Soerat Koeasa

SOERAT KOEASA

(FAISAL REFKI – 07/03/2018)

TOKOH:

PALUI KAKA (PADUKA)

PALUI ADING

GARBUS

KUITAN PALUI

FIGURAN 1

FIGURAN 2

SETTING TEMPAT DAN WAKTU:

INDONESIA TAHUN 1970

SETTING PANGGUNG:

RUANGAN RUMAH – PINGGIR JALAN – TAMAN - BONGKAR PASANG

SUARA ORANG TUA PALUI DARI MIC

Kuitan             : anak mama nang paling mama sayangi. Ni mama datang manamui ikam lewat mimpi, ada nang handak mama sampaikan lawan ikam nak ai, aku mandangar ikam mambariakan surat perintah kekuasaan gasan ading ikam kalo? Mama tahu ai ikam tuh sayang banar lawan ading ikam, tapi jangan jua sampai mambariakan kekuasaan gasan inya, ikam tahu haja kalo sudah kayapa kalakuan adding ikam tuh, inya tuh kada tapi Panjang akalnya nang kaya ikam, urangnya baambisi banar, karas hati nak ai, amun sampai kekusaan jatuh ta ka inya bisa bisa hancur nagara nak ai. Saran mama sabalum talamabat nak ai ikam datangi inya, padahi kada jadi ikam memberikan kekuasaan tuh. Amun ikam sayang wan masyarakat ikam, ikam kada bataha mambariakan kekuasaan itu ka inya nak ai, wan jua perlu ikam ingat nah nak lah, kita nih negara demokrasi, jadi pemimpin tuh dipilih langsung oleh  masyarakat, lain nang kaya ini pang caranya. Ingati nak lah, jangan sampai ading ikam nang bakuasa. Ingati pandiran mama.

PADUKA TERBANGUN DARI TIDURNYA

Paduka             : astaghfirullah… hiih lah bujur jua jar pian ma ai, saharusnya ulun kada mambariakan kekuasaan gasan ading, kanapa maka aku kada sampai kapikiran sampai kasitu, ngalih ai nang ngaran sayang pang leh, amun kaya itu aku harus mandatangi inya wayhni jua, (MELIHAT TANGGAL) nah hiya am sudah tanggal saini, baarti inya hari ini handak maulah kebijakan nang hanyar nih, musia inya baulah peraturan nang kada msuk akal, pacangan ngalih am ni kaina, haduuhhh,,, ayuha nah aku harus capat mandatangini inya, (MEMANGGIL GARBUS) garbuusss,,, bawakan baju gawian ku wayahni jua, aku handak tulak

GARBUS MASUK MEMBAWAKAN PAKAIAN PADUKA

Garbus             : (MENYERAHKAN PAKAIAN) aiii,, pian nih baganti baju tapi kada mandi, kayapa kisahnya

Paduka             : aku nih bus ai handak bacacapat nah, kada mandi kada jadi masalah jua, awak ku kada babau jua kaya awak ikam

Garbus             : handak kamana garang pian paduka?

Paduka             : jangan banyak batakun, pokoknya ikam iringi aku hari ini, garbus, siapakan mutur nyaman kita tulakan.

Garbus             : maaf paduka ai nah, mutur pian rusak paduka ai

Paduka             : ai rusak kanapa? Maka malam tadi hanyar imbah kita pakai gasan bajalanan

Gabus              : anu paduka ai, malam tadi tuh ulun handak mambarasihi kalo, sakalinya kada ingat manutup kaca jandilanya, pas baisukan tadi ulun pariksa sakalinya dibangkunya hibak tahi ayam paduka ai, sudah ulun barasihi tatap haja babau paduka ai, sampai sampai bapangaruh ka masinnya paduka ai, pinanya masinnya maraju paduka ai imbah mancium tahi ayam tadih

Paduka             : umayyy garbus,, kanapa maka sampai bakajadian kaya itu, amun kaya itu ulur akan hunda ku

Garbus             : maaf paduka lah, maka pian kadada  baisian hunda

Paduka             : ayy hiih lah, jadi pang salain itu napa nang aku baisi?

Garbus             : sapida tinjak

Paduka             : sapida tinjak ? (TERKEJUT BINGUNG) calaka am pacangan uyuh am kita, ayuha sudah turunakan ha sapidanya, daripada kita bajalan

Garbus             : laksanakan paduka

GARBUS KELUAR

Paduka             : (SAMBIL MENGENAKAN PAKAIAN) bapala banar baisi ajudan nang kaya garbus nih, padahal bahari asa kada suah inya nih bakajadian sampai mutur dihirai ayam, garbus garbus,, jakanya kada kawan matan lagi halus ikam tuh bus ai kada bataha pang nyaman kayaini

GARBUS MASUK MEMBAWA SEPEDA

Garbus             : paduka, sapidanya sudah siap

Paduka             : ayuha dah, kita tulakan, ikam tinjak sapidanya aku dibalakang maarahakan jalan

Garbus             : sakali lagi maaf paduka ai nah, ulun nih kada bisa basapida paduka ai, suah lah pian malihat ulun basapida tinjak matan lagi halus? Kada suah kalo, amun ulun pakasa akan mambwa sapida kalo pina kita tacabur ka pucirinan paduka ai.

Paduka             : yaa sallam,,, sarabanya ikam garbus lah hari ini, malambati akau haja, ayuha nah aku nang mambawanya

Garbus             : tapi paduka, masa pimpinan lah nang mambawa, kayapa kaina amun dilihati urang, jatu harga diri pian

Paduka             : mauk, banyak pander ikam lah, sarah ja lagi dah handak kayapa kah, pokoknya kita harus capat hari ini, ikam kawani aku, lakasi babuat

Garbus             : siap !!

PADUKA DAN GARBUS PERGI MENAIKI SEPEDA

SETTING PANGGUNG BERUBAH MENJADI JALAN KOTA

Garbus             : maaf paduka, kita nih handak kamana garang maka pina bagasakan kayaini?

Paduka             : aku nih handak mandatangi adingku garbus ai, samalam tuh aku mambari hadiah ulang tahun gasan inya kalo, nang ngaran inya nih ulang tahun 4 tahun sakali, jadi kubarii inya nih surat.

Garbus             : surat napa paduka?

Paduka             : surat kakuasaan jabatan garbus ai, imbah itu hanyar aku  nih sadar bahwa adingku tuh kada layak masih mandapatakan jabatan tuh, jadi aku nih handak mambatalakan surat tuh, amun lambat kaina inya bakalakuan macam-macam.

Garbus             : ooohh kaya itu kah…

DITENGAH JALAN PADUKA DAN GARBUS DIHADANG OLEH DUA PERAMPOK

Garbus             : paduka.. pinanya kita dihadangi urang pang nah paduka ai

Paduka             : hiih bus ai, kayapa kita nih?

Garbus             : hadapi ai

Paduka             : muha ikam, lihati tu nah buhannya mambawa sinapang, amun kita lawani pacangan KO kita

DUA PERAMPOK TADI MENGHAMPIRI PADUKA DAN GARBUS

Rampok 1        : turuuunnnnnn !!! lakasiiii !!!!

Garbus             : ampuuunn… jangan rampok kami, kami kadada baisian harta

Rampok 2        : dustaaaa !! pilih nyawa atau harta?

Paduka             : (KEPADA GARBUS) ikam tanang haja, biar aku nang maatasinya. (KEPADA RAMPOK) amun aku mamilih harta kanapa garang?

Rampok 1        : uuuuu malawan kah, handak linyak saku ikam nih

Paduka             : ikam kada tahu lawan aku kah… (MEMERAGAKAN KUNTAU) majuuu !!

Rampok 2        : (MENODONG SENAPAN) nahh,, sadikit haja ikam bagarak pacah kapala

Paduka             : heheee,,, ayuha dah, buhan ikam culas pang pakai sinapang, ambil ha situ samua harta kami, tapi jangan diapa apai kami

Rampok 1        : yaa tu nang kaya itu, jangan pina musti handak malawan, sinih mana harta buhan ikam

Paduka             : (MENYERAHKAN HARTA YANG DIBAWANYA) itu haja nang kami bawa, kami urang sakit jua.

Rampok 2        : sapida nih ampun ikam jua kalo? Kami bawa jua lah, kami uyuh bajalan. Dadahhh..

DUA PERAMPOK MENINGGALKAN PADUKA DAN GARBUS DENGAN MEMBAWA SEPEDA MERAKA

Paduka             : garbus, aku batakun lawan ikam? Fungsi ikam nih napa? Ikam nih ajudan ku kalo, kanapa maka kadada handak malindungi aku, bapala banar ikam  ni lah.

Garbus             : kayapa pang paduka, jakanya buhannya tadi kada mambawa sinapang wani ai ulun

Paduka             : ahhhh ikam nih, ni nah kayapa kita nih, habis dah harta, sapida dibawa urang, mau kada mau ai kita bajalan batis sampai katujuan.

Garbus             : kayapa pang lagi..

Paduka             : ayuha sudah lakasi nah kita lanjutakan, ikam tatap iringi aku, jangan kamana mana

Garbus             : laksanakan !

PADUKA DAN GARBUS MELANJUTKAN PERJALANAN MENGGUNAKAN JALAN KAKI

SETTING PANGGUNG BERUBAH MENJADI TAMAN

Garbus             : paduka, uyuh…

Paduka             : umayy leh bus, ikam tuh ajudan ku, saharusnya ikam tuh kuat, hanyar ja kita bajalan sudah uyuh lah?

Garbus             : kayapa am paduka ulun kadada makan lagi saharian

Paduka             : sama haja kita kada makan lagi bus ai

Garbus             : aduuhhh.. kada sanggup lagi nah paduka ai.. istirahat paduka

Paduka             : aduuhh aii ikam nih malambati haja bisanya, ayuha dah parak sini rasanya ada taman, kita istirahat disana hulu satumat

Garbus             : alhamdulillah….

PADUKA DAN GARBUS TIBA DITAMAN

Paduka             : ayuha hulu kita dudukan satumat, satumat haja tapi lah, karna waktu kita sadikitannya lagi

Garbus             : inggih paduka…

Paduka             : bus, aku handak bakisah lawan ikam nah bus lah, ikam tahulah kanapa aku jadi handak banar manamui inya wayahinian jua, malam tadi aku dimimpii kuitanku bus ai, jar sidin amun sampai inya berkuasa, nagara nih pacangan kacau bus ai. (MENENGOK GARBUS YANG SEDANG TERTIDUR) uma umaaa… bapala lih garbus baliuran aku bakisah inya maka nyaman banar guring.

DUA ORANG WARIA MASUK DAN MENGGANGGU

Banci 1            : wowoww, ada mangsa cyiin..

Banci 2            : ulala bala bala. Capcus cyinn kita kipung

Paduka             : astaga. Makhluk napa ngintuh. Pina banyala-nyala, dilihat kaya babinian tapi batis baotot, dilihat kaya lakian katiya kalakuan kaya babinian, inya tuh manusia kah lain.

Banci 1            : haaayyy.. godain kita dong

Banci 2            : handak pakai tikar kah atau handak beralaskan tanah yang penuh gairah.

Paduka             : hus hus. Bajauhan nah jangan baparak wan aku, marigat huss…

Banci 1            : hah, ikam nyambati kami nih marigat kah? Ulalaaa. Kada tahu lawan servisan kami lagi  nih, muacchh

Banci 2            : btw, maapa nih ikam ditaman surga ini?

Paduka             : eee… (MENIRUKAN SEORANG WARIA) aku lagi mangipung mangsa ciinnn… lihati, mangsanya tulai cyiinn imbah ku hirup, muacchhh

Banci 1            : ayyy,,, bancir jua kah nyawa nih?

Paduka             : iyaa cyyiinnnn…

Banci 2            : bahh. Wani ikam lah maambil jatah kami, ini nih wilayah kakuasaan kami, ikam janggan bacari mangsa disini

Paduka             : ihhh aku kada mancari mangsa disini, aku mangipung disini banarai.. eh eh, buhan ikam tahulah, si mangsa ku nih kuat banaarrr.. tadi sudah 3 kali inya tulai imbah tuh inya bangun pulang, maka duitnya banyak cyiinn..

Banci 1            : ulalaaa, bagi bagi pang, kami nih saharian dah balalah kada dapat mangsa lagi.

Paduka             : ayuha, hakun ai aku babagi wan buhan ikam, tapi ada syaratnya

Banci 2            : napa tuh syaratnya cyyiinn..

Paduka             : bukan ikam  jangan mangipung disini, bajajauh kasana tu nah.

Banci 1            : emmm,, ayuha dah, akurr…

Paduka             : okee.. banguni ja inya tuh, bawa ha lagi kamana kah

PARA BANCI MEMBANGUNKAN GARBUS KEMUDIAN MEMBAWANYA

Garbus             : ayyy kanapa nih, handak dibawa kamana aku

Paduka             : maaf garbus, buhannya handak lawan ikam, aku kada kawa malawan

Garbus             : eyyyy jangan bawa aku, bancir laknat, jangan japai aku, jangaaaannnn….

GARBUS DIBAWA OLEH KEDUA BANCI KELUAR

Paduka             : bapala banar bancir nih, maaf ai garbus ai aku manyurung ikam, mudahan ikam diberi ketenangan ja disana. Haduhh macam macam haja hari ini ditamui, pamulaan tadi rampok, habis hartaku diambilnya, ni tadi pulang bancir pulang nang datang, untung kawa diakali. Hadang, kanapa lah parasaan ku antara rampok lawan bancir tadi pina ada mahiripnya yo? Ooo, katahuanku sudah, pantas ai, awas ja lah buhan ikam mun tatamu aku lagi, aku kada bataha kalah tu pang. Ayuha dah, amun kaya itu paksa ai dah malanjutakan surangan nah.

TIDAK LAMA MASUKLAH PENGEMIS

Pengemis         : paman, sumbangannya paman, kasihani ulun paman

Paduka             : astaghfirullah, marasnya ikam ding, kuitan ikam mana?

Pengemis         : kuitan ulun lagi baganti baju (KECEPLOSAN) upss, maksud ulun sidin lagi bapintaan jua paman ai

Paduka             : ohh.. barapa umur ikam ding? Kada sakulah kah?

Pengemis         : umur ulun hanyar 10 tahun paman ai, ulun kada kawa sakulah, makan haja ngalih paman ai apalagi bayar sakulah

Paduka             : ohh 10 tahun kah hanyar umur ikam, tapi kanapa maka pina tuha yo?

Pengemis         : nyata ai pina tuha, ulun makan makanan basi tarus paman ai

Paduka             : umay marasnya ikam ding, ikam tahulah ding mama ikam tadi hanyar ja imbah dapat duit banyak ding ai dibarii bos

Pangemis         : babujur, bapala banar inya nih kanapa  maka kada bahabar wan aku (KCEPLOSAN) opss..

Paduka             : husss, kanapa maka bamamai, kada boleh kaya itu lawan kuitan, kuitan ikam kah lain?

Pengemis         : ulun saking himungnya tadi paman ai heheee

PENGEMIS LAINNYA MASUK

Pengemis 2      : assalamuallaikum, paman sumbangannya paman. kasiani ulun

Pengemis 1      : nah  ni nah kuitan ulun paman ai

Paduka             : (KEPADA PENGEMIS 2) pian bujuran kuitannya inya nih kah?

Pangemis 2      : hah? Pabila bila aku jadi kuitannya, kami nih bakawan saumuran

Pengemis 1      : (MENARIK PEGEMIS 2 KE SAMPING) aduuhhh,, kayapa ikam nih, aku tadi tapadahi ikam tuh kuitanku, saharusnya ikam maiih akan ja, amun kaya ini katahuan am kita

Paduka             : (MEMOTONG) uyy,,, nang mana nang bujur nih, kuitan kah kawan kah?

Pangemis 1      : kuitan !

Pengemis 2      : kawan !

Paduka             : ayy kanapa maka balain kaya itu. Ayuha tasarah buhan ikam ja lagi nang jalas aku kada kawa mambari buhan ikam duit, (MEYAKINKAN) buhan ikam tahulah, aku tadi imbah DIRAMPOK urang, habis hartaku dibawanya, imbah itu kada lawas aku batamuan lawan BANCIR laknat, sial banar aku hari ini, biasanya bilanya aku rancak takana sial saharian itu artinya gampiranku handak MARASUKI aku !, maka bilanya aku sudah karasukan gampiranku, aku tuh kada kawa mangandaliakan lagi, ujar urang nang suah manamui aku karasukan, aku tuh bisa MAMATII ! hann,, bari takutan kalo?

Pengemis 1      : bujur jua kah bisa kaya itu

Paduka             : bujuran, makanya aku bapadah haja lawan buhan ikam kalo pina sawat manamui aku kayaitu, lakasi haja buhan ikam bajauhan sajauh jauhnya

Pengemis 2      : ahhh kami kada parcaya nang kakaya itu

Paduka             : nahh, tasarah buhan ikam haja lagi, aku sudah mamadahakan, baarti lain salahku lagi.

PADUKA SEDIKIT MENJAUH DAN MELAKUKAN GELAGAT KERASUKAN

Pengemis 1      : (KEPADA PENGEMIS 2) eyy,, lihati kanapa inya tuh pina guguliat kayaitu, musia inya handak kasurupan

Pengemis 2      : gatalan haja kalo inya tuh, aku kada parcaya pang ada urang nang bisa kasurupan kaya itu

Paduka             : (MENIRUKAN KESURUPAN) eyyy buhan ikam badua jangan babisik-bisik nang kaya itu, aku kada katuju amun dipandirakan babalakangan kaya itu woooaaarrrr !

Pengemis 1      : han dustalah bujuran kasurupan sakalinya inya

Paduka             : buhan ikam badua, aku tahu siapa sabujurnya buhan ikam badua nih, bukan ikam nih lain pengemis kalo? Buhan ikam nih urang nang sama nang marampok aku wan nang jadi bancir tadi kalo? Waninya ikam manggangu gampiranku, awas buhan ikam lah, KUMATII buhan ikam badua woaarrr…

Pengemis 2      : ampuunnn,, kami kada bamaksud nang kaya itu

Paduka             : kada usah minta ampun lawan aku, minta ampun lawan tuhan, itu urusan buhan ikam lawan tuhan, tapi aku disini handak mambalas napang nang sudah buhan ikam gawi lawan gampiranku, MATI buhan ikam, MATI !!

Pengemis 1      : (KEPADA PENGEMIS 2) sanak, jangan baranai disini kita, baik kita bukahan haja, kalopina dikacaknya kita habis am

Pengemis 2      : hiih, lakasi dah kita bukahan.

PENGEMIS LARI TERBIRIT-BIRIT KELUAR PANGGUNG

Paduka             : (KEMBALI NORMAL) hahahaaaa…hakun haja kubunguli, kada tahu lawan aku lagi hahaaa, macam-macam ja kalakuan manusia, jaka tahu matan pamulaan nang kaya ini sudah am parampok tadi kubunguli jua, hadeehhh. Ay, ni jam barapa dah, kada kawa balalambat lagi aku nah mun kaya ini, ayuha nah lanjut ai pulang nah maraha surangan

PADUKA MELANJUTKAN PERJALANAN

SETTING BERUBAH MENJADI RUMAH PALUI

Palui                : garbus, kayapa tugas ikam, lancar haja kalo?

Garbus             : napa nang pian suruh sudah ulun gawi bos ai, ulun jamin sidin kada bataha sawat mandatangi pian bos ai, pian tahulah bos, sidin tuh kada bamandian tulak tadi hahaa, lawan jua sidin parcaya haja ulun padahakan mutur sidin tuh rusak, padahal baik haja, pinanya sidin panik banar sudah makanya kada sawat lagi man cek hahaaa

Palui                : mantap, mantap, amun kaya itu kita mahadangi habar nang badua tadi pulang kayapa hasilnya

AJUDAN PALUI MASUK

Palui                : nah pas banar nang dihadangi sudah datang, kayapa tadih habar gawian buhan ikam

Ajudan 1         : jadi nang kaya ini nah bos lah, tugas kami nang marampok tuh sukses banar bos ai, kami berhasil maambil samuaan harta sidin, amun kada parcaya takuni garbus

Palui                : bujur kah garbus?

Garbus             : bujur banar bos ai, takutan banar sidin tadi tuh hahaaa

Palui                : mantap, imbah tu pang kayapa gawian buhan ikam nang kadua

Ajudan 2         : nang kami jadi bancir tuh bos ai kami parak dah katahuan, sidin kawa maaakali kami, sidin bapura-pura jadi bancir jua bos ai, pinanya sidin mulai curiga pang sudah, jadi kami ganti strategi, kami bawa garbus badahulu bos ai.

Palui                : ayuha kada papa, sidin tuh dasar harat akal, gawian nang tarakhir pang kayapa?

Ajudan 1         : nah itu, kami handak batakun hulu wan pian, sidin tuh bujuran kah bisa kasurupan gampiran kaya itu? Jar sidin bila sidin karasukan, sidin bisa mamatii ka manusia

Palui                : dustainya buhan ikam, kanapa maka parcaya, sidin tuh mana suah ada baisi gampiran, aduuhhh. Dasar Panjang akal sakalinya beliau tu lah. Jadi buhan ikam gagal lah tuh?

Ajudah 2         : inggih, kada kawa ai bos ai

Palui                : bah iya pang, bisa gagal jua ni rancanaku handak jadi penguasa.

KEMBALI KE PADUKA YANG SUDAH TIBA DI DEPAN RUMAH PALUI

Paduka             : alhamdulillah akhirnya sampai jua, mudahan sawat haja masih nah. (MENGETOK PINTU RUMAH PALUI) luii.. bukai lui… aku tahu ai ikam ada didalam, uuu luiii, ada nang handak ku padahakan wan ikam.

KEMBALI KEDALAM RUMAH PALUI

Palui                : bah iya pang, datang am sidin, (KEPADA GARBUS DAN AJUDAN) ni gara-gara buhan ikam bagawian kada becus.

KEMBALI KE PADUKA DIDEPAN RUMAH

Paduka             : bukai kada, amun kada dibukai lawang nih ku bungkas nah. Naahhh dasar kada mambukai leh, ayuha mun kaya itu, (MENGAMBIL ANCANG-ANCANG) satu.. dua.. tiga.. (MENDOBRAK PINTU DAN BERHASIL MASUK)

Palui                : (TERKEJUT) kaka palui?

Garbus             : (TERKEJUT) paduka palui?

Paduka             : (KEPADA GARBUS DAN AJUDAN) oohhh.. sudah ku tangguh buhan ikam batiga nih ada kerjasama lawan adingku, (KEPADA GARBUS) garbus, talalu ikam nih lah mahianati aku, kita tuh matan lagi halus sudah bakawan, tapi kanapa ikam kaya ini, gasan duit haja kalo? Pantas ai ikam hari ini pina lain lah, sakalinya dasar sangaja gasan malalambati aku, talalu ikam garbus lah. (KEPADA AJUDAN) buhan ikam badua jua, buhan ikam tuh sudah ku tangguh urang nang sama pas jadi perampok, bancir wan pengemis tadi kalo? Buhan kam kira kawa kah mangalahakan aku SI PALUI TUHA hah? Kada bataha kawa, palui dilawan. (KEPADA PALUI) ding, aku handak bapandir lawan ikam, SURAT KUASA nang ku bari gasan ikam tuh kucabut, kada jadi aku memberikan kakuasaanku lawan ikam.

Palui                : kanapa maka kaya itu? Ikam jangan buruk sikuan kaya itu imbah mambari diambil pulang, ku kada hakun. Sudah lawas aku handak manggantiakan ikam, aku tuh uyuh sudah ada dibalakang ikam, jangan samantang kita nih KAMBAR ikam mamanfaatkan aku sabagai pengganti haja bila ikam auran, uyuh aku tahulah ikam, aku gin handak jua maatur atur, kada diatur atur tarus, samantang ikam tuh kakaku lalu ja sakahandak ikam, matan lagi halus aur ikam haja nang disayangi mama, aku? Mana suah, aku pasti dapat sisanya haja, kaya itulah ikam lawan ading ikam hah?

Paduka             : cuba danganri aku ding, kaina ada haja wayahnya ikam managganti akan aku, tapi kada nang kaya ini caranya, mun kaya ini caranya itu sudah manyalahi system nagara kita DEMOKRASI, habis akan hulu masa jabatanku hanyar ikam mancalon, liatakan haja masyarakat nang mamilih, bilanya masyarakat katuju, ikam pasti dipilihnya

Palui                : kada harapan masyarakat mamilih aku, aku nih kada pintar kaya ikam, aku nih kada harat kaya ikam, aku nih panyarikan, aku nih pangarasan, egois, mata duitan, mana ada urang hakun baisi pamimpin nang kaya aku nih

Paduka             : barataan tuh kawa diubah ding ai, kita nih kambar, aku kawa jadi kaya ini, ikam pasti bisa jua jadi kaya aku. Ikam ingat ai kalo napa jar pasan mama? Jar sidin mun handak jadi pemimpin coba pimpin hulu diri saurang, artinya kita tuh harus kawa mambaiki diri sabalum kita handak mambaiki nagara

Palui                : ahhhh.. pokoknya aku kada handak, aku handak jadi pamimpin wayahinian jua, jalas bakalahian, tatap ku lawani

Paduka             : nahhh am tasalah am mun kaya itu, gara-gara SURAT KUASA haja kita bahualan lah. ikam bila kada handak patuh jar ku, ku bongkar rahasia ikam lagi halus, ku umumakan disini kah sakira urang tahuan?

Palui                : bahhhh kada raminya heh kaya itu, jangan siiii.

Paduka             : ku umum akan kah bahwa ikam tuh suah tabahira disalawar pas sakulah bahari

Palui                : aduuhhh jangan siiiii… ayuha dah nah kada jadi barang aku marabut kakuasaan ikam, asal jangan ikam padahakan ja aib ku.

Paduka             : yaa kaya itu, manis jua hann..

Palui                : (KEPADA GARBUS DAN AJUDAN) ayyy buhan ikam mandagar kah tadi? Bah iya pang, siapa suruh buhan ikam bagana disini, bajauh sana, kami handak bapandiran

GARBUS DAN DUA AJUDAN KELUAR

IBU PALUI MASUK

Kuitan             : (BERSENANDUNG) palui anakku si kambar lain parangai, saikung pintar saikungya pangarasan 2X

Palui                : mama !

Kuitan             : (KEPADA PALUI) nak, ikam tahulah siapa nang manyuruh kaka ikam manggagalakan rancana ikam? Mama nak ai nang manyuruh, mama rasa ikam masih kada layak mamimpin nagara, karna ikam urangnya emosian, masyarakat ikam pasti kada katuju lawan ikam, rajaki urang tuh sudah ada nang maatur nak ai, kaka ikam jadi pamimpin karna rajakinya dasar disitu, ikam mambantu inya baarti rajaki ikam sudah disitu, nikmati ja nak ai. Lawan jua, mun handak jadi pamimpin tuh kada kaya ini caranya, bisa ai masyarakat nang mamilih siapa nang dikatujui buhannya. Jadi pasan mama gasan buhan ikam badua, tolong jangan bacakut, sadih mama malihat buhan ikam bacakut kayaini gasan barabut tahta. Ingati nak lah, ingati.

Palui                : inggih ma…

BLACKOUT

SELESAI

Democrazy

DEMOCRAZY

(FAISAL REFKI – 13/03/2018)

TOKOH:

PALUI 1

PALUI 2

GARBUS

TUHIRANG

TULAMAK

MANG UDIN

BINI TULAMAK

CUCU TULAMAK

 ALUH BUNGAS

DIANG TILII

TULAMAK DAN ISTRINYA SEDANG ASYIK BERBICARA

Bini                 : napa digawi abahnya, jangan tapi dipikirakan, nah kopi lawan gabin gasan pian, barang haja hagan kukutupan..

Tulamak          : umay lih, napa maksud ikam. aku disurungi gabin,aku kada kawa maigut…

Bini                 : astaghirullah, kada ingat ulun gigi pian sudah kadada lagi…

Tulamak          : ya am mangalilu hudah ikam nih, makan ha gabinnya aku kada mamakan ngintu

Bini                 : haann kalo maraju pian nih

Tulamak          : muyak kah.

Bini                 : urang tuha parajuan…

CUCU TULAMAK MASUK SAMBIL MENANGIS

Cucu                : kaiiiii….

Tulamak          : uma umaaa, nang ngapang cu maka manangis, siapa nang maanui ikam?

Cucu                : buhannya kai ai…

Tulamak          : manapa buhannya, nyaman kai datangi nah

Cucu                : buhannya manyambati ulun kai ai, jar buhannya kanapa muha kai ikam tuh babintat bintat gigi rupuy jua, kaya tiwadak bunyaa jarrr…

Tulamak          : naahhhh,waniinya manyambat aku nang kaya itu..

Cucu                : amunnya dasar bujur pang muha pian nang kaya itu,

Tulamak          :nahh,, ikam handak tahulah cu kanapa kai jadi kaya ini. Tapi ampih hulu manangis nyaman kai bakisah…

Cucu                : ayuha kai ai nah, kisahakan pang kai

Tulamak          : jadi bahari tuh kai nih kada pintar cu ai, bahari kai ada baisi kawan nang ngaranya garbus, tuhirang wan palui. Nahhh, jadi kawan kai nang bangaran palui nih garing cu ai, kami minumi obat, sakalinya kai tasalah mambarii ubat wan palui,tabaraungan nasib kada baik, pas sidin karacunan,matii…

Cucu                : siapa kai nang mati

Tulamak          : palui,,kawan kai tipang.

Cucu                : imbahpang kai.

Tulamak          : lalu kai nih disalahakan garbus wan tuhirang, dipukuli buhannya kai, makanya muha kai nih babintat bintat nang kaya tiwadak masak gigi rupui sampai wayahini, gagara garbus pang talalu gancang mahamput kai.

Cucu                : kasianya leh kai. Kamana kawan pian garbus wan tuhirang tuh wayahini kai?

Tulamak          : garbus wan tuhirang wayah ini……………………………..

LAMPU REDUP PERLAHAN, PANGGUNG 2 DEMENSI

SETTING DI TAMAN

GARBUS DAN TUHIRANG TERLIHAT SEDANG MENCARI PALUI

Garbus & tuhirang      : luii.. dimana ikam luiii…

Tuhirang & Garbus     : luii.. batampai pang kasini luii.. lawasnya dah ikam hilang luiii…

PALUI 1 MASUK DAN BERBICARA KEPADA GARBUS

Palui 1             : (MELIHAT GARBUS) garbus,, kanapa pian maka mancarii ulun

Garbus             : kau siapa?

Palui 1             : ulun palui, kada ingat kah pian?

Garbus             : asa lain kanapa yu? Iya garang nih kau lui?

Palui 1             : nahhh.. nyata ai pian kada pinandu lagi, ulun wayahini hidup Nyaman dah makanya asa ubah muha ulun.

Garbus             : umaa umaaa. Bujuran kau kah sakalinya, bapalanya kau wayahini lui, baarti ampih ai lah gawian malukah?

Palui 1             : bahhh, malukah? Kada main lagi dah gawian nang kaya itu, pian tahulah gawian ulun wayahini maapa?

Garbus             : napa tu?

Palui 1             : kaina ulun padahi, amun pian handak tahu gawian ulun, pian umpati ulun, kayapa?

Garbus             : umpat maapa nih? Halal kah haram?

Palui 1             : nyata ai halal, nyaman ha pulang, dijamin sukses bus ai

Garbus             : amun halal wan nyaman ayuha diaku umpat lui ai

Palui 1             : nah sip dah tu,,kasiiiiii

PALUI 2 MASUK DAN BERBICARA KEPADA TUHIRANG

Palui 2             : ikam siapa pina mancarii aku?

Tuhurang         : palui? Uma umaaa.. alhamdulillah ikam masih hidup lui, aku kira ikam sudah hilang, pina lawas banar kadada kalihatan.

Palui 2             : hadang hulu, ikam nih siapa?

Tuhirang          : aku tuhirang lui, kawan ikam matan lagi halus, kada ingat lagi kah ikam?

Palui                : ayyyy, ikam kah nang bangarang tuhirang tuh, dasar banaran kadap lih muha ikam, sasuai haja pang digalari tuhirang.

Tuhirang          : kada sing ubahan lih kalakuan ikam nih lui ai, matan bahari gawian manyambati urang haja.

Palui 2             : ya am, aku ni kam amun kada manayambati urang sahari bisa…… gila haaahaaa

Tuhirang          : ngintu ngarannya dosa kada karasaan lui ai, kamana haja ikam wayahini lui?

Palui 2             : aku wayahini ada nang digawi, di suatu tempat nang kada perlu ikam ketahui, nang jalas aku wayahini hidup nyaman, kada kaya bahari lagi. Ikam hakun kah umpat aku?

Tuhirang          : umpat maapa lui?

Palui 2             : tanang ha, dijamin nyaman. Kayapa?

Tahirang          : amun pacangan nyaman aku akur haja.

Palui 2             : lets goooooooo….

KADUA PALUI SEDANG ASYIK BERBICARA KEPADA GARBUS DAN TUHIRANG

UDIN KARNI MASUK

Udin Karni      : uyyy, mulai kah sudah?

SEMUA KELUAR

PANGGUNG KOSONG

SETTING PANGGUNG DIRUANG DEBAT

 ( selamat malam, dalam episode special di acara palui bepandir, disiarkan langsung matan gedung kesenian balairung sari kalimantan selatan, dan akan dipimpin langsung oleh MC Kondang kita,,siapa lagii kalu bukann….udinnnnnnn karniiiii )

UDIN KARNI MASUK

Udin Karni      : selamat malam para penonton yang berbahagia, batamu pulang lawan ulun UDIN KARNI dalam acara PALUI BAPANDIR,pada malam hari ini ulun di kawani beberapa binian MUNGKAL selaku pengamat politik, DIANG TILIII WAN ALUH BUNGAS,  dan kita kadatangan dua kandidat, buhannya kaina akan berdebat masalah demokrasi nang ada di banua nih, kada usah balalawas lagi langsung haja kita kiyau pasangan nang pertama, PALUI DAN GARBUS !. pasangan nang kadua, PALUI DAN TUHIRANG !

KEDUA PALUI MASUK BERSAMA GARBUS, TUHIRANG DAN DUA ORANG PENDAMPING

Udin Karni      : oke, kedua pasangan sudah ada ditempat, kita lanjut haja ka sesi nang partama yaitu perkenalan, dipersilahkan kepada pasangan pertama.

Palui 1             : hadang hulu, perkenalan napa pulang, maka tadi sudah pian sambat ngaran kami, jar pian “kita kiyau pasangan nang partama PALUI DAN GARBUS”, nah sudah pian sambat kalo, jadi gasan napa lagi dikanalakan, aneh pian nih…….

Udin Karni      : eee, maksudku kada kaya itu, tapi ayuha sudah, bujur jua pang jar mu. (KAPADA PALUI DAN TUHIRANG) buhan pian pang handak kah jua perkenalan diri?

Palui 2             : buhannya haja kada perkenalan, masa kami perkenalan lah? Kada adil kaya ini judulnya, (KEPADA TUHIRANG) iya kalo tuhirang?

Tuhirang          : iya banarrrr, kada adil, saharusnya pian sabagai MC tuh jangan timpang sabalah

Udin Karni      : aduhh, maksudku kada kaya itu, aku tuh manawari haja, kadanya kada adil pang, tapi tasarah buhanmu haja gin hudah. (KEMBALI KEPENONTON) baiklah, karna kedua pasangan kulir manganalakan diri, maka kita lanjut haja ka sesi selanjutnya.

Garbus             : interupsi, kadanya kada handak pang, maka sudah dipadahi tadi, kau tuh sudah manyambat ngaran kami pamulaan tadi, jadi kada usah lagi, kadanya kulir…camintuu

Udin Karni      : ih ayuha aku nang salah…

Palui 2             : ikam jangan marasa salah kaya itu jadi MC, amun ikam kaya itu kami nih timbul kada yakin jadinya umpat acara ngini

Udin Karni      : handak buhan pian nih napa garang? Sarabanya ditatak pandiranku.

Aluh bungas    : ijin masuk,,lamunnya uln boleh berpendapat alangkah baiknya pian takuni nang kaya apa parigal nang buhannya handaki, dilanjut atau wah kada, balum apa-apa hudah bacakut papadaan.

Diang tilii        : lamunnya ditimang-timang disayang-sayang…kayanya buhannya nih handak lanjut haja pang…iyaa kaluuu…

Semua             : LANJUT !!  

Udin Karni      : ya tu kaya itu, (KEPADA PENONTON) baiklah, kita lanjut ke sesi visi misi kedua pasangan, gasan nang pamulaan dipersilahkan kepada pasangan PALUI DAN GARBUS

Palui 1 : astagaaaa… pian nihhh lah, kada mau pang asal tunjuk haja, saharusnya siapa nang badahulu tuh ditantuakan pakai cara nang adil, (KEPADA GARBUS) kayapa bus caranya?

Garbus             : caranya kita tuh pingsut hulu, siapa nang manang ngintu nang badahulu, (KEPADA PALUI 2) kayapa satuju haja kah buhan naunn ?

Palui 2             : satuju haja aku amunnya kaya itu caranya,,

Tuhirang          : naran, kadanya asal tunjuk haja, kaya itu lah caranya manantuakan pilihan?

Udin Karni      : (BICARA SENDIRI) calaka am nang kaya ini, kanapa maka bubuhannya nang maatur acara, nang ampun acara nih aku. Ayuha tasarah buhannya haja gin daripada ngalih kaina. (KEPADA KEDUA PALUI) ayuha sudah, kita ambil keputusan siapa nang badahulu manyampaikan visi misiya pakai cara PINGSUT, kedua pasangan harap maju ketengah gasan menentukan siapa pamanangnya.

KEDUA PALUI KETENGAH UNTUK MELAKUKAN PINGSUT.

Palui 2             : sudah pasti aku nang manang, lamunnya aku manang akan ku ambil pupuyu babanam,iwak karing batanak wan tarung bajarang.

Palui 1             : jangan nang kaya itu pian badahulu, cobai hulu, pasang kuda-kuda,,haaapp

TERNYATA DIMENANGKAN OLEH PALUI 1

Palui 1             : nahh iya kaluu ulun nang manang…

Palui 2             : hadang haja kainaa pacang kubalass tu pang,,,hahahaahh

Udin Karni      : langsung haja, palui dan garbus silahkan sampaikan visi misinya

Palui 1             : nahhh, visi misi ulun adalah, menjadikan seluruh warga banua untuk bebas berpendapat tanpa adanya ketakutan dalam bertindak.

Palui 2             : interupsi

Palui 1             : hadang hulu, ni kanapa nih (KEPADA UDIN KARNI)  maka ada interupsi?

Udin Karni      : IYAA, dalam penyampaian visi misi, kandidat lain kada boleh membantah

Palui 2             : ikam mandangar lah napa jar visi misinya tadi? “bebas berpendapat tanpa adanya ketakutan dalam bertindak”, jadi aku handak berpendapat parihal visi misi inya tadi, aku batakun, kawakah ikam mambari cuntuhnya?

Palui 1             : sakira kawan ulun ada jua bapandir, jadi ulun minta garbus nang manjawab akan

Garbus             : bah iya am, kayapa yu lah cuntuhnya (BERPIKIR) mungkin nang kaya ini, misalkan kita dalam acara nih, ada MC nya nang pina manyanyalah, walaupun ngintu acaranya, amum kita marasa bujur, langsung haja bantah. Kayapa yu laah, intinya kita tuh bebas berpendapat, nang kaya aku nih wani berpendapat, masalah bujur atau salah tuh balakangan, nang panting wani, iya kalo lui?

Palui 1             : naahhh, mantap banarr sudah pian nih..

Udin Karni      : kayapa palui wan tuhirang? Puas haja kah lawan jawaban tadi?

Palui 2             : amun aku kada pang, tahuam tuhirang, (KEPADA TUHIRANG) paham lah ikam?

Tuhirang          : sabujurnya kada paham pang, tapi karna inya sudah wani bapandapat, tawani pada aku,, yaa aku mahargai itu lah, asal inya himung kaya itu nah…..

Garbus             : maksud kau napa,,kau mahimungi aku haja kah…kalu pina ku tabang batang gulu…

Diang tilii        : ayyyy…amun ditimang-timang disayang-sayang,, Aa garbuss pian pina langkar banar…

Garbus             : haannn aku dasar langkar badahuluan,,bawaan matan lahir.

Aluh bungas    : baikknyaa ditaruskann,,kada usah dipapanjangi lagi.

Udin Karni      : alhamdulillah amuunya kada bapanjang tuu, kayapa palui wan garbus ada lagi kah nang handak disampaikan?

Palui 1             : cukup,,

Udin Karni      : amun kaya itu kita mandangarakan visi misi matan palui wan tuhirang, waktu dan tempat dipersilahkan.

Palui 2             : visi misisinya kada banyak, boleh dicatat, karena urang banua kada tapi paingatan. intinya mengembalikan apa yang dari rakyat, oleh rakyat untuk rakyat. Cukup.

Udin Karni      : kayapa palui garbus? Ada nang handak ditakunakan kah?

Garbus             : diaku handak mambalas nang tadi jua, Bariakan pang cuntuhnya

Tuhirang          : biar aku haja nang manjawab, cuntunya tuh misalkan kita nih jadi pamimpin, kita nih bahari rakyat jua kalo, nahhh, amun sudah dapat jabatan jangan kada tatahu lawan rakyat, paduli lawan rakyat, napa jar kahandak rakyat harus dikabulkan, jangan handak surangan haja…

Palui 2             : kada salah aku mamilih ikam nih tuhirang ai sabagai wakil ku, bangga aku lawan ikam nih

Tuhirang          : hahahaa, itu masih kada sabarapa lui ai, tagantung sabarapa isi ampluk haja…

Palui 2             : tanangg…serangan fajar hudah kususun hagan ikam.

Udin Karni      : kayapa garbus wan palui? Puas haja kah lawan jawabannya?

Palui 1             : baarti kita tuh harus babulik pulang kalo ka masyarakat?

Palui 2             : iyaa, intinya, dari rakyat oleh rakyat untuk rakyat. Titik

Udin Karni      : (KEPADA PENONTON) okeee.. pinanya kadua pasangan sudah mulai hajar mahajar, sikut manyikut …..

Palui 1             : (MEMOTONG) hadang hulu, napa pulang maksud pian hajar mahajar sikut manyikut tadih? Parasaan kami kadada bahahajaran pang, iya kalo buhannya?

Palui 2             : bujurr, ikam jangan maada ada lah, jangan manyampaikan barita nang kada bujur, Bahasa kerennya tuh napa jar tuhirang?

Tuhirang          : HOAX

Palui 2             : nahh HOAX jar, kaina panuntun nang dirumah tataguk pandiran ikam

Garbus             : saran haja pang gasan Udin Karni, jangan asal bapandir banganga badahulu, masyarakat wayahini kada kawa kada mandangar habar nang pina malalain lalu ja…...

Tuhirang         : VIRAL..

Garbus             : nahh iyaa tuu.

Udin Karni      : (BICARA KEPADA DISI SENDIRI) sabarrr.. mudahan capat ampihan ja acara nginih. (KEPADA SEMUA) Ayuha sudah, jadi pang ni handaknya kayapa nah sakira nyaman?

Diang tilii       : lamunnya ditimang-timang disayang-sayang,,lanjutt kaluuu…

Semua             : lanjut !

Udin Karni      : lanjut kamana?

Palui 1             : ayyy, pian nang ampun acara kayapa ? ampihan kah napa kah nih?

Aluh bungas    : munnya ulun boleh saran, lamuunya masih ada silakan haja ditaruskan.

Udin Karni      : masih ada pang lagi sabujurnya

Garbus             : nahhh, lanjut nang ada tu ai dah

Udin Karni      : ayuha nah, tapi tolong jangan dibantah lah? Sakira kita capat nah

Palui 2             : amun ikam salah kami bantah, karna kita berhak menyampaikan pendapat, iya kalo palui?

Palui 1             : visi misi ulun tuh hahaaaa

Udin Karni      : ayuha nah, mudahan kada tasalah lagi nah. (KE PEONTON) baiklah, kedua pasangan sudah menyampaikan visi misi mereka, selanjutnya kita akan masuk ke sesi yang terakhir, yaitu sesi DEBAT !!

Palui 1             : (MEMOTONG) hadang, ulun umpat batakun, arti DEBAT tuh kayapa garang?

Palui 2             : iyaa,, aku kada ngarti jua nah napa artinya DEBAT tu?

Udin Karni      : debat tuh Bahasa kitanya “bakakancangan”

Garbus             : ba’arti tadi tuh kita debat lah, parasa diaku kita bakakancangan haja matan pamulaan

Tuhirang          : nahh bujur tu jar inya, kada usah lagi gin bakakancangan kada kakaruan, lapahh

Garbus             : kada jadi barasssss…

Udin Karni      :lain kaya itu maksudnya, debat disini nih kita mamandirakan suatu permasalahan, jadi kaina buhan pian nang mendebatakan masalah itu

Palui 1             : jangan mamandirakan urang babalakangan, kada baik, badosa tahulahh

Udin Karni      : astagaaaa.. lain mamandirakan urang pang kita nih, haduuhh, kayapa yu leh manjalasakannya lawan buhan pian  nih..

Palui 2             : kanapa maka bingung, ikam nih siap kah kada mamimpin acara nih?

Diang tilii        : amunnya ditimang-timang disayang-sayang, kita dangarakan haja napa ujar sidin. Akurrrrrrr!!!!

Semua             : AKUURR!!!

Udin Karni      : LANGSUNG haja nah, nang kita debat kan nih masalah DEMOKRASI !!

Garbus             : napa tuh? Ngaran urang kah demokrasi tuh?

Udin Karni      : nahhh kada tahu kalo? Makanya kita pandirakan masalah demokrasi tuh, siap kah?

Palui 1             : ayuha nah, coba ai hulu

Palui 2             : iyaa..kada salahnya mancoba, kaina kada tahu, ya kalo tuhirang?

Tuhirang          : iyaa banarr.

Udin Karni      : alhamdulillah. (KEPADA PENONTON) baiklah, langsung saja kita masuk ke sesi DEBAT dengan topik DEMOKRASI. (KEPADA KEDUA PASANGAN) jadi aturan mainnya kaya ini, salah satu diantara buhan pian kaina yang maartikan napa itu demokrasi, pasangan lainnya khusus mendebat, siapa nang kuat argumennya itu nang manang? Siap haja kah?

Palui 1             : pakai pingsut pulang kalo?

Udin Karni      : nyata ai, kaina buhan ikam hamuk pulang, ada nang ditakunakan lagi kah? (JEDA) amun kadada aku anggap paham lah. Gasan kadua kandidat silahkan katangah gasan pingsut manantukan siapa nang jadi pendebat.

Palui 1             : (KEPADA PALUI 2) nyata pian nang kalah pulang, munnya urang nang kaya pian nih banyak was wasnya..

Palui 2             : ikam jangan pina musti, nang kaya aku nihh banyak cara sagan mangalahkan ikam,, apalagi wahini jamannya duit..

Palui 1             : duit ngintuu hagan bubuhan nang rakuss haja. Amunnya ulun kada tapi rakus,,hiiii

Palui 2             : jangan banyak muntung, pasang kuda-kuda ikam…

KEDUA PALUI MELAKUKAN SUIT DAN DIMENANGKAN OLEH PALUI 1

Palui 1             : yeesss, masak tu pang buhan pian, ulun kancangi, pokoknya kami kada handak kalah tu pang, iya kalo garbus?

Garbus             : iya banar, siap tampur nang kaya kaminting pidakan.

Palui 2             : ayuha kayapa kah lagi, jalas balangsar dada manyarah maka kada, tuhirang siap haja kalo?

Tuhirang          : siap lui ai, waja sampai kaputing.

Udin Karni      : mantap. Amun sudah siap barataan, dipersilahkan gasan palui wan tuhirang menyampaikan napa itu DEMOKRASI

Palui 2             : terimakasih atas waktunya, manurut kami DEMOKRASI tuh artinya, DEMO nang DIKARASI, artinya bila demo tuh harus karas jangan balalamahan

Udin Karni      : okeee.. palui wan garbus silahkan ditanggapi

Palui 1             : interupsi, mangarasi siapa buhan pian?

Palui 2             : nyata ai nang handak didemo

Garbus             : cuntuhnya?

Palui 2             : tuhirang kasih contoh

Tuhirang          : contohnya pamarintah nang kada sasuai gawiannya, batindak sakahandaknya

Palui 1             : musia inya kada handak didemo kayapa,, neh?

Palui 2             : mau pang kaya itu, kita baisi hak gasan mandemo inya..

Garbus             : kada uyuh kah buhan naun demo bakaras karas, kalo pina takarasi bangkong parcuma ai hahaaa

Palui 2             : nnaaahhh… amun kada kaya itu buhan ikam hakun kah di pintari pamarintah

Tuhirang          : hiih, jar pamarintah bayar ini bayar itu, padahal kada bayar, hakun lah ikam dikaya itu akan?

Palui 1             : nyata ai kada hakun, nyaman nang gratis jua..

Palui 2             : itu pang fungsinya kita demo karas, sakira pamarintah kada maakali kita

Tuhirang         : tapi pulang lah, misalkan kita mandemo pamarintah nih, musia kita kada dibantu bubuhannya kayapa?

Garbus             : naaahhh, coba akan amun wani kada mambantu, aku nang turun tangan kita karasi sakaras karasnya.

Palui 1             : hadang, bubuhan naun nih suah garang demo

Palui 2             : (BINGUNG) kada pang, ikam pang tuhirang?

Tuhirang          : kada suah lui ai. Buhan ikam pang?

Palui 1             : kada suah jua. pian pang garbus?

Garbus             : makin ai diaku..

Semua             : hahahaaaaa

Palui 1             : jadi pang kita nih maapa hahahaaaa

Palui 2             : kada tahu jua hahaaaaaa

Garbus             : kita demo kah?

Semua             : demo demoooo demo demoooo !!!!

KEADAAN MENJADI KACAU BALAU. UDIN KARNI DAN KEDUA PENDAMPING PANIK

Aluh bungas    : (KEPADA UDIN KARNI) dok, pinanya buhannya kahabisan efek obat nih dok..

Diang tilii        : ditimang-timang disayang-sayang….

Aluh bungas    : (manatak pandiran) kalawasan…. Amun kita lihatakan haja, kalo pina magin bahamuk buhannya dok ai

Udin Karni      : amun kaya itu suruh bubuhannya masuk kadalam kamar

Tilii & Bungas: siap dok…..

SEMUA PEMAIN KELUAR PANGGUNG

BLACKOUT

KEMBALI KE TULAMAK

Cucu                : uuhhh baarti palui tuh terkenal banar lih kai maka sampai ada nang handak jadi sidin….

Tulamak          : hiih, sidin tuh pintar, harat maakal, makanya urang handak kaya sidin, sidin tuh urangnya disayangi banar, makanya si garbus wan tuhirang sampai kaya itu banar..

Cucu                : ulun handak kaya palui ha jua kai ai nang pintar wan harat akal..

Tulamak          : naahhh bagus tu mun kaya itu, ayuha sudah, sadang dah mandi, babau ari dah awak..

Bini                 : kasi cu kita mandian

UDIN KARNI DATANG KAWADAH TULAMAK

Udin karni       : asssallamuaikumm

Tulamak          : walaikumsalamm,,masukkk…aku kada tapi hingkat lagi wayah ini badiri-diri.

Udin karni       : ulun, julak’ae udin karni…

Tulamak          : ayy..ikam kahh tu haluss

Udin karni       : udin karni julak’ae, wahini kadada lagi bagagalaran nang kaya bahari,masih aruah abah hidup..

Tulamak          : hahaha…bahari tii nak’ae urang bebas banar bapandapat, tapi kada biasa baanggapan, jadi bagagalaran kadada bisa sarikk..

Udin karni       : talalu demokrasi,. Tii pang julak’ae,,heeee

Tulamak          : wayah ini napa nang ikam gawi, ujar habar ikam dirumah sakit jiwa manangani orang-orang pintar nang kaliwatan batas, bujur kahh tuhalus ?

Udin karni       : bujur haja julak’ae

TADANGAR SUARA PALUI

Tulamak lawan Anak ku udin karni…

Wayah ini urang dibanui kita nihh, sasain hari sasain ubah, samasa talalu bebas bapandapat sasain harat akal harat jua ma’akal…

Balumba-lumba urang handak kaya aku, tapi buhan ikam nang dibanua tolong jaga akan marwah ngaranku…

Sagan ikam tulamak, kisah akan haja tarus nang kaya apa parigal ku, baik atauwah kada, tapi itupang kaadaan diwadah kita.

Sagan ikam anak ku, tuhalus… tolong tatambai orang-orang nang talalu pintar….

Talalu pintar bapandapat,talalu bebas hingga mahalal akan adab urang-urang kita dibanua,pas jadi saliwah…

Apa lagi wayah ini bubuhan pamarintah sudah akalan,,,

Hukum dijadiakan sanjata, taming wan piluru hagan bubuhan kita nang mancari kabujuran sebagai hak kita dibanua.

Karena pada hakikatnya :

INNILHUKMU ILLALILLAHI YAKUSSULHAQQA WAHUWA KHAIRULFASILLIN.

Menetapkan hukum itu hanya milik ALLAH. Dia menerangkan yang sebenarnya dan dia pemberi keputusan yang paling baik. (TQS al-An’am 6;57)

BLACKOUT