Galuh Kumala Sari

GALUH KUMALA SARI

Karya: Faisal Refki

(14 April 2021)

Adaptasi dari syair Galuh Karuang

TOKOH:

Galuh Kumala Sari

Bayan Bastari

Iyang

Aluh Sarintan

Kai Kasan

PROLOG

Bismilah awal kata bamula

Langkahkan kaki kanan wan kiwa

Allahu rabbi Tuhan nang esa

Kalaulah ada salah dikata

Tersebut kisah suatu masa

Adat karasmin aruh banua

Banyak hiburan tiada terkira

Gamalan wayang hujung acara

Adapun Bayan putra bastari

Gagah rupawan muda parlinti

Bamain agung basanang hati

Gamalan wayang barami rami

Bayan Bastari tapikat hati

Malihat Galuh Kumala Sari

Babaju habang giwang baiduri

Apik pasona galung maninggi

Kada pang lapas mata lalaki

Galuh baigal banyanyi nyanyi

Rasa marawan di sanubari

Banyak nang hayal maambil bini

Kada pang lawas singkat carita

tuntung karasmin punya acara

Galuh Kumala bulik lah ia

subarang sungai itu rumahnya

BABAK I

FADE IN

terikat sudah cinta si Bayan

Galuh Kumala dalam ingatan

bulan nang tarang jadi bandingan

elok majlis muda perawan

Rasanya hilang ruh sumangat

Tiada sanang tambah malarat

Tarasa lamah tulang wan urat

Galuh Kumala taingat ingat

Bayan:

Galuh... Galuh Kumala Sari, kahada talapas ingatan diaku kalawan ikam,

carunung mata hawas maitih ikam baigal banyanyi liwar apik. Galung maninggi, giwang

baiduri, umpama bulan nang tarang, elok majlis muda rupawan, dimapa jua diaku ini, rasa

hilang ruh sumangat lamun taingat ikam, tarasa lamah tulang wan urat, kahada sumangat

tambah malarat. Galuh Galuh.. dimapa jua diaku ini.

Berkata Bayan kalawan kawan

Adapun Iyang nang ampun ngaran

Aduhai Iyang dimapa badan

Taingat Galuh rasa dandaman

Bayan:

Iyang.. Iyang dimana jua ikam baandak badan, datangi diaku, tulungi jua

diriku ini.

(IYANG MASUK)

Iyang:

akay akay.. napa jua habar kawanku ngini, kuciak kuciak bakakiawan.

Bayan:

Kalaulah ikam marasa kawan ayu pang Iyang batutulungan marista diri

marista badan tulung pang jangan kapapurunan.

Bayan bapikir didalam hati

Handak badatang supan sendiri

Aduh saudara tulung wakili

Bawa lah duit sapuluh bigi

Bayan:

diaku ngini kaganangan banar kalawan Galuh Kumala Sari nang babaju

habang galung maninggi giwang baiduri, rahatan inya baigal wan banyanyi di karasmin

sumalam, diaku handak badatang batamu inya, tagal rasa supan, damintu jua maksud tujuan

diaku bakiawan ikam, tulung wakili diaku ini bahadap kalawan inya si Galuh Kumala Sari,

lamun ikam hakun, kaina ku bari duit sapuluh kindit gasan sasarah Galuh Kumala Sari.

Iyang:

akay akay, nyaman banar ikam mambuang harta, kadap hati kadap dimata,

lamun damintu kahandak lakiannya, ayuha, baisukan kaina diaku mandatangi Galuh Kumala

Sari gasan manyampaiakan apa maksud wan tujuan si Bayan Bastari.

Iyang balakas manyahut kata

Gampang sekali membuang harta

Barangkat Iyang kasubarang sana

Gasan badapat Galuh Kumala

(IYANG KELUAR)

FADE OUT

BABAK II

FADE IN

Tibalah Iyang bakatuk lawang

Galuh Kumala datang manyambang

Berkata Galuh apalah gerang

Kepada tuan berkata sumbang

Iyang:

assalamuallaikum Galuh Kumala Sari

Galuh:

waallaikumussalam, napa habar hampian kasini?

Iyang:

Duhai puan Galuh Kumala

Adapun alasan datang sengaja

Bayan Bastari maminta hamba

Datang menghadap membawa berita

Galuh:

Kanapa datang seorang tuan

Dimana Bayan nang ampun pasan

Dia itu lalaki atau bukan

Manyuruh urang basimpan badan

Iyang:

Mohon ampun Kumala ningrat, Bayan Bastari itu urangnya panyupan bangat,

bila batamu babinian bilang bapaluh karingat, pacangan ngalih kaina baucap ilat.

Galuh:

lamun damintu langsung haja ucap berita napa habar mambawa warta, Bayan

Bastari itu siapa? Kanapa hampian datang kamari manamui hamba?

Iyang:

adapun ia Bayan Bastari malihat pian wayah karasmin dikampung subarang

baigal banyanyi, matan wayah nintu runtuhlah iman didalam diri, siang wan malam taganang

ganang didalam hati. Lamunnya pian sudi, diaku datang kamari gasan mawakili, ku bawakan

duit sapuluh bigi gasan maminang Galuh ampunnya diri, sudikah pian manarima ini nyaman

pang kita baikat janji.

Galuh:

bujurkah Bayan bamain agung

wayah bawayang subarang kampung

maaf haja kada pang sumbung

kaina marista kada bahujung

padahi Bayan ku kada sudi

kada pang handak ku ambil laki

kada sabanding diriku ini

ibarat langit kalawan bumi

Galuh:

Bayan itu aku lihat bakalakuan kada paruna, tabiat bilang kada

sampuraka, parangai buruk bilang kadada akalnya, perawan mana nang hakun wan inya.

Padahi kalawan inya aku damini kada handak balaki, amun balaki syarat nang dicari, musti

sugih di harta baik di budi gagah rupawan sabanding lawan diriku ini.

Iyang:

umai purunnya Galuh Kumala

baucap damintu dihadap mata

jangankan Bayan aku pun marista

rasa dililit naga partala

Iyang: lamun damintu kanyataannya diaku undur diri mambawa seribu luka dihati, purunnya

pian Galuh Kumala Sari rupa bungas tagal ilat landap kaya belati.

(IYANG KELUAR)

FADE OUT

BABAK III

FADE IN

Malu dihati malu dibadan

Iyang badapat kalawan Bayan

Galuh Kumala berkata enggan

Kasihan Bayan disupanakan

Kecewa hati Bayan Bastari

Galuh Kumala nang dihandaki

Lain diharap lain dinanti

Baucap kata sakiti hati

Duhai si Bayan muda rupawan

Siang wan malam kada guringan

Didalam hati tabayang bayang

Galuh Kumala kapupurunan

Berkata Bayan kalawan Iyang

Dimapa jua badan saurang

Iyang baucap sangatlah berang

Malu dibalas jangan dibuang

Bayan:

lain diharap lain dinanti, Galuh Kumala nang ku samakan kalawan bulan liwar

kapapurunan, nyaman banar inya maambil simpul bahwa diaku kada paruna, bakalakuan

kada sampuraka, sampai disambat bilang kadada akalnya. Sakit, liwar sakitnya hatiku ini

mandangar inya baucap kaya itu, liwar purun ikam Galuh Kumala.

Iyang:

duhai Bayan Putra Bastari, ikam ini lalaki, jangan hakun ikam disasambati,

jangan hakun harga diri ikam dilincai, dijajak jajak babinian, biar kaya apa haja babinian itu bungasnya, langkarnya, tapi lamun sudah inya manggugur akan harga diri ikam, balas, jangan

kada. Diaku sabagai kawan ikam, maambilakan hati parihal perlakuan Galuh Kumala Sari,

diaku kada rila lamun kawanku disasambati. Amun diaku bulih mambari saran, isuk ikam

datangi kawadah Kai Kasan, minta bantuan kalawan sidin gasan manggawi Galuh Kumala

Sari, biar inya tahu kayapa rasannya kada kawa guring siang wan malam, sakira inya umpat

jua marasa akan napa nang ikam rasa.

Bayan:

bujur jar ikam Iyang ai, aku ini lalaki, harga diriku ini labih baharga dari rasa

cintaku kalawan Galuh Kumala Sari. Malam ini jua aku tulak kawadah Kai Kasan gasan

manggawi Galuh Kumala Sari, supaya inya tahu, inya sadar bahwa napa nang inya sambat

sudah mahancurakan hati kalawan harga diriku ini.

Bayan nang sudah kasasarikan

Kadap hati kadap pikiran

Laksana wayang bapaparangan

Mambalas dendam jadi untingan

Pergilah Bayan ke rumah kai

Adapun Kasan ngaran diberi

Sidin tarnama sangatlah sakti

Ilmu ma’rifat pemikat hati

FADE OUT

BABAK IV

FADE IN

Bayan:

Aduhai kai tulungi cucu pian, ulun disambat macam macam, supan banar diri

ulun, harga diri ulun dilincai lincai, babinian nang ulun handaki manyambat ulun kada paruna, kada sampuraka bilang kadada akalnya, inya bangaran Galuh Kumala Sari, kayapa

caranya supaya inya karindangan lawan ulun.

Kai Kasan:

Kasihan banar ikam Bayan Bastari, sauting nang harus ikam tahu bahwa juduh

nintu andaknya didalam diri, jadi biar kayapa haja kita manggawi inya, lamun ujar Allah taala

kada, ya kada. Kanapa hal nintu diaku sampaikan kalawan ikam, supaya ikam jangan talalu

baharap lawan apa nang ikam kahandaki. Parihal ikam handak manggawi si Galuh Kumala

Sari diaku kawa haja mambantu tagal kita baparjanjian dahulu sakira nyaman kainanya, diaku

kada batanggung jawab lamunnya tajadi hal-hal nang kada ikam kahandaki, kayapa?

Bayan:

inggih, ulun bajanji kai, ulun kada bataha mambawa-bawa ngaran pian

lamunnya tajadi hal-hal nang kada ulun kahandaki.

Kai Kasan:

lamun damintu ikam ku bari amalan, amalan nang kawa gasan manggawi si

Galuh Kumala Sari, manggawinya malam sanayan, ingati, iringin napa nang ku sambat.

FADE OUT

BABAK V

FADE IN

Tibalah itu malam sanayan

Bayan masuk dalam peraduan

Kilat pun mancar sambung sambungan

Hujan ribut parlahan lahan

Malikit lilin tinggi sajari

Lilin dijaga janganlah mati

Lalu bapasan ka humbayang diri

Datangi Galuh Kumala Sari

Guruh jauh sahut sahutan

Turunlah angin kadalam badan

Ruh Kumala diambilakan

Basatu lawan humbayang Bayan

FADE OUT

BABAK VI

FADE IN

Galuh Kumala diperaduan

Adapun ia guring surangan

Humbayang Bayan masuk kabadan

Rasa dipagut ragap ragapan

Gusar pang rasa Galuh Kumala

Rupa si Bayan dihadap mata

Berlaku adat dalam bercinta

Dipaluk cium rasanya nyata

Satiap malam baganti malam

Galuh Kumala rabah ditilam

Taambung ambung rasa dibungkam

Bayan manindih manikam nikam

Tersebut pula Galuh Sarintan

Galuh Kumala ia berkawan

Bantu mancari ini soalan

Kanapa Kumala rista ristaan

Sarintan:

umay umay.. sadih banar aku malihat ikam Galuh Kumala, siang wan malam

kada baguringan, taungut nang kaya urang garing, kanapa jua ikam Galuh Kumala?

Galuh:

kada tahu jua diaku aluh Sarintan ai, matan malam sanayan tadi aku marasa

badapat lawan Bayan Bastari.

Sarintan:

Bayan Bastari? Siapa inya tuh?

Galuh:

urang subarang kampung, inya tuh handak lawan diaku.

Sarintan:

nahh… ada salah napa ikam kalawan inya maka sampai tamimpi tarus?

Galuh:

aku hanyar ingat, rahat kawannya datang manamui aku parihal Bayan Bastari

handak maminang diaku, aku bapadah kada handak, aku manyambati inya, malincai harga

diri inya, bisa gagara nintu aku jadi kaya ini, marga maulah lalakian sarik wan sakit hati

kalawan aku, manyasal banar aku didalam badan.

Sarintan:

iya banar lamun damintu kisahnya, mau kada mau ikam patut maminta maaf

kalawan Bayan Bastari.

Galuh:

tagal kayapa caranya, aku supan lamunnya harus bahadap kalawan inya.

Sarintan:

lamun kata kada kawa taucap, badan kada kawa batamu, maka cukup tulisan

nang mawakilakan, bakirim surat haja ikam gasan inya, bapadah haja ikam manyasal bangat

sudah manyambati inya.

FADE OUT

BABAK VII

FADE IN

Siburung dara tarbang ka jambu

Tibalah iya di ambin padu

Diambil Bayan suratnya itu

Mamohon ampun isinya pilu

Galuh:

Duhai ikam Bayan

Bastari Tarima maaf diriku ini

Bodohnya diri ilat belati

Basumbung diri sakiti hati

Siang wan malam rasa marista

Bapuat rabah taguring kada

Bawa pang bulik humbayang raga

Duhai diriku kada badaya

Untunglah Bayan baik hatinya

Dibalas surat Galuh Kumala

Sadikit kata banyak maknanya

Si burung dara nang mambawanya

Bayan:

Kepada Galuh Kumala Sari

Jangan lah engkau bersedih hati

Maafkan jua diriku ini

Dandam dihati kadada lagi

Salah dahulu jangan diungkit

Umpana tali lepas berkait

Sadikit kata sadikit bait

Mudahan ikam kahada sakit

Dibaca surat itu perlahan

Banyu pang mata gugur guguran

Umpama umbak daur dauran

Tangis pang pacah raung raungan

Umpama batu digugur banyu

Hati Kumala semacam itu

Sumbung dahulu kada berlaku

Galuh Kumala handak batamu

Galuh:

kada kusangka, kada kusangka ikam kaya ini Bayan Bastari, napa nang ku

parbuat kalawan ikam umpama tulisan nang ada dipasir pantai, tasapu umbak, hilang barasih

kada babakas, salah diaku manila ikam kada paruna, kada sampuraka, bilang kadada akalnya,

salah banar diaku baucap kaya damintu, diaku sadar sabagai saurang babinian kada patut

baucap kaya daminta kalawan lalakian, kada patut manyupanakan, kada patut malincai harga

diri lalakian, kada patut sama sakali babinian basumbung dihadapan lalaki. Duhai Bayan

Bastari, matan damini aku basarah hati kalawan badan gasan ikam, diaku siap jadi ampun

ikam, sabarataan nang ada diawak ini gasan ikam, aku rila, aku rila…. Diaku cinta kalawan

ikam duhai Bayan Bastari.

Hati Kumala kasasahangan

Singsing tapih lipai kakamban

Lawang lulungkang ditutupakan

Tarabang Galuh karumah Bayan

FADE OUT

BABAK VIII

FADE IN

Satiba Galuh muhara lawang

Kada paduli napa jar urang

Handayang banih dibadan miyang

Itulah rasa Galuh sekarang

Bayan Bastari diam berdiri

Mambuka lawang perlahan hati

Disuruh naik Kumala Sari

Duduk bersanding dekat sekali

Nafsu birahi si laki bini

Sudah tak dapat tertahan lagi

Bayan pang sudah paling mengerti

Mancium Galuh punya jariji

Galuh:

Bayan Bastari bilang terlalu

Susuri tapih tarabang baju

Aduhai Bayan jangan begitu

Bahaya lamun ada nang tahu

Bayan:

Batanang ikam Kumala Sari

Naini rumah kupunya diri

Kada bataha ada nang wani

Lamun lah wani masuk kasini

Galuh Kumala pujaan hati

Tarima haja sudukan ini

Bila pang sayang ikam nikmati

Batanggung jawab janjinya diri

Bayan Kumala berlaku laku

Supan wan malu hilang berlalu

Adat bercinta beradu adu

Berbuat dosa jangan ditiru

SELESAI

Bacina Buta (Japin Carita)

Naskah Teater Tradisi Japin Carita

BACINA BUTA

Karya: Faisal Refki

(11 September 2023)

(Adaptasi dari Kisah Handap “Bacina Buta” karya Hatmiati Masy’ud)

TOKOH:

Rasidi

Marpuah

Abah Marpuah

Abdurrahman

Acil Mawar

Agus

Usup

Pambakal

BABAK I

MARPUAH MASUK

Marpuah : (gagarunum sambil basasapu)

RASIDI MASUK

Rasidi : kanapa pulang maka haharumbu? Laki hanyar bangun guring sudah diranguti, jaka pang ditawari banyu kah, napa kah. Ni kada, masam muha.

Marpuah : datang dimana pian malam tadi, maka parak subuh hanyar bulik?

Rasidi : aku datang bakawanan di gardu, kanapa?

Marpuah : cah, buhung. Pian ni kada sayang, ka ai!

Rasidi : Napanya? napang nang ikam kahandaki? Sambat haja.

Marpuah : Ulun lapah hudah wan pian ni, pian katuju bangat mawarung, bajalanan bakawalan kada manantu, ulun maka am kada tahirani, tabulik pulang kaya bahari.

Rasidi : Babujur bapandir, kaluku kaya nang masi.

Marpuah : Napang garang, pian handak mamunahakan ulun kah?

Rasidi : Ikam ngini, kada maras kah lawan hubungan kita? Kaluku bujuran, maingui tangis kaina.

Marpuah : Pian nang kada maras, sarik saikit maancam handak mamunahakan, kamahiran!

Rasidi : Ikam luku nang handak?!

Marpuah : Punahakan ulun wayahini jua!

Rasidi : Mun damintu kahandakmu, hiih, ikam kupunahakan!

RASIDI KELUAR

MARPUAH KELUAR

BABAK II

AGUS & USUP MASUK

Agus : sup, aku hiran kam lawan kita badua nih?

Usup : hiran kanapa Gus?

Agus : ca pikirakan, parasaan malam tadi kita bakawanan disini sampai urang maayat lawan Rasidi jua, ni baiuskan maka disini pulang kita bacungul, maapa?

Usup : barang ai maapa kah, daripada dirumah ungut ungut mahabisi baras, baik kasia, siapa tahu ada nang manawari gawian. Barang ham manabas kumpay kah.

Agus : nasib haja pang kita nih Sup lih, kanapa garang bahari kada sakulah babujur, mambulus katiya mambulus wayah sakulah, paampihannya jadi ratik wara.

Usup : kada kawa ai kawan ai, takdir sudah ngarannya.

Agus : takdir nang disalahakan. Jaka ada gawian pasti, nyaman kawa babini, lihati Rasidi, nyamannya inya baisi bini hudah, ada haja kawan guring.

Usup : parasa ikam banarai nyaman si Rasidi tuh, takuni ha inya, lapah jua ai maungkusi bini.

Agus : paling kada han ada haja kikipungan, kita ni am dimapa? Kamana mangadu?

ACIL MAWAR MASUK

Acil Mawar : nahh.. pas banar, Agus lawan si Usup. Ey buhan ikam badua, sungsungnya mahantayung digardu, maapa?

Agus : mahadangi dapat razaki cil ai.

Usup : datang dimana pian cil?

Acil Mawar : aku imbah maantar anak ku sakulah, ni handak kapasar. Ey ey ey.. buhan ikam baisukan tadi mandangar lah urang baabutan?

Agus : baabutan napang? Urang manyinsu kalu dihutan.

Usup : atau bisa jua urang manyatum aspal di darat situ.

Acil Mawar : lain. Rasidi lawan Marpuah!!

Agus & Usup : ay, kanapa pulang?

Acil Mawar : bah, nang kaya ajin ai, bakalahian pulang, napa kah tu nang dihualakan pina bahahampas piring. Panas talingaku mandangar dihiga rumah.

Agus : naahhh.. bisa gara gara malam tadi saku kita bulikan parak subuh.

Usup : bujur, ikam jua pang manahani si Rasidi sakira kada sungsung bulik, maka tahu haja bininya kada katuju amun si Rasidi kalawasan bakawan.

Agus : ay kanapa maka aku, aku tuh sudah handak bulik, tapi buhanmu nang kada mau mangalah main catur, tu gin amun kada urang maayat di langgar bisa kada babulikan.

Acil Mawar : uuuu.. buhan mu badua kah nang mambawai si Rasidi bakawanan sampai subuh, hayuu. Ayuha lah, aku handak balakas kapasar nah, kaina habisan iwak. Assalamuallaikum.

Agus & Usup : waallaikumussalam

ACIL MAWAR KALUAR

Agus : kayapa nih Sup, bajauhan haja kah kita matan sini, musiyah Rasidi kasia, aku asa kulir batamu wan urang imbah bakalahi nih, kaluku tapalit gatahnya kita.

Usup : hiih, sama ai jua. Pantas ai pas aku turun pada rumah handak kasini tadi, aku tasulisih lawan Marpuah, pina mambawa tas ganal ha, ku kira handak tulak ka banjar saku.

Agus : bah, nyata dah bulik karumah kuitannya, bapunahan pulang saku.

Usup : umai leh, amun sawat bapunahan, talu kali dah, kada kawa diapa apai lagi tu.

Agus : iya am dah. Lakasi ha dah kita bajauhan nah.

AGUS & USUP KALUAR

BABAK III

MARPUAH MASUK

Marpuah : (sambil manangis basisigan) purun banar pian ka ai mamunahakan ulun, talu kali hudah, kada pacang kawa lagi kita babulikan, kada tahu lagi dah ulun kayapa kainanya.

ABAH MASUK

Abah : umai umai Marpuah, asa marista aku malihat ikam ingui ingui manangis, gasan napa lagi ditangisi si Rasidi tuh, babubuang banyu mata. Jaka aruah mamamu masih hidup, tahu ikam manangis kaya ini, bisa sakit hati banar saku sidin. Dah ampih lagi manangis.

Marpuah : (sambil manyapui banyu mata) inggih bah.

Abah : awas haja bila si Rasidi tuh wani kasini, kada ku baraiakan tu pang manjajak rumahku, apalagi sampai manamui ikam Marpuah ai. Dasar binahung karing!

RASIDI MASUK

Rasidi : (matan luar rumah bahiyau) assalamuallaikum

Abah : (lakas mangaluari) Bamandak, ikam kada kubariakan manjajak rumahku. Binimu ngini kada kawa dimantuki lagi. Hudah talu kali ikam mamunahakan.

Rasidi : Ulun bah ai, handak batamu lawan anak pian.

Abah : Kada kawa, ikam mandangarah? Bulik ikam. Aku kada rigi rumahku dijajak minantu nang kada tahu dibasa ngini, babaya bakakalahi bapunahan. Sutil bangat ikam mamunahakan binimu. 

Rasidi : tapi bah…

Abah : bajauh, bulik jar ku! Lakasi!!

RASIDI KELUAR

Abah : ikam Marpuah ai, masuk kakamar, ampih lagi manangis, bari supan kadangaran urang.

Marpuah : inggih.

MARPUAH KELUAR

Abah : dasar jua kakanakan wayahini, macam-macam kalakuan, bilang sadang.

ABAH KELUAR

BABAK IV

MARPUAH MASUK

RASIDI MASUK

(Rasidi manyambang Marpuah nang imbah batatapas ka jamban)

Rasidi : Ding, hadangi hulu, kaka handak bapandir. Ding, kita babulikan haja, hakun lah? Maras kaka ding ai.

Marpuah : Kada kawa, jar abah pamali.

Rasidi : Munnya kaka mandatangi abah pang kaya apa, bapadah? Kita bubujur sakali ni, dingai, kada sarana bakalahian lagi. Kaka jua pang nang tasalah. Kaya apa am ding?

Marpuah : Tasarah haja ka ai.

Rasidi : Kaina malam ding lah, kaka karumah. Mudahan abah ampih dah sarik.

Marpuah : (baunggut) bajauh dah pian, kaluku ada nang malihat, kada nyaman. Ulun handak bulik jua nah.

RASIDI KALUAR

MARPUAH KALUAR

 

BABAK V

ABAH MASUK

Abah : (maitihi gambar umanya Marpuah) ding, kayapa jua nasib anak kita saikung nih, maras aku malihat, saban malam ingui ingui manangisi bakas lakinya si Rasidi tuh. Tasalah kah yu aku mahakuni Marpuah kawin lawan Rasidi samalam tuh? Jakanya tahu cagar anak kita sakit hati kaya ini, kadanya hakun aku mangawin akan Marpuah lawan Rasidi. Jakanya ikam masih ada, kawa haja ikam mangawani inya disini. Ya Allah ai, mudahan kami disini kuat haja, mudahan ikam disana tanang haja jua. 

RASIDI MASUK

Rasidi : Assalamuallaikum.

Abah : Waallaikumussalam, nangapang habar rasidi?

Rasidi : Ulun ngini bah ai, bailang ka sia handak batamuan lawan anak pian, asa kaganangan ulun. Wan jua, bah ai, ulun ni handak bamantukan pulang wan Marpuah.

Abah : Ikam ngini Rasidi ai, hudah talu kali ngini nah mamunahakan Marpuah, purun haja lagi lih handak mambuliki. Pamali managuk liur saurang nang hudah taludahakan.

Rasidi : Dimapaam bah?

Abah : Kada kawa, rasidi ai. Hudah talu kali ngitu kada kawa bamnantukan lagi nang kaya masi. Ikhlasakan haja hudah. Mun ikam bajudu pulang wan Marpuah, kaina ai mahadangi Marpuah balaki kalian hulu, basarakan, hanyar kawa pulang kawin wan ikam. Mun wahini kada kawa Rasidi ai.

Rasidi : Umai bah, asa kada kawa manyandang ulun. Napang ulun maka kadamia. Sakit pada kayap, bah ai, mun tapisah wan Marpuah.

Abah : Ikam ni Rasidi ai katuju gagarusuh. Matinyaam pandir sarak ngitu kada kawa digagayaakan. Ngini napa napa sarak, saikit-saikit mamunahakan wan bini. Amun maguni handak, kada sarana asa hambus pandir sarak. Tagal, dimapang jua mun hudah kaya ngini. Kada kawa dibuliki baasa kaya sarajin. Amun bubur kawa haja dimakan-makan, ngini hangit dah, Rasidi ai. Manangis banyu mata darah ikam tatapai kada kawa babulik wan Marpuah.

Rasidi : Bah, ulun handak bangat babulikan wan Marpuah.

Abah : Dimapang handak mamaksa, pamali, haram. Batakun ikam ka tuan guru. Magun kah urang nang hudah talak talu kali ngitu bamantukan pulang? Amunnya jar tuan guru bulih haja, ayu aku nikahakan baasa buhanmu malam ngini jua.

Rasidi : Inggih bah ai, suwahai jua ulun batakun. Pamali jar.

Abah : Han, napang tia? Mun hudah tuan guru ngitu nang mamadahi, napang ikam maka handak mamaksa?

Rasidi : Bah, kawinakan Marpuah, bah ai, wan siapakah. Imbah ngitu suruh inya sarak.

Abah : Urang kawin ngitu kada kaya manukar baju, imbah kada sadang kawa dibulikakan.

Rasidi : Bah, tulungi ulun. Ada ai kawan ulun nang kawa disuruh mangawini Marpuah. Abdurrahman ngarannya.

Abah : Umai, kababangatan pintar ikam ngini Rasidi ai.

Rasidi : Imbah pang, maras, bah ai ulun.

Abah : Amun ikam ngini maras kada damintu bakalakuan. (bapikir) ayuha dah, tangah malam dah ari, bulik hudah ikam Rasidi ai. Kaina aku mamandiri Marpuah.

Rasidi : inggih, ni bujuran bah lah. kaina ulun mamandiri Abdurrahman jua bah ai, mudahan inya hakun. Ayuha, ulum bulik hulu. Assalamuallaikum.

Abah : waallaikumussalam.

RASIDI KALUAR

Abah : bah iyaam dah, ayuha, kadapapa jua, mudahan ada haja juduhnya.

ABAH KELUAR

BABAK VI

ABDURRAHMAN MASUK

Aman : bujur jua kah napa jar Agus wan Usup nih, Rasidi handak mambawi aku bapandiran di gardu basanjaan, panting bangat jar, napa kah hajat. Satutumat barang lagi nah kuhadangi,bilanya kada cungul, aku bulik.

RASIDI MASUK

Rasidi : assalamuallaikum

Aman : waallaikumussalam, Alhamdulillah dating jua akhirnya, napa tadih jadi handak mambawi bapandiran?

Rasidi : langsung haja nah Man lah, aku nih handak minta tulung lawan ikam. Mudahan ikam hakun mambantui.

Aman : insyaallah amunnya kawa, pasti kubantui.

Rasidi : aku tahu ikam wyahini balu ditingal mati bini, hakun lah ikam kawin lagi?

Aman : aku nih Rasidi ai hakun haja, tagal, ada lah babinian nang hakun wan aku nang balu nih?

Rasidi : ada!

Aman : siapa urangnya?

Rasidi : Marpuah, bakas biniku.

Aman : ai, hadang hulu, kada salah danger lah aku nih?

Rasidi : kada salah, bujuran. Makanya aku maminta tulung lawan ikam, hakun lah mangawini akan bakas biniku, aku nih handak bamantukan lawan inya, tagal kada kawa lagi, marga kami sudah talu kali talak.

Aman : nah am, batambah bingung aku nah. Nang kayapa kisahnya?

Rasidi : jadi kaya ini, ikam kawini akan Marpuah, tagal babatas talu bulan haja, imbah nitu sarak akan, supaya aku kawa bamantukan lawan Marpuah.

Aman : mohon maaf mohon ampun Rasidi lah, aku kawa wani manggaya akan bakawinan. Maaf banar, aku baundur.

Rasidi : (balutut maminta tulung) tulung banar nah kawan ai, aku kada tahu lagi kayapa caranya, nang kaya ini pang sudah cara nang baik sakira aku masih kawa babulikan lawan Marpuah. Aku sayang banar masih lawan inya. Marpuah lawan abahnya sudah jua kupadahi, hakun haja jua buhannya, ikam nya ja lagi nah kayapa. Tulung banar nah.

Aman : (bapikir satumat) ayuha, ku tulungi, mudahan ikam masih bajuduh lawan Marpuah.

Rasidi : Alhamdulillah, (maragap Aman) tarimakasih banar aku lawan ikam Abdurrahman ai.

Aman : ayuha dah, kaina aku badatang karumah Marpuah. Lamun kayaitu, aku bulik ai hulu nah, sanja dah.

Rasidi : hiih, sama ku handak bulik jua. Baimbai kita.

ABDURRAHMAN & RASIDI KALUAR

BABAK VII

(tadangar dibalakang panggung suara akad nikah “ulun tarima manikahi Siti Marpuah binti Abdullah lawan maskawin saparangkat alat shalat dibayar tunai. Sahh!!”)

AMAN & MARPUAH MASUK

Aman : Ding, ka sia nah, duduk dihiga kaka. Ding, kita ni dua laki bini. Kawin kita ngini kada iincaan, ngini bujuran ding ai.

Marpuah : Inggih ka ai.

Aman : bauntung banar aku disuruh Rasidi mangawini ikam nih Marpuah ai, kada manyangka aku ikam bungas banar. Sayang banar si Rasidi mambuang ikam, pasti manyasal banar inya.

Marpuah : ulun kawa minta tulung lah lawan pian, ulun ni sudah jadi bini pian, salawas ulun jadi bini pian, ulun kada handak mandangar ngaran bakas laki ulun.

Aman : amun ngintu kahandak ikam, ku kabulakan.

(suara abah tadangar matan luar mahiyau mayuruh Marpuah wan Abdurrahman kaluar)

ABDURRAHMAN & MARPUAH KALUAR

BABAK VIII

ABAH MASUK

Abah : (sambil malihati gambar umanya Marpuah) kada karasaan talu bulan hudah umanya ai si Marpuah kawin lawan Abdurrahman, aku malihat asa bahagia banar pang anak ikam nih, himung jua aku malihat. Jaka ikam masih ada, ikam pasti himung jua malihat Marpuah bahagia, ampih marista. Alhamdulillah.

MARPUAH & ABDURRAHMAN MASUK

Abah : umay handak kamanaan?

Aman : handak mambawai bini ulun ka pasar malam bah ai, pian handak minta bawakan napa kaina, jagung bajarang kah? tarang bulan kah?

Abah : abah nih barang haja, napa nang ikam bawa, abah himung.

RASIDI MASUK

Rasidi : (mangagas mangatuk lawang)

Abah : nah siapa bakatuk lawang tuh, bukai pang Man.

Aman : (mambukai lawang)

Rasidi : Ikam ngini, Man ai, bahianat wan janji (manampar Aman). Jar hakun imbah kawin mamunahakan Marpuah, ngini hudah balanggar talu bulan tatap haja.

Abah : Rasidi, bulik ikam matan rumahku. Bila ikam kada bulik, kuhiyawakan pambakal, nyaman ikam ditangkap.

Rasidi : Bah, pian ni jua kada babujuran bajanji. Jar pian hakun mangawinakan Marpuah gasan sarat inya bamantukan wan ulun. Ngini nangapa jua, kadada habar buriniknya lagi. 

Abah : Aku, Rasidi ai, kada kawa manyuruh Aman mamunahakan anakku. Aman wan anakku kada suwah tapahual. Baikan wan mintuha. Ikam bacaramin hulu babujur, disusuri buncu tapih saurang.

Rasidi : Marpuah, kasia ikam Marpuah. Marpuah, ikam hudah bajanji kawin satumat haja wan Aman, manang janjimu, Marpuah?

Marpuah : (sambil mamagut Aman) Purunnya lah pian manyakiti Aman, ulun kada rila.

Rasidi : Buhanmu nang purun, badusta badudua. Jar imbah kawinan, salajur basarakan!

Marpuah : Dimaapang handak bamantukan amun kalakuan saurang tatap haja kada sampuraka. Aman baikan wan ulun.

PAMBAKAL, AGUS & USUP MASUK

Pambakal : Napang kisahnya ngini ti, batangahmalaman ari maka bakalahian, mambari supan, tahu lah!

Rasidi : Pambakal, Marpuah wan Aman ni badusta wan ulun. Jar kawin satumat haja, nyaman ulun bamantukan wan Marpuah. Ngini kada, pambakal ai, buhannya nangini salajur sakalinya. Bajanji tagal badusta.

Pambakal : Rasidi, basabar ikam. Pamali batumburan marga bakas bini haja. Judu ngitu, Rasidi ai, kada kita nang ampun aturan. Ada Allah ta’ala. Ikam babanyak basabar. Mun ikam magun bajudu wan Marpuah, kaina ada haja tu jalannya. Dimapakah takawin haja tu pulang.

Agus : sudah Rasidi sudah, basabar. Bulikan dah kita, bawa batanang.

RASIDI, PAMBAKAL, AGUS & USUP KALUAR

Aman : Ding, salajur bapadah wan kaka nah, ikam ngini magun hajakah handak wan Rasidi? Amun ikam magun haja handak, ding ai, kaka rila haja malapas ikam malam ngini jua. Nyaman buhanmu bamantukan.

Marpuah : Kada ka ai, hudah jua ulun bubulatakan, lulunjungakan, tagal asa kada sanggup jua amun babulikan wan Rasidi. Talu kali sidin, ka ai, mamunahakan ulun. Sadang haja pinanya hudah ulun wan sidin.

Aman : Kaka ni kadapapa, ding ai. Kalukuai ikam kada nyaman nang ngaran hudah tajanji wan rasidi.

Marpuah : Ulun, ka ai, mun pian handak mamunahakan ulun malam damini jua, tasarah pian haja. Tagal, ulun kada pacangan jua bamantukan lagi wan Rasidi ngitu. Ulun hudah talanjur sakit hati. Amun dasar judu wan pian ni habis, maraha ulun balu.

SELESAI