salah, bujuran. Makanya aku maminta tulung lawan ikam, hakun lah mangawini akan bakas biniku, aku nih handak bamantukan lawan inya, tagal kada kawa lagi, marga kami sudah talu kali talak.

Aman : nah am, batambah bingung aku nah. Nang kayapa kisahnya?

Rasidi : jadi kaya ini, ikam kawini akan Marpuah, tagal babatas talu bulan haja, imbah nitu sarak akan, supaya aku kawa bamantukan lawan Marpuah.

Aman : mohon maaf mohon ampun Rasidi lah, aku kawa wani manggaya akan bakawinan. Maaf banar, aku baundur.

Rasidi : (balutut maminta tulung) tulung banar nah kawan ai, aku kada tahu lagi kayapa caranya, nang kaya ini pang sudah cara nang baik sakira aku masih kawa babulikan lawan Marpuah. Aku sayang banar masih lawan inya. Marpuah lawan abahnya sudah jua kupadahi, hakun haja jua buhannya, ikam nya ja lagi nah kayapa. Tulung banar nah.

Aman : (bapikir satumat) ayuha, ku tulungi, mudahan ikam masih bajuduh lawan Marpuah.

Rasidi : Alhamdulillah, (maragap Aman) tarimakasih banar aku lawan ikam Abdurrahman ai.

Aman : ayuha dah, kaina aku badatang karumah Marpuah. Lamun kayaitu, aku bulik ai hulu nah, sanja dah.

Rasidi : hiih, sama ku handak bulik jua. Baimbai kita.

ABDURRAHMAN & RASIDI KALUAR

BABAK VII

(tadangar dibalakang panggung suara akad nikah “ulun tarima manikahi Siti Marpuah binti Abdullah lawan maskawin saparangkat alat shalat dibayar tunai. Sahh!!”)

AMAN & MARPUAH MASUK

Aman : Ding, ka sia nah, duduk dihiga kaka. Ding, kita ni dua laki bini. Kawin kita ngini kada iincaan, ngini bujuran ding ai.

Marpuah : Inggih ka ai.

Aman : bauntung banar aku disuruh Rasidi mangawini ikam nih Marpuah ai, kada manyangka aku ikam bungas banar. Sayang banar si Rasidi mambuang ikam, pasti manyasal banar inya.

Marpuah : ulun kawa minta tulung lah lawan pian, ulun ni sudah jadi bini pian, salawas ulun jadi bini pian, ulun kada handak mandangar ngaran bakas laki ulun.

Aman : amun ngintu kahandak ikam, ku kabulakan.

(suara abah tadangar matan luar mahiyau mayuruh Marpuah wan Abdurrahman kaluar)

ABDURRAHMAN & MARPUAH KALUAR

BABAK VIII

ABAH MASUK

Abah : (sambil malihati gambar umanya Marpuah) kada karasaan talu bulan hudah umanya ai si Marpuah kawin lawan Abdurrahman, aku malihat asa bahagia banar pang anak ikam nih, himung jua aku malihat. Jaka ikam masih ada, ikam pasti himung jua malihat Marpuah bahagia, ampih marista. Alhamdulillah.

MARPUAH & ABDURRAHMAN MASUK

Abah : umay handak kamanaan?

Aman : handak mambawai bini ulun ka pasar malam bah ai, pian handak minta bawakan napa kaina, jagung bajarang kah? tarang bulan kah?

Abah : abah nih barang haja, napa nang ikam bawa, abah himung.

RASIDI MASUK

Rasidi : (mangagas mangatuk lawang)

Abah : nah siapa bakatuk lawang tuh, bukai pang Man.

Aman : (mambukai lawang)

Rasidi : Ikam ngini, Man ai, bahianat wan janji (manampar Aman). Jar hakun imbah kawin mamunahakan Marpuah, ngini hudah balanggar talu bulan tatap haja.

Abah : Rasidi, bulik ikam matan rumahku. Bila ikam kada bulik, kuhiyawakan pambakal, nyaman ikam ditangkap.

Rasidi : Bah, pian ni jua kada babujuran bajanji. Jar pian hakun mangawinakan Marpuah gasan sarat inya bamantukan wan ulun. Ngini nangapa jua, kadada habar buriniknya lagi. 

Abah : Aku, Rasidi ai, kada kawa manyuruh Aman mamunahakan anakku. Aman wan anakku kada suwah tapahual. Baikan wan mintuha. Ikam bacaramin hulu babujur, disusuri buncu tapih saurang.

Rasidi : Marpuah, kasia ikam Marpuah. Marpuah, ikam hudah bajanji kawin satumat haja wan Aman, manang janjimu, Marpuah?

Marpuah : (sambil mamagut Aman) Purunnya lah pian manyakiti Aman, ulun kada rila.

Rasidi : Buhanmu nang purun, badusta badudua. Jar imbah kawinan, salajur basarakan!

Marpuah : Dimaapang handak bamantukan amun kalakuan saurang tatap haja kada sampuraka. Aman baikan wan ulun.

PAMBAKAL, AGUS & USUP MASUK

Pambakal : Napang kisahnya ngini ti, batangahmalaman ari maka bakalahian, mambari supan, tahu lah!

Rasidi : Pambakal, Marpuah wan Aman ni badusta wan ulun. Jar kawin satumat haja, nyaman ulun bamantukan wan Marpuah. Ngini kada, pambakal ai, buhannya nangini salajur sakalinya. Bajanji tagal badusta.

Pambakal : Rasidi, basabar ikam. Pamali batumburan marga bakas bini haja. Judu ngitu, Rasidi ai, kada kita nang ampun aturan. Ada Allah ta’ala. Ikam babanyak basabar. Mun ikam magun bajudu wan Marpuah, kaina ada haja tu jalannya. Dimapakah takawin haja tu pulang.

Agus : sudah Rasidi sudah, basabar. Bulikan dah kita, bawa batanang.

RASIDI, PAMBAKAL, AGUS & USUP KALUAR

Aman : Ding, salajur bapadah wan kaka nah, ikam ngini magun hajakah handak wan Rasidi? Amun ikam magun haja handak, ding ai, kaka rila haja malapas ikam malam ngini jua. Nyaman buhanmu bamantukan.

Marpuah : Kada ka ai, hudah jua ulun bubulatakan, lulunjungakan, tagal asa kada sanggup jua amun babulikan wan Rasidi. Talu kali sidin, ka ai, mamunahakan ulun. Sadang haja pinanya hudah ulun wan sidin.

Aman : Kaka ni kadapapa, ding ai. Kalukuai ikam kada nyaman nang ngaran hudah tajanji wan rasidi.

Marpuah : Ulun, ka ai, mun pian handak mamunahakan ulun malam damini jua, tasarah pian haja. Tagal, ulun kada pacangan jua bamantukan lagi wan Rasidi ngitu. Ulun hudah talanjur sakit hati. Amun dasar judu wan pian ni habis, maraha ulun balu.

SELESAI

Manugal Haul (Japin Carita)

Naskah Teater Tradisi Japin Carita

MANUGAL HAUL

Karya : Faisal Refki

30 Oktober 2019

TOKOH KARAKTER :

Acil Aluh

Iyud

Suhai

Haji Udin

Baiti

Pambakal

Bini Pambakal

Hansip

Kapala Dinas

SEMUA PEMAIN MASUK SAMBIL MENARI, KEPALA DINAS BERDIALOG

Kapala Dinas : Assalamuallaikum, pangumuman pangumuman, gasan saluruh warga Balangan, desa Juai khususnya, bahwasanya pamarintah sudah mengeluarkan undang-undang hanyar parihal pembakaran hutan wan lahan, hal itu didasari karena banyaknya kebakaran hutan wan lahan nang maakibatakan kabut asap, jadi, bagi pelaku nang kadapatan mambakar lahan akan dikenakan hukuman berupa danda 1.5 miliar sampai 15 miliar rupiah, atau kurungan 5 sampai 15 tahun penjara. Itu haja nang ulun sampaiakan, mudah mudahan dikampung kita kadada lagi kajadian kabakaran hutan atawa lahan, tarimakasih, wassalamuallaikum.

SEMUA PEMAIN KELUAR

IYUD & SUHAI MASUK

Iyud                : Suhai, kayapa jua nasib kita nih, saban hari maungut haja gawian, nasib anak yatim piatu.

Suhai              : ikam sakali lagi bapandir kaya itu ku tampar, ikam jangan manyalahakan takdir marga kita nih yatim piatu, harusnya kita nih basukur masih kawa makan guring, rumah gasan badiam ada haja, untung ada haja masih paacilan nang hakun manggaduh.

Iyud                : bamamai kabisaan, Suhai, aku nih kaganangan aruah mama lawan abah, malam tadi aku tamimpi sidin, dalam mimpi tuh sidin baucap lawan aku, “jangan, jangan, jangan digawi” jar sidin, napa kah maksud sidin tuh lah.

Suhai              : ngintu gasan ikam Yud ai sakira ikam tuh jangan bapacaran tarus hahaaa.

Iyud                : bah ai, kada mungkin amun masalah itu, ikam tuh bahiri banarai marga kadada baisi pacar kaya aku, ya kalo?

Suhai              : gasan napa jua bahiri masalah bapacaran, H A R A M !

Iyud                : musti manyambat haram, mancucuk pintul kada bayar.

Suhai              : nah mahual kakanak nih, handak kapidaraan saku, kasini ikam ku katik ditalinga.

ACIL ALUH MASUK

Acil Aluh        : uma umaaa, kanapa nih babukahan, awak ganal, sasingut tabal masih haja kalakuan manganganak. Ampihan, ni nah acil maulahakan buhan ikam gaguduh tiwadak, makani.

Iyud                : cil, mama lawan abah mahaul kana tanggal barapa cil?

Acil Aluh        : kanapa garang batakun ngintuh, handak mahauli kah? Adalah baisi duit?

Iyud                : kada pang cil ai, handak tahu banarai, nyaman mahadiahi sidin kaina.

Suhai              : mun ada razaki nyaman kaina kita bahaulan, barang ai sasadikit haja.

Acil aluh         : uma lawan abah ikam tuh kana tanggal 11 Jumadil Awal.

Suhai              : kada sampai sabulan lagi cil lah baarti.

Acil Aluh        : iya am, satahun pulang, kada karasaan 5 tahun dah kuitan ikam maninggal imbah kacalakaan samalam lah, saitu jua tu aku manggaduh buhan ikam nih, untung ada buhan ikam nih dirumah, jaka tida sunyi am acil surangan dirumah.

Iyud                : bawa balaki cil ai ampih tu sunyi, hahaaa.

Suhai              : huss, handak katulahan saku kakanak nih lawan paacilan.

Acil Aluh        : handak ai acil nih balaki pulang, tapi kadada nang hakun banarai lawan acil nih, padahal acil ikam nih kurang napa? Amas banyak, awak kancang, pangurihingan ha pulang, iya kalu?

Suhai & Iyud : bubur bajanar,bujur banar !!

HAJI UDIN & BAITI MASUK

Haji                 : Assalamuallaikum

All                   : waallaikumussalam.

Acil Aluh        : ay Haji Udin, masuk ji, napa habar tadih maka bailing karumah? Handak mambawai ulun kapasar kah?

Iyud                : acil lahhh, gas tarus cill..

Suhai              : huss baranai.

Haji                 : anu, acil Aluh ai, aku nih handak minta tolong lawan Iyud wan Suhai, ada gawian gasan buhannya badua.

Acil Aluh        : nah pas banar, Kabul hajat buhan ikam gasan mahauli kuitan ikam, kayapa buhan ikam hakun lah?

Suhai              : tapi bulih tahu lah ji napa gawiannya?

Haji                 : manugal, aku nih handak batanam tahun ini, tampuluh kada musim hujan nah, lahannya pas dibalakang rumahku, nang padang banta tuh. Kayapa kawa lah buhan ikam badua?

Iyud                : oh inggih kawa banar ji ai.

Suhai              : (manarik Iyud kahiga) Yud, hadang hulu, pikirakan lagi, maka wayahini kada bulih lagi mambakar lahan, kalu pina ditangkap urang. Pinanya ngini pang maksud kuitan kita “jangan jangan” di mimpi ikam tuh.

Iyud                : ahh, kada papa, tanang haja ikam, nang ampun lahan nih Haji Udin, insyaallah aman haja. Amun kada ditarima gawian nih kita kada kawa mahaul mama abah.

Iyud                : (kepada Haji Udin) tadi kami sudah barunding, jadi kami kawa haja manggawi manugal tuh, kami tarima.

Haji                 : Alhamdulillah sukur am tu mun hakun, jadi isuk baisukan kaina ikam datangi karumahku maambil alat sagalaan gasan “Manyiaat” lahan.

Iyud                : siap Haji Udin

Haji                 : ayuha sudah, amun kaya itu aku parmisi ai nah, ni pang nah salajur mangganii anak ku si Baiti nih maambil ijasah, handak kuliah jar kabanjar.

Acil Aluh        : uhh Baiti kah nginih, ganal sudah awak lah lawas kada kalihatan, ulun kira bini hanyar pian ji ai.

Haji                 : iya am, inya nih gawiannya bakuhup dirumah haja, kada tapi bisa bamasyarakat bakawanan lawan urang dihiga mahiga rumah, panyupan. Lulus kuliah ku kawian akan ai lagi. Iyalah Baiti?

Baiti                : napa jar abah nih, manyupani ja.

Haji                 : napa nang disupanakan, takuni ja Suhai tuh, (kepada suhai) bujur kalu Suhai, mun ada nang rasuk kawin akan ai lagi, ya kalu?

Suhai              : (supan) aii kanapa jadi ta ka ulun.

Haji                 : hahaa supan si Suhai. Ayuha sudah, aku parmisi hulu nah, kaina talambat, Assalamuallaikum.

All                   : Waallaikumussalam

HAJI UDIN & BAITI KELUAR

Acil Aluh        : Suhai, pinanya haji Udin tuh katuju lawan ikam, siap-siap ai ikam dikawinakan lawan anak sidin.

Suhai              : napa jar pian nih, malalain haja, mana hakun sidin lawan ulun nang kadada gawian nih.

Acil Aluh        : ai, amun Baitinya hakun jua kayapa? Iya kalu Yud?

Iyud                : hajar sanak, ikam lawan Baiti, acil lawan Haji Udin, ulun nang sugih hahaa

Acil & Suhai  : waluh !!

Acil Aluh        : ayuha sudah, buhan ikam badua sadang maangkat banih, tampuluh hari panas nah, nyaman manjamur, lakasi.

Iyud & Suhai : inggih cil !

ACIL ALUH, IYUD & SUHAI KELUAR

PAMBAKAL MASUK

Pambakal       : uma uma, dasar hibat biniku ni lah, saban hari bamasak nang nyaman tarus, samalam bamasak gangan karuh, sapat siam sambal acan, samalamnya pais patin bacacapan, hari ini pina gabul dapur pinanya mambanam papuyu lawan tarung saku ai. Bah, asa pacah liur. (mancium) Ayy, hadang hulu, kanapa nih baunya pina lain, kalaras pisang kah nang tasalukut.

BINI PAMBAKAL MASUK

Bini                 : abahnya… uy abahnya, pian marasa lah pina babau hangit, maka palak pulang?

Pambakal       : hiih marasa ai, ikam kalu bapanggangan iwak?

Bini                 : lain abahnya ai, ulun hari ini balum bamasak

Pambakal       : ay, imbah am bau napa nginih, cucuk ai asa lain baunya

Bini                 : kada tahu jua abahnya ai, kalu pina ada nang manugal banarai pulang.

Pambakal       : nah hiih, pinanya iya ni ada nang manugal pulang, bah iya am ni, maka samalam sudah dipadahi kapala dinas kada bulih lagi mambakar lahan gasan manugal.

Bini                 : tapi abahnya ai, amun urang kada manugal kayapa handak batanam, pian tahu saurang kalu mun mata pancaharian urang dikampung kita nih bahuma. Lawan jua napa nang jar kapala dinas samalam bulih haja mambakar lahan asalkan kada lewat satu hektar per kapala kaluarga.

Pambakal       : tahu ai aku, kaya ini haja gin nah, baik kita lihati langsung haja gin siapa lawan kaya apa manugalnya, bila manyanyalah nyaman ditagur, kalu pina ditangkap urang banarai mun katahuan.

Bini                 : inggih, lakasi dah abahnya ai kita lihati.

Pambakal       : lakasi kita umanya.

PAMBAKAL & BININYA KELUAR

HAJI UDIN & ANAKNYA MASUK

Haji                 : Baiti, kaina bila kuliah ka Banjar bujur-bujur, jangan baramian haja, asal ikam tahu haja nak lah, disana tuh bahaya banar amun kada bisa manjaga diri, disana saraba ada, kukuat iman haja lagi, mun kada kuat iman bisa runtuh ikam nak ai, diganang kuitan ikam nang surangan ni nah.

Baiti                : inggih bah ai, mudahan ulun kawa mambanggakan pian, mudahan ulun lakas tuntung nyaman mangawani pian lagi dirumah.

Haji                 : tapi nak lah, abah ni ada kapikiran bila ikam sudah lulus kuliah, abah handak ikam nih kawin, sakira ada nang mangawani, manjaga ikam, abah nih tuha sudah kalu pina kada panjang umur banarai.

Baiti                : may abah nih, jangan bapandir kaya itu nah.

Haji                 : manurut ikam, Suhai tuh kayapa? Katuju lah?

Baiti                : nah, kanapa maka pian manakuni parihal kaka Suhai, mana ulun tahu.

Haji                 : abah nih ada pang kapikiran handak manjuduh akan ikam lawan inya, bagus haja tuh urangnya, tahu dibasa, baadab lawan urang tuha, lain banar lawan adingnya si Iyud tuh. Ikamnya pang kayapa Baiti?

Baiti                : nah amun ngintu ulun nih tasarah pian haja, pian labih tahu napa nang baik gasan anak pian nih.

Haji                 : ayuha sudah, kada usah dipikirakan hulu, pikirakan kuliah ja hulu.

Baiti                : pian tuh nang mamulai.

ACIL ALUH & HANSIP MASUK

Acil & Hansip: Assalamuallaikum, Haji Udin…

Haji                 : Waallaikumussalam. Kanapa nih pina baabutan?

Acil Aluh        : Iyud lawan Suhai ji ai..

Haji                 : kanapa Iyud lawan Suhai?

Acil Aluh        : buhannya ditangkap urang marga mambakar lahan gasan manugal, aduh, kaya apa nih ji?

Haji                 : Astaghfirullah, bujuran kah? Iyakah Hadran napa jar acil Aluh nih?

Hansip            : inggih bujuran ji ai, ulun saurangan saksinya, pas ulun kuliling kampung malihati buhannya manugal, kada lawas datang buhan polisi managkap Iyud lawan Suhai, ni pinanya polisi lagi mancari siapa nang ampun lahan lawan nang manyuruh mambakar lahan.

Acil Aluh        : ayupang ji, tulungi, kapuhunan buhannya ji ai manugal akan lahan pian, kasihan kamanakan ulun ji ai, buhannya bagawi gasan mahaul kuitannya, tapi maka ditangkap urang, ya Allah ji, tulungi ji…

Haji                 : bah iya am ngalih am urusannya nih.

PAMBAKAL & BININYA MASUK        

Pambakal       : Assalamuallaikum.

All                   : Waallaikumussalam.

Pambakal       : Haji Udin, lahan pian tuh ada nang mambakar kah?

Haji                 : iya ngini pang lagi abut nah mamandirakan lahan tuh.

Pambakal       : kanapa jadi abut?

Haji                 : jalasakan Hadran. 

Pambakal       : napa tadih hadran?

Hansip            : anu pambakal ai, tuh si Iyud lawan Suhai kamanakannya acil Aluh ditangkap polisi.

Pambakal       : ay kanapa? Mabukan kah buhannya?

Hansip            : kada pambakal ai, buhannya ditangkap marga katahuan mambakar lahan gasan manugal ampun haji Udin

Bini                 : nah bujur kalu jar ulun abahnya, ada nang manyalukut kalu, makanya asa palak

Pambakal       : bujuran kah ji? Pian kah nang manyuruh?

Haji                 : hiih pambakal ai aku nang manyuruh buhannya, aku handak batanam.

Pambakal       : nah iya am, maka samalam kapala dinas datang kasini mambari himbauan sakira jangan lagi mambakar lahan, kanapa maka masih haja.

Haji                 : kayapa pang lagi pambakal ai, amun kada manugal kada makan kita, aku nih mata pancaharian bahuma batanam, manugal tuh sudah budaya tradisi kampung kita, matan sabaharian kita nih manugal kada suah ada musibah, asal  manugalnya bujur haja lawan syaratnya tapanuhi.

Acil Aluh        : hiih pambakal ai, kamanakanku kada basalah, inya umpat manggawi akan haja, ayu pang pian sabagai pambakal urusi akan warga kita nang kana masalah.

Pambakal       : ayuha sudah, kita usahakan ai hulu nah, mudahan kawa haja masih diurusi. Acil Aluh, Haji Udin kita ka kantor polisi, ikam Hadran ai awasi haja kampung, padahi warga sakira jangan manugal hulu, amankan situasi lawan kondisi hulu.

Hansip            : siap pambakal.

Pambakal       : ayuha sudah, lakasi kita cil, Haji Udin.

Haji                 : Baiti, ikam dirumah haja lah, jagai rumah.

Baiti                : inggih bah.

SEMUA PEMAIN KELUAR KECUALI BAITI

Baiti                : ya Allah, macam-macam haja kajadian, kada mungkin ada mudarat amun kadada maksiat, mudahan baik haja barataan, mudahan abah kada kanapa napa, mudahan Iyud lawan kaka Suhai kada jadi ditangkap, mudahan pambakal kawa maurusakan, mudahan ada karinganan, aamiin.

SELESAI